Rowasu'u tô sena 're ihâimana mono
2
Tazahã, a hã Titu, ma'ãpé roti tô sena 're ihâimana mono na si 're rowahutu mono. 2 Aibâ ihâiba prédum norĩ ma 're rowahutu mono, i'uwaibaba na si 're hâimana za'ra mono da, wazép sina, 'rã nhimiza'rese na duré siptete sina 'Re ihâimana u'âsi mono te te sina 're i'umnhasi za'ra mono zéb zarina 're hâimana za'ra mono da, duré tinhimizawi na si 're hâimana za'ra mono da, duré siptete sina 're hâimana za'ra mono da, marĩ nherẽ. 3 Tane duré, pi'õ ihi norĩ ma 're aroti mono, pi'õ norĩ i'uwaibaba na si 're ihâimana za'ra mono ne, 're hâimana za'ra mono da. Iwẽ hã ta norĩ hã te te da'ãma 're wasété za'ra mono ãna, 're ihâimana za'ra mono da si, duré uva 'rãi wa'u isé hã te te 're âhuri za'ẽtẽ mono ãna. Duré tãma 're hâimana za'ra mono i'rãiwaihu hã, iwẽ na si 're isisanho za'ra mono da si, 4 pi'õ ipréduptém norĩ hã, timro zawi hã duré ti'ra norĩ zawi zama te te 're iwaihu'u za'ra mono da si, 5 duré ãma tãma 're sisanho za'ra mono da, i'uwaibaba na marĩ te te 're 'manharĩ za'ra mono da, duré timro ma si, 're hâimana za'ra mono da, duré 'ri tede'wa iwẽ na 're hâimana za'ra mono da, duré hâimana wẽ na 're hâimana za'ra mono da, duré timro zahâpâ 're hâimana za'ra mono da, ni'wa hã 'Re ihâimana u'âsi mono nhimiroti na te te wasété tõ da.6 Tane duré aibâ ipréduptém norĩ ma, 're aroti mono, i'uwaibaba na si marĩ te te 're 'manharĩ za'ra mono da. 7 A hã duré uburé marĩ hã 're i'ab'manharĩ wẽ mono na, dama 're asanho mono. Asima atoi ãna 're aihâimana mono. Duré tô sena 're aihâimana mono, dama 're rowahutu mono wamhã. 8 Aimreme i'uwaibaba na si 're aimreme mono, ni'wa hã te te ai'ãma wasété tõ da, duré asada 're ihâimana za'ra mono norĩ hã 're siséb za'ra mono da, niha hã te te wa'ãma 're wasété waihu'u za'ra mono õ wa.
9 Wada'uri zarina titede'wai ma romhuri'wa norĩ ma, 're aroti mono, uburé marĩ na tinhib'ihâ'a norĩ hã te te 're wapari pese za'ra mono da, duré sima sô 're sõpré mono da, te te sina tãma 're rowẽ za'ra mono da, duré timreme na te te tãma 're wa'rãmi za'ra mono tõ da 10 duré tinhib'ihâ'a norĩ wi 're simisaihuri za'ra mono tõ da. Tazahã, iwẽ hã, wẽ u'âsi tãma 're ihâimana za'ra mono da si, duré tô sena tãma 're ihâimana za'ra mono na, marĩ te te 're i'manharĩ za'ra mono na hã. Ãne wamhã, marĩ te te 're i'manharĩ za'ra mono zé u'âbâ, te za 'Re ihâimana u'âsi mono Wanho'reptui'wa nhimiroti hã da te dasima 're wasu'u wẽ za'ra.
11 E marĩ wa. 'Re ihâimana u'âsi mono, ma tô tinhimizawi pese zé hã dama hâi'ré, uburé te te da'anho'reptu da. 12 Ã hã isimizawi pese zé hã te te wama 're awaihu'u, marĩ iwasétére hã duré ti'ai ãma siwa'ru marĩ hã da te dasima 're iwẽ za'ra mono hã wa te 're rẽme pese za'ra mono da, duré ti'ai ãma dawazari, i'uwaibaba na si 're wahâimana za'ra mono da, tô sena na duré 'Re ihâimana u'âsi mono zô si 're iwanhopré mono na. 13 Ãne wa za 're wahâimana za'ra, bâdâ rowẽ uptabi zô 're wanhimipari za'ra mono ré hã, niwa wate za'ra 'Re ihâimana u'âsi mono Wanho'reptui'wa Zezu Cristu isa'ẽtẽ uptabi hã, rowẽ za'ẽtẽ ré za niwa apâ we imorĩzéb zô. 14 Ta hã ma tô sisõ wazada za'ra, uburé marĩ iwasété hawi te te 're wa'anho'reptui mono da, wawasété ãna oto 're wanomro mono da, õhõ ma si oto isib'a'uwẽ na tãma 're wahâimana za'ra mono da, duré marĩ iwẽ si wa te 're 'manharĩ za'ra mono da.
15 Ãne te za dama 're irowahutu mo. Duré asimiroti pire na dama 're rowasu'u mono, ãma 're da'anhiptete mono da, duré aimreme hã aiwapari'wa norĩ ma, 're apẽtẽ mono da. Ãma 're pibui pese mono, ni'wa hã te te aiwẽ'õ pese tõ da.