Zezu Cristu hã ma tô ĩpisutu. Ma tô duré ĩzatõ, 'Re ihâimana u'âsi mono nhib'a'uwẽ te 're apawapto mono da, siptete na 're nomro mono da, te te sina 're i'umnhasi za'ra mono zém na duré tô sena 'Re ihâimana u'âsi mono nhimiroti hã te te waihu'u pese za'ra da, da te tãma 're iromhuri za'ra mono zé hã da te waihu'u za'ra da. 2 Ãne wamhã, dahâimanazé isi'utõrĩ õ, da te dasina 're i'uwaimrami za'ra mono zéb zô, rob'umnhasi sina te za 're danhimipari za'ra, dasiwawãi ãna. Ta hã ma tô 'Re ihâimana u'âsi mono isadawa nhipese waihu'u õ hã dama ropisutu, uburé te te aropoto mono wana ré. 3 Ta hã bâdâ iwa iwaptã'ãzéb zarina ma tô dama hâi'ré, tinhimiroti na. Ta hã tinhimiroti ma tô ĩma tisõ. Tahawa, wa tô ta hã te dama 're wasu'u, 'Re ihâimana u'âsi mono Wanho'reptui'wa te te ĩma i'ruzéb zarina.

4 Titu, te aima irowasu'uzéb zarina sazei wa, ĩ'ra ne ĩma 're i'aihâimana mono, wa ãma aima rob'ui'éré, 'Re ihâimana u'âsi mono aiwa, wa te wasina 're i'umnhasi mono zéb zarina.

Wamama 'Re ihâimana u'âsi mono nhimizawi pese zé duré ihawi rowẽ u'â hã duré Zezu Cristu Wanho'reptui'wa te hã, asiré 're ihâimana mono da si, iwẽ hã.

5 Titu, Creta na rob'ré za'iti nhisi ãma wa tô airẽ, robza'ra pese da, zahadu sô irobaba ãma duré isazei'wa norĩ 'madâ'â'wa da, apisutu da, 'ri wa'õtõ mono bâ, te aima irotizéb zarina. 6 Isazei'wa norĩ 'madâ'â'wa da hã, aibâ sena na ihâimana duré i'uwaibaba na si 're imorĩ, marĩ iwasété na da te dasima 're iwasu'u waihu'u za'ra mono õ. Duré imro hã, misi pi'õ tãma 're ihâimana mono. I'ra norĩ hã isazei'wa na 're ihâimana za'ra mono, siwa'ru 're ihâimana za'ra mono na, da te dasima 're iwasu'u waihu'u za'ra mono õ, duré niwamhã isimiwapari õ na da te dasima 're iwasu'u wasété za'ra mono õ.

7 Ni'wa hã da'madâ'â'wa, 'Re ihâimana u'âsi mono ma romhuri te te 're 'madâ'â mono da wamhã, i'ru zahi, sena na duré i'uwaibaba na si 're imorĩ da hã, marĩ iwasété na da te dasima 're iwasu'u waihu'u za'ra mono õ. 'Re isi'madâ'â zei mono õ, isimihâ zei õ duré âzé na 're isi'rãiwamnarĩ mono õ. Isiti'rui õ, duré marĩ hã 'rã nhipese sina te te sima 're i'awaibui mono õ. 8 Tazahã, te za 're simnhasi, tinhorõwa u te te 're da'awaibui wẽ mono da si. Marĩ iwẽ zawi'wa na te za 're hâimana. I'uwaibaba na si te za marĩ hã te te 're ab'manharĩ. Tô sena te za 're hâimana. Aimawi te za 're hâimana, 'Re ihâimana u'âsi mono ma romhuri na si. Dazadawa zarina 're hâimana mono õ di za. 9 Siptete sina te za duré 're hâimana, 'Re ihâimana u'âsi mono nhimiroti na hã, da te tãma ãma 're iroti mono zéb zarina si, taha si umnhasi uptabi wa. Ãne wamhã, te za te te 're da'anhiptete, 'Re ihâimana u'âsi mono nhimiroti tô sena 're ihâimana mono na hã. Te za duré te te dama 're awaihu'u senai õ na, ni'wam norĩ hã i'upa na 'Re ihâimana u'âsi mono nhimiroti da, 're ihâimana za'ra mono norĩ ma hã.

10 E marĩ wa, wa ãne ãma aima rob'ui'éré. Da'ahâ uptabi na 're dahâimana za'ra mono wa. Ta norĩ hã te 'Re ihâimana u'âsi mono nhimiroti te te siwi 're wẽ'õ pese za'ra. Ta norĩ hã i'rã nhimiza'rese õ. Te te duré dama 're rob'rãmi za'ra. Tane nherẽ, ta norĩ 'remhã te ni'wam norĩ danhihâiwata nhihâri na 're isimizaze za'ra mono norĩ hã ã norĩ ãma 're hâimana wasété uptabi za'ra, danhipai u. 11 I'ru zahi, a hã tãma i'manharĩ za'ra da hã, ta norĩ hã timreme i'upa te te isahâri za'ra da hã. E marĩ wa. Ta norĩ hã te damama sipoto hawi a'uwẽ norĩ wi te te 're ro'wa'rutu za'ra, i'uwaibaba õ na te te dama 're irowahutu za'ra mono na, rob'uiprazé hã i'uwaibaba õ nherẽ, te te dawi 're waibui mono da hã. 12 Aibâ rowaihu'u pese 'wa, Creta na rob'ré za'iti nhisi ãma 're ihâimana mono hã i'uwaibaba na ma tô rob'ui'éré, wahub ahâ na tinhib'a'uwẽ norĩ ãma hã, ãne: “Creta ãma 're ihâimana za'ra mono norĩ hã sadawa nhipese na si te 're hâimana za'ra. Abaze zahi rom na 're ihâimana za'ra mono ne, duré iwa'a za'ra. Dasa na si te 're 'rãza'õtõ za'ra.” 13 Tô sena ma tô ãne hã tinha. Tahawa, ma'ãpé aimreme hã tãma 're 'morõpãrĩ za'ra mono, senai õ na rowahutu'wa norĩ ma hã, siptete si na te te saze za'ra da, i'uwaibaba 'Re ihâimana u'âsi mono nhimiroti hã 14 duré Zudeu norĩ sihawi rowasu'u te te 're ipoto za'ra mono hã te te 're wapari za'ra mono tõ da, duré aibâ norĩ, tô sena 'Re ihâimana u'âsi mono nhimiroti te te siwi 're iwẽ'õ pese za'ra mono norĩ nhimiroti hã te te 're wapari za'ra mono tõ da. 15 Uburé marĩ iwẽ si duré i'u're õ si, te 're hâimana za'ra, ni'wam norĩ hã 'Re ihâimana u'âsi mono ma, aimawi wẽ uptabi na 're ihâimana za'ra mono norĩ ma hã. Tanei õ di, ni'wam norĩ hã marĩ iwasété zô si 're isõpré mono norĩ ma hã duré isazei'õ'wa norĩ ma hã. Marĩ iwẽ i'u're õ hã hâimana waihu'u õ di, ta norĩ ma hã, isimirosa'rata za'ra 'remhã, marĩ iwasété si tãma 're hâimana za'ra mono wa. 16 Ta norĩ hã te 're siwasu'u za'ra, 'Re ihâimana u'âsi mono, tãma iwaihu'u pese za'ra na hã. Tane nherẽ, marĩ te te 're i'manharĩ za'ra mono zé hã 'Re ihâimana u'âsi mono tãma iwaihu'u za'ra õ na te te 're wasu'u za'ra. Tahawa 'ru za'ra di. 'Re ihâimana u'âsi mono nhimiroti 'madâ'â pese 'wai õ di. Duré marĩ iwẽ hã te te 're 'manharĩ waihu'u za'ra mono õ di.