5 Tahawa, Cristu hã ti'ai u wei morĩ wamhã, ma tô Timama ma tinha, ãne:

8 Ĩmorĩ'rata na hã, Cristu ma tô tinha Timama ma, ãne: “Asima 're wẽ mono õ di, danhoprubzé danhimizama da te aima 're izata za'ra mono da hã niwamhã amnho na danhoprubzéb zama. Duré te te aima 're rowẽ mono õ di, danhimizama wahuré na da te aima 're izata za'ra mono da hã danhoprubzéb zatazém nhisiwi, duré danhimizama dawasété parizéb da, da te aima 're izata za'ra mono hã.” Ãne hã ma tô tinha, Mozésihi nhimi'ui'éré na roti zahi inomro zarina si, danhoprubzé hã da te 're zata za'ra mono nherẽ. 9 Taha pari, Cristu hã ma tô duré Timama ma siwasu'u, ãne: “'Re ihâimana u'âsi mono, ãhãta wa ãme ĩhâiba, asima 're iwẽ mono zé hã te ãma aima uwaimrami da.” Ãne wa, 'Re ihâimana u'âsi mono hã ma tô uburé oto a'uprosi, danhoprubzé da te 're izata za'ra mono zé hã. Isõwa're're ma tô tisẽ, Cristu hã dazada idâ'âzép si. 10 Zezu Cristu hã 'Re ihâimana u'âsi mono te te sima iwẽzé te te 'manharĩ wa, taha na ma tô wawasété hawi te te 're wa'a'upsõ, isisõmrizém na. Misi haré ma tô uburé dazada 'manha, tihâiba na isõprubzém na.

11 Sasedoti norĩ hã awẽ sidâpâ te uburé tinhimiromhuri te te 're 'manharĩ za'ra. Danhimizama na 'Re ihâimana u'âsi mono ma, 're idanhoprub za'ra mono zé hã te ahâ uptabi na te te tãma 're zata za'ra, tô õhõ si. Tane nherẽ, taha na dawasédé hã te te dama 're pari waihu'u za'ra mono õ di. 12 Tazahã, Cristu hã misi haré ma tô sisõ, dâ'â da, dawasété pari'wa da, õne u'âsi pire na za dama 're ihâimana u'âsi mono da hã. Taha pari, ma tô oto nhamra, 'Re ihâimana u'âsi mono nhimire niwĩ. 13 Tame te Zezusi hã oto 're simipari, isitob'ru norĩ ipara nhimizusizéb zahâpâ 'Re ihâimana u'âsi mono te te isõrézéb u. 14 Ãne wa, danhoprubzém ne dazada idâ'âzém na misi haré tihâiba na sisõmri wa, ma tô dawasété hawi te te 're da'awaibu, 'Re ihâimana u'âsi mono te na aimawi oto 're dahâimana za'ra mono da.

15 'Re ihâimana u'âsi mono Pẽ'ẽzani zama te te duré wama 're awaihu'u ãne hã, wa te 're waihu'u za'ra mono da. Ãne ma tô imorĩ'rata na hã waihu'u:

17 Taha pari ma tô duré tinha, ãne:

18 Ãhã wa, 'Re ihâimana u'âsi mono, dawasédé te te oto da'ãma 're ab'madâ'â mono õ wa, marĩ dai õ di oto, danhimizama zata na danhoprubzé da te 're isõmri za'ra mono zé hã, dawasédé te te da'ãma 're ab'madâ'â mono tõ da hã.

19 Tahawa, ĩsisãnawã norĩ, Zezusi hã wedepo'o nhonhi'rãmi na idâ'âzéb u'âbâ, te rob'umnhasi uptabi hã wama 're hâimana za'ra, 'Ri're wa'wa Iwazé pese uptabi 'Re ihâimana u'âsi mono 're isãmra mono zéb u 're iwanhisisi mono zéb da hã.

20 Zazahâ ihâpa 'Re ihâimana u'âsi mono nhorõwa 'ri 'rãihâ ãma isa'o u'âbâ, tô tihâiba te te isõmrizéb u'âbâ, ma tô bâdâdi ité hã wama 'ridawa za'ra, dahâimana u'âsi zém nhomri'wa hã. 21 Sasedoti danhipai u ipire uptabi hã te wama 're hâimana za'ra, 'Re ihâimana u'âsi mono nhorõwa te te 're i'ab'madâ'â mono da hã, hâiwa ãma. 22 Tahawa, 'Re ihâimana u'âsi mono u wa za 'râwi wasina rotété za'ra ni, wapẽ'ẽ na sena na duré Wanhib'apito umnhasi sina. Wapẽ'ẽ 're wawasédé, Cristu tiwapru na te te wama 're apari mono wa, wa za ãne hã wa te 're 'manharĩ za'ra, wa te 're i'upa za'ra mono zé wi, te te 're wa'azani mono wa, duré wahâiba hã â uptabi na upsõ na wama 're hâimana za'ra mono wa. 23 Wa za duré wasima 'madâ'â wẽ za'ra ni, Wanhib'apito umnhasi sina wa te 're irob'mahârâ za'ra mono hã. E marĩ wa. 'Re ihâimana u'âsi mono hã umnhasi uptabi wa, tinhimiropisudu, za te te ãma i'a'uwaimrami da hã. 24 Wa za duré wa te wasi'ãma 're rosa'rata za'ra, uburé 're wasipawaptob za'ra mono da, wasisawi sina duré marĩ iwẽ hã wa te wasima 're 'manharĩ wẽ za'ra mono da. 25 Isazei'wa na wasiré 're iwasi'rã'õtõ mono zé hã wa te rẽme za'ra õ di za, ni'wam norĩ te te 're i'manharĩ za'ra mono ne hã. Tazahã, wa za 're wasipawaptob za'ra duréi nhipai u, ãhã na hã bâdâ te te oto sina irob'umhutu na 'madâ'â za'ra wa'aba wa.

26 E marĩ wa. Tô sena 'Re ihâimana u'âsi mono nhimiroti, wa te 're waihu'u pari za'ra mono nherẽ, wasihawim na wawasété na wa te ãma 're uzusi za'ra mono wamhã, marĩ hã hâimana õ di oto, sô 're wasiwasutu za'ra mono wa, wawasédé te te wama 're ipari za'ra mono da hã. 27 Tazahã, wapahi si te za oto wama 're hâimana za'ra, romhutu'õ za wama 're iromhâimana za'ra mono zéb zô 're wanhimipari za'ra mono sina. Wa za tô 're wapahi za'ra, Da'ãma rowairébézé za ihâimana ma hã duré uzâ ipipa 'Re ihâimana u'âsi mono zada 're ihâimana za'ra mono norĩ, za te te 're i'a'uprosi mono ma hã. 28 Ni'wa hã 'Re ihâimana u'âsi mono nhimiroti zahi na Mozési te te irob'ui'érézé te te 're ab'madâ'â pese mono õ wamhã, te za dama ipire norĩ hã tãma pisutu za'ra idâ'âzé hã, maparane niwamhã si'ubdatõ iwasu'u'wa norĩ nhimirowasu'u te te wapari za'ra parimhã, marĩ na te te i'upazém na ãma rowairébé hâimana wamhã. 29 Tawamhã bété e niha te za tiromhâiba, 'Re ihâimana u'âsi mono 'ra te te 're i'ruiwapari za'ra mono norĩ ma hã, duré 'Re ihâimana u'âsi mono Ti'ra wapru na ropisudu ité te te i'manharĩ hã marĩ dai õ na, te te 're i'madâ'â za'ra mono norĩ ma hã, te te ãma 're da'a'upsõi mono nherẽ. E niha te za duré tiromhâiba za, 'Re ihâimana u'âsi mono Pẽ'ẽzani te te 're i'ruiwapari za'ra mono norĩ ma hã, ta hã te te 're sawi pese za'ra mono nherẽ. Ma'ãpé ãma rosa'rata za'ra wa'aba, niha za iromhâimanazém na hã, rob'manharĩ pipa, za ãne 're ihâimana za'ra mono norĩ te te 're isépata za'ra mono na hã, Mozési te te irob'ui'érézém na roti zahi te te 're i'madâ'â pese za'ra mono õ norĩ, te te 're irobzépata za'ra mono zém nhipai u pese. 30 E marĩ wa. Wama waihu'u pese za'ra wa, ãne na inharĩ'wa hã: “Ĩwétési da'ruiwa'âbâ'wa hã. Wa hã wa za te dama ãma 're awa'rãmi, marĩ, da te 're i'manharĩ wasété za'ra mono wa'rãmi.” Te duré tinha, ãne: “Uburé Danhib'apito hã tinhib'a'uwẽ norĩ ãma te za te te 're arowairébé.” 31 Ipipa uptabi, ni'wa hã 'Re ihâimana u'âsi mono idâ'â'õ nhib'rata oto waptã'ã wamhã!

32 Ma'ãpé, ãma aipo're pu'u za'ra wa'aba, duréihã Cristu 're saze na'rata za'ra wa'aba mono wi hã. Taha bâtâ mono na hã, 'Re ihâimana u'âsi mono te rowa'a, aipẽ'ẽ 'reb za'ra wa'aba te te oto 're rowa'a mono wamhã, ma tô marĩ hã ahâ na 're isépata za'ra wa'aba mo. Tane nherẽ, ta hã te te ai'ãma ai'uté za'ra wa'aba õ di. 33 Nimahã na hã danho'a ma tô da te ai'ãma 're wasété za'ra wa'wa. Ma tô duré da te aima 're rob'manharĩ wasété za'ra wa'wa, danho'a. Duré nimahã na ma tô aré asima 're iwẽ za'ra wa'aba mo, isu 're robzépata za'ra wa'aba mono da, da te tãma 're irob'manharĩ wasété za'ra mono norĩ zu. 34 Dazazéb 're, 're isimasa mono norĩ zu, ma tô 're irobzépata za'ra wa'aba mo. Duré uburé marĩ aima 're ihâimana za'ra wa'aba mono hã, da te aiwi 're waibui wa'aba mono wamhã, ma tô ato sina 're i'wapé za'ra wa'aba mo. E marĩ wa. Taha nhipai u marĩ iwẽ uptabi hã aima 're hâimana za'ra wa'aba mono wa, õne u'âsi za aima 're ihâimana za'ra wa'aba mono hã, si'utõrĩ ãna. 35 Tahawa, ma'ãpé rẽme za'ra wa'aba tõ, rob'umnhasi sina 're i'aihâimana za'ra wa'aba mono zé hã. Ta hã te za te te aima 're ãwisi za'ra wa'wa, aipawa'â isa'ẽtẽ uptabi hã. 36 Marĩ hã te za 're i'wapéi hâ za'ra wa'aba mo, 'Re ihâimana u'âsi mono te te sima 're iwẽ mono zé hã 're 'manharĩ za'ra wa'aba mono pari, 're waibui wa'aba mono da, te te ãma iropisutuzé hã. 37 E marĩ wa. Ibaihâ Iwazé pese na rob'ui'éré hã nomro wa, ãne:

39 Tane nherẽ, wa norĩ hã apâ 're iwasipizari za'ra mono õ, duré 're iwasisimini za'ra mono õ. Tazahã, Wanhib'apito umnha hã te wama 're hâimana za'ra. Duré wanho'reptuzé hã wa tô wasina uwaimrami za'ra ni.