Romhâ 'manharĩ na 'ri ité
9
Imorĩ'rata na 'Re ihâimana u'âsi mono te te iropisutu zahi zém na hã, te roti ãma tihâiba, ãma 're dawata za'ra mono da, duré 're dazâmorĩ mono ré romhâ 'manharĩ na 'ri hã da te 're sõré mono da, ãma 're idawata za'ra mono zéb da hã. 2 Tawamhã Romhâ 'manharĩ na 'Ri hã ma tô dasiwi sãrĩ ni, maparane 'ri're wa'wa na. Imorĩ'rata na 'ri're wa'wa wamri hã, 'Ri're wa'wa Iwazé pese na. Taha 'remhã te 're sima'wara zahuré rob'uiwẽzé hã, duré meza zama i'u'ẽtẽ wapu ré hã 'Re ihâimana u'âsi mono ma, ãma 're idanhoprub za'ra mono zéb ré hã. 3 Zazahâ ihâpa isãna're ihâimana ãma hã te 're hâimana, ãne iwamri hã 'Ri're wa'wa Iwazé pese uptabi na. 4 Taha 're, te wedewa'u zadaze zatazé hã 're sa, imana wawip si ẽtẽ waipo pré oru 'manharĩ na i'manharĩ hã. Duré taha 're, te 're sa wedehâ're arca na isisi hã, 'Re ihâimana u'âsi mono tinhib'a'uwẽ norĩ ma te te iropisutuzé te te iwasu'u hã uburé imana wawi ẽtẽ waipo pré oru 'manharĩ na i'manharĩ hã. Wedehâ're arca 'remhã, te 're sa, piza hã ẽtẽ waipo pré oru 'manharĩ dasa mana na isisi ré hã, duré Arãhã siwazusizé, ãma i'wanhipré hã, duré maparane ẽtẽ baihâ zama 'Re ihâimana u'âsi mono nhimiroti zahi na ãma rob'ui'éré ré hã. 5 Wedehâ're arca nhisiwimhã te 're sima'wara zahuré, ropodo querubĩ na isisi hã papo haré, 'Re ihâimana u'âsi mono 're isãmra mono zé te te iwasu'u zahuré hã. Ta norĩ hã tizaripi na te te 're upsibi zahuré, wedehâ're arca nhitobzé hã, 'Re ihâimana u'âsi mono, dawasédé te te da'ãma 're i'ab'madâ'â mono õ zém nhisiwi. Tane nherẽ, ã hã bâdâ ihâimana hã wa te ãma irowasu'u pese za'ra zéb da hã, sadai õ di.6 Ãne hã uburé da te 're robza'ra pese za'ra mono parimhã, sasedoti norĩ hã te 're sisisi bâtâ sidâpâ, Romhâ 'manharĩ na 'ri're wa'wa imorĩ'rata na 're ihâimana mono u, tinhimiromhuri hã te te ãma 're uwaimrami za'ra mono da, 'Ri're wa'wa Iwazé pese 're. 7 Tane nherẽ, sasedoti tisiré nhipai u ipire uptabi si te 're zasi, 'ri're wa'wa ihâiba amoi u hã, 'Ri're wa'wa Iwazé pese uptabi u. Tawamhã wahup sidâpâ si te misi haré 're zasi, 'Re ihâimana u'âsi mono ma 're sõpru mono da, danhimizama na, si'ãma duré uburé dawasété da zama, dasisa'rese ãna 're idawasété za'ra mono da. 8 Ãne wamhã, 'Re ihâimana u'âsi mono Pẽ'ẽzani te te wama 're awaihu'u sõ'awi, 'Ri're wa'wa Iwazé pese uptabi u 're idanhisisi mono zé hã, zahadu 'ridawa nhitom na 're isa mono na hã, imorĩ'rata na 'Ri're wa'wa Iwazé pe zahadu 're sa mono ré hã. 9 Ã hã romnhimiré'ézé, ã bâtâ mono na marĩ mono hã wa te ãma iwaihu'u za'ra zéb da hã. Te te iwasu'u hã, danhoprubzé duré danhimizama 'Re ihâimana u'âsi mono ma, da te 're izata za'ra mono zé hã, ãma 're iwata za'ra mono norĩ hã ipẽ'ẽ 'remhã te te 're pese waihu'u za'ra mono õ di. 10 Ã norĩ danhoprubzé hã duré danhimizama da te 're izata za'ra mono zé hã, tô dasa duré da te 're i'âhuri mono zé duré sipu'u pese na 're idasihâiba upsõi pese za'ra mono zé. Ã norĩ hã romhâimanazé tô pire na te za 're hâimana za'ra, 'Re ihâimana u'âsi mono uburé marĩ te te i'ahâtébzéb u.
11 Tane nherẽ, Cristu hã ma tô wei mo Sasedoti danhipai u Ipire uptabi na, marĩ iwẽ, ãme 're ihâimana siromo za'ra mono te na 're hâimana mono da. Romhâ 'manharĩ na 'Ri, iwa te te da'ãma 're iromhuri mono zé hã danhipai u iwẽ uptabi, duré marĩ iwasédé ãma ihâimana õ. Duré ta hã ti'ai ãma a'uwẽ norĩ te te siwi i'ri nharĩ õ di, ta hã tô, ã hã ti'ai ãmab õ di. 12 Cristu hã wei morĩ wamhã, duré misi haré 'Ri're wa'wa Iwazé pese uptabi u sébré wamhã, siré te te âri õ di, pone'ẽrebâ zéré uzé wapru hã niwamhã powawẽ zapu wapru hã ãma sõprub da. Tazahã, tiwaprui ré si ma tô ãzé. Taha na ma tô wama âri za'ra, danho'reptuzé isi'utõrĩ'õ hã. 13 Pone'ẽrebâ zéré uzé wapru hã duré powawẽ iba'õmo wapru hã duré powawẽ zapu zatazé 'ru'a hã, 're isihâiba wamnarĩ za'ra mono norĩ nhisiwi da te 're sa'wari za'ra mono wamhã, ta norĩ hã te ihâiba mana wawib si 're hâiba pese za'ra. 14 Tazahã, Cristuhu wapru hã te wanhimirosa'rada te te wama 're a'upsõ, wasété na 're ihâimana za'ra mono hã, wahâimanazé wadâ'â u te te 're wanhimroi mono wa, isiti tiwi 're wawairébé mono da oto, ãne zarina, 'Re ihâimana u'âsi mono idâ'â'õ ma, wa te tãma 're romhuri za'ra mono da. E marĩ wa. Tô Cristu hã sisõmri wa, danhoprubzé iwasété õ iwẽ uptabi na 'Re ihâimana u'âsi mono ma, 'Re ihâimana u'âsi mono Pẽ'ẽzani isi'utõrĩ'õ nhimiromhuri zarina.
'Re ihâimana u'âsi mono te te iropisutuzép té
15 Tahawa, Cristuhu si te te da'ãma 're romhuri waihu'u pese uptabi mono di, ropisutu zahi ité te te sina 're uwaimrami mono da, 'Re ihâimana u'âsi mono sima sô 're ihârâ za'ra mono norĩ hã, iwẽ isi'utõrĩ'õ te te 're waibui mono da, te te ãma tãma 're i'aropisutu mono hã. Ãne hã te za tô te te 're 'manharĩ. E marĩ wa. Cristu hã dazada idâ'âzém na te te 're da'awa'âbâ mono wa, duré dawasété hawi te te 're da'azani mono wa, ropisutu zahi i'rata na 're dahâimana za'ra mono ré, 're idawasété za'ra mono zém hawi.
16 Ni'wa hã isibrom na i'uirĩ na da te dasima po'o mono da, rob'ui'éré te te ãma hiri wamhã, tô i'ru zahi, idâ'âzé sena na da te iwaihu'u da hã. 17 E marĩ wa. Tinhibrom na roti te te ihiri hã, dâ'â õ ré hã, marĩ dai õ di. Dâ'â za'u si te za pire na 're hâimana, isibro i'uirĩ na da te dasima po'o mono da, roti te te ihirizé hã. 18 Tahawa, imorĩ'rata na ropisutu zahi ihâimana hã abazei wapru na si ma tô da te ãma 're uwaimrami za'ra. 19 Duréihã Mozési hã uburé 'Re ihâimana u'âsi mono nhimiroti zahi te te dama 'mahârâ parimhã, powawẽ zapu wapru hã duré pone'ẽrebâ zéré uzé wapru zama, ma tô â na waza. Taha pari pone'ẽrebâ zéré mapu zéré 'manharĩ, da te ihâpré na wedewaré hisopo na isisi 'rãsutu na da te iwasisi na ma tô õ norĩ wapru na ãma saza, 'Re ihâimana u'âsi mono nhimiroti zahi na Ibaihâ Iwazé pese na rob'ui'éré hã duré uburé a'uwẽ norĩ zama. 20 Tawamhã Mozési hã ma tô dama roti, ãne: “Ã hã danhimizama wapru hã, ropisutu zahi 'Re ihâimana u'âsi mono te te aima i'ru za'ra wa'wa, 're 'madâ'â pese za'ra wa'aba mono da.” 21 Tawamhã Mozési hã tô õne ma tô duré 'manha. Romhâ 'manharĩ na 'ri hã ma tô saza danhimizama wapru na, duré uburé marĩ 'Re ihâimana u'âsi mono ãma 're idawata za'ra mono zéb ãma 're isimasa mono norĩ zama. 22 Tane tô. 'Re ihâimana u'âsi mono nhimiroti zahi na rob'ui'éré ihâimana zarina te uburé aré marĩ danhimizama wapru na da te 're pese za'ra, wẽ na 're hâimana za'ra mono da. Dawapru pu hã hâimana õ nherẽ, dawasété parizé hã hâimana õ di duré.
Cristu hã isisõmrizém na dawasédé te te dama 're apari
23 Tahawa, ã norĩ hã marĩ hâiwa ãma 're ihâimana za'ra mono awã hã, i'ru zahi aré tô õne na da te 're ipese za'ra mono da hã, wẽ na 're hâimana za'ra mono da. Tane nherẽ, hâiwa ãma marĩ 're ihâimana za'ra mono pese zé hã tô i'ru zahi tidâ'âzém na danhipai u iwẽ uptabi si te te 're i'apese mono da hã. 24 Ãhã wa, Cristu hã sébré õ di, ti'ai ãma danhib'rata na da te dasiwi i'ri u hã, ta hã sena uptabi 'ri 're ihâimana mono awã u hã. Hâiwa u si ma tô ãzé, 'Re ihâimana u'âsi mono nho're te te wa'ãma 're romhuri za'ra mono da. 25 Sasedoti tisiré nhipai u ipire hã te 're zasi wahum nhidâpâ, 'Ri're wa'wa Iwazé pese uptabi u. Ta hã te te siré 're 'mazasi, danhimizama wapru hã. Tazahã, Cristu hã sébré zahu õ di, sisõmri ahâ da hã. 26 Ãne 'wa'âhã, te aré nasi robzépata ahâ, ãma isahu ahâ na, ropoto na'rata hawim haré. Tazahã, misi haré ma tô oto sihâi'ré, rob'rãsutu u ro'rutu wa oto, te te irobzépatazém na dawasédé te te 're apari mono da. 27 Dahâiba mono bâ te za misi haré 're dadâ'â za'ra. Taha parip si, te za 'Re ihâimana u'âsi mono hã te te da'ãma 're arowairébé. 28 Tane 'Re ihâimana u'âsi mono hã ma tô Cristu hâiba nho, misi haré dazada dâ'â da, dawasédé hã da'ahâ na te te dama 're apari mono da. Taha parimhã, maparane ãma te za we duré sihâi'ré za, mare di, dawasédé te te dama apari da hã, tazahã te te anho'reptu da si, sô 're isimipari za'ra mono norĩ hã.