Zezusi hã Sasedoti danhipai u Ipire, ropisutuzép téb ãma hã
8
Danhipai u marĩ ipire na, wa te aima irowasu'u za'ra wa'wa hã, Sasedoti wama 're ihâimana za'ra mono na, wa aima rowasu'u za'ra wa'aba ni: Ta hã Sasedoti danhipai u Ipire uptabi, hâiwa ãma 're isãmra mono, 'Re ihâimana u'âsi mono Apito simasisizém na 're isãmra mono nhimire niwĩ, Iwaihu'u pese uptabi nhimire niwĩ. 2 Ta hã te tinhimiromhuri te te 're 'manharĩ, 'Ri're wa'wa Iwazé pese uptabi 'remhã, Tô sena Uptabi Romhâ 'manharĩ na 'ri, 're ihâimana mono ãma. Ta hã Uburé Danhib'apito te te i'ri nharĩ. Mare di, ti'ai ãma a'uwẽ norĩ te te siwi i'ri nharĩ hã.3 Uburé sasedoti ipire na 're ihâimana za'ra mono hã, 'Re ihâimana u'âsi mono te te 're i'apisutu mono, danhoprubzé te te tãma 're sõmri za'ra mono da, duré danhimizama te te tãma 're zata za'ra mono da zama. Tahawa tô i'ru zahi, wate za'ra Sasedoti danhipai u Ipire uptabi hã danhoprubzém ne marĩ na wa'ãma 're isõpru mono da hã, 'Re ihâimana u'âsi mono ma. 4 Zezusi hã ti'ai ãma 're hâimana mono 'wa'âhã, sasedoti na aré 're hâimana mono õ di. E marĩ wa. Sasedoti norĩ ti'ai ãma hã ahâ na 're hâimana za'ra mono wa, Mozésihi nhimi'ui'éré na 'Re ihâimana u'âsi mono nhimiroti zahi ihâimana zarina. 5 Ti'ai ãma sasedoti norĩ romhuri te te 're i'manharĩ za'ra mono hã, ta hã hâiwa ãma 're iromhâimana mono zé awã. Ãne ma tô tiromhâiba, 'Re ihâimana u'âsi mono, Mozésihi ma te te waihu'u wamhã. Mozési hã Romhâ 'manharĩ na 'Ri te te i'ri nharĩzéb u hã, 'Re ihâimana u'âsi mono, ma tô tãma tinha, ãne: “Ma'ãpé ãma pibui pese, 'ri nharĩ da, ẽtẽ 'rãihâ ãma te aima ihâi'rézéb zarina si.” 6 Tane nherẽ, 'Re ihâimana u'âsi mono, ma tô Zezusi hã pisutu, sasedoti norĩ nhimiromhuri na 're hâimana mono da, ta norĩ te te 're iromhuri za'ra mono zém nhipai u, ipire uptabi na hã. E marĩ wa. Ropisutu zahi te te sina iwazere hã wẽ uptabi wa, ropisutu zahi i'rada ihâimana nhipai u, ropisutu zahi itém na ropisudu marĩ iwẽ uptabi si ãma 're hâimana za'ra mono wa.
7 E marĩ wa. Imorĩ'rada ropisutu zahi, wẽ uptabi 'wa'âhã, ropisutu zahi ité hã aré hâimana õ di, i'ru zahi na. 8 Tane nherẽ, 'Re ihâimana u'âsi mono hã ma tô 'madâ, isib'a'uwẽ norĩ te te 're i'upa za'ra mono na. Tahawa ma tô ãne tinha:
“Ãne ma tô tinha, Uburé Danhib'apito hã. Bâdâ te za oto iwa waptãrã, ropisutu zahi ité te i'manharĩ da hã, Izaraéu nhihudu norĩ ma, Zudaha nhihudu norĩ ma zama.
9 Ã hã ropisutu zahi za ihâimana hã, ihi'rata norĩ ma, te iropisutu nei õ di za, Ezitu hawi te sani za'ra da, te pawaibui wamhã. Tane nherẽ, ropisutu zahi te tãma i'manharĩ za'ra zéb zarina, 're hâimana u'âsi za'ra mono õ di. Tahawa, wa tô tiwi aipi'ra za'ra.
10 Uburé Danhib'apito te duré tinha, ãne:
Ta hã bâdâ iwa waptã'ã wamhã, Izaraéu nhihudu norĩ ma, wa za ropisutu zahi hã 'manha, ãne:
Ĩnhimiroti zahi hã isimirosa'rata 're, wa za tãma sé. Duré ipẽ'ẽ 're, wa za ãma rob'ui'éré za'ra. Tawamhã ite za'ra 'Re ihâimana u'âsi mono na, wa za tãma 're ĩhâimana za'ra. Duré ĩnhib'a'uwẽ na te za ĩma 're hâimana za'ra.
11 Tawamhã ni'wa hã tisiré ma duré tisisãnawãi ma, te te oto rowahutu dai õ di, ãne: ‘Ma'ãpé waihu'u, Uburé Danhib'apito hã.’ E marĩ wa. Uburé za te te 're ĩwaihu'u za'ra mono wa, dama iwapu hawi duré dama ipire mono bâ.
12 Iwasédé te oto ãma 're ab'madâ'â mono õ di za. Duré marĩ iwasédé te te 're i'manharĩ za'ra mono zém na, oto ãma 're ĩsipo're pu'u mono õ di za.”
13 'Re ihâimana u'âsi mono hã ã hã ropisudu, itém na te te sisi wamhã, te te iropisutuzéb 'rada hã marĩ dai õ di oto. Tawamhã marĩ i'ratare na oto ihâimana hã, duré oto isiwamnarĩ hã romhutu na te za aimani za.