4 Ma'ãpé ãma rosa'rata za'ra wa'aba, Méuquizédéqui danhipai u ipire na hã: Abra'ã duréihã wahi'rata norĩ nhib'ihâ'a hã ma tô tinhoprubzé tãma sõmri za'ra. Marĩ 10 na hâimana za'ra wamhã, ma tô misisi te te tãma anhomri, dasi'wapéi wa, tinhitob'ru norĩ wi uburé te te i'awaibuzém hawimhã. 5 Mozésihi nhimi'ui'éré na 'Re ihâimana u'âsi mono nhimiroti zahi inomro zarina, sasedoti Levihi nhihudu norĩ 're ihâimana za'ra mono ma i'ru zahi, danhoprubzé te te 're iwaibui mono da hã, tô tisiré norĩ wi, uburé marĩ 10 na hâimana za'ra wamhã, misisi da te tãma 're ipo'o za'ra mono da, ta norĩ hã Abra'ãhã nhihudu na 're hâimana za'ra mono nherẽ. 6 Méuquizédéqui hã Levihi nhihudu õ di. Tane nherẽ, Abra'ãhã nhoprubzé ma tô waibu, dasi'wapéi wa, tinhitob'ru norĩ wi te te i'awaibui hawimhã marĩ 10 na hâimana za'ra wamhã, misisi te te tãma ipo'o mono hã. Tawamhã 'Re ihâimana u'âsi mono wi ma tô ãma rowaptẽ, iwẽ hã Abra'ãhã ma te te pisutu da, tô 'Re ihâimana u'âsi mono ropisudu ahâ na te te tãma i'manharĩ ma hã. 7 Ãne hã waihu'u pese uptabi di, ni'wa iwẽ te te dama ipisudu danhipai u ipire uptabi na hã, iwẽ hã da te tãma ipisutu nhipai u. 8 Sasedoti norĩ hâimanazém na hã, danhoprubzé 10 na marĩ ihâimana za'ra, ãma 're danhoprub za'ra mono da, misisi da te 're ipo'o za'ra mono hã te za te te 're waibu, ta norĩ hã niwa za 're dâ'â za'ra mono da nherẽ. Tane õ di, Méuquizédéqui hã, hâiba ré 're ihâimana u'âsi mono. Ibaihâ Iwazé pese na rob'ui'éré inomro zarina, ma tô Abra'ãhã nhoprubzé hã waibu, marĩ 10 na hâimana za'ra wamhã, misisi te te ipo'o mono hã ãma sõprub da. 9 Tahawa, Abra'ã hã tinhoprubzé te te ipo'o mono hã te te sõmri wamhã, Levi hã (isihudu norĩ danhoprubzé da te 're ipo'o za'ra mono marĩ 10 na hâimana za'ra wamhã, misisi da te 're ipo'o za'ra mono, te te 're iwaibui mono hã) taha zama ma tô sõmri za'ra, Abra'ãhã hâiba na. 10 E marĩ wa. Méuquizédéqui hã Abra'ã te te sõpẽtẽ wamhã, Levi hã zahadu poto õ di. Tane nherẽ, ma tô tihâiba, tihi'rada Abra'ãhã hâiba 're.

11 Izaraéu nhihudu norĩ ma roti zahi 're ihâimana za'ra mono hã, ta hã Levihi nhihudu norĩ sasedoti na te te 're iromhuri za'ra mono zém hawi, te 're hâimana za'ra. Levihi nhihudu norĩ sasedoti na 're ihâimana za'ra mono hã romhuri na te te 're uwaimrami wẽ za'ra mono 'wa'âhã, aré sadai õ di, aimawi sasedoti Méuquizédéqui 're ihâimana mono zém hawi i'masihâi'ré da hã, mare di, Arã hã sasedoti na te te 're iromhuri mono zém hawimhã. 12 E marĩ wa. Sasedoti na romhuri hã sisaprĩ wamhã, roti zahi zama aré i'ru zahi isisaprĩ da hã. 13 Wanhib'apito Zezusi hã, taha wasu'u na wa ãma rowasu'u za'ra ni, ãhã na hã. Ta hã Levihi nhihudu na 're hâimana mono õ di. Izaraéu 'ra hâiba amo nhihudu na te 're hâimana. Niwamhã ihi'rata nhihudu hã 'maihâimana õ di, sasedoti na hã. 14 Wanhib'apito Zezusi, Zudaha nhihudu na 're ihâimana mono na hã dama waihu'u pese di. Taha nhihudu hã Mozési te te 'maiwasu'u õ di, sasedoti na 're i'maihâimana mono na hã.

15 Ãne norĩ wasu'u hã sõ'awi uptabi te oto tihâiba. E marĩ wa. Poto wa oto sasedoti dasinei õ hã, Méuquizédéquihi ne 're ihâimana mono hã. 16 Ta hã ti'ai ãma dahâimanazém na roti zahi zarina, sisasedoti õ di. Tazahã, ihâimanazé 'rãsutu waihu'u ãna siptete uptabi na 're ihâimana mono zéb zarina si ma tô sisasedoti. 17 E marĩ wa. Ibaihâ Iwazé pese na rob'ui'éré hã nomro wa, ãne:

18 Ãne wa, ma tô Mozésihi nhimi'ui'éré na roti zahi i'rada hã taré oto 're hâimana, sib'uware wa, duré marĩ dai õ wa. 19 E marĩ wa. Mozésihi nhimi'ui'éré na roti zahi hã marĩ iwẽ iwasété õ uptabi u hã, te te ãma saprĩ waihu'u õ wa. Tane nherẽ, ãhã na hã 'Re ihâimana u'âsi mono ma tô taha nhipai u iwẽ uptabi hã wama sõmri za'ra, rob'umnhasi sina 're iwanhimipari za'ra mono zé hã, taha na 'râwi itẽme wa te wasina 're rotété u'âsi za'ra mono da.

20 Taha siré hã, 'Re ihâimana u'âsi mono te, ropisutu zahi hã te tihâiba. Ropisutu zahi hã 're hâimana mono õ di, Zezusihi wana aimawi norĩ 're sisasedoti za'ra mono wamhã. 21 Tazahã, Zezusi oto sisasedoti ipire uptabi wamhã, 'Re ihâimana u'âsi mono hã ma tô ropisutu zahi hã 'manha, ãne:

22 Tahawa, Zezusi hã te oto 're hâimana, 'Re ihâimana u'âsi mono te te dama iropisutuzép té ipire uptabi na.

23 Duréihã sasedoti norĩ hã te ahâ uptabi na 're hâimana za'ra, dadâ hã te te tiwi 're 'rãtõ za'ra mono wa, tinhimiromhuri te te ãma 're i'uzusi za'ra mono da hã. 24 Tazahã, Zezusi hã te oto õne u'âsi 're hâimana. Tahawa, te õhõ si sasedoti na 're hâimana u'âsi. 25 Tahawa, ni'wam norĩ hã te te 're anho'reptui waihu'u pese mono di, ãhã na hã duré õne u'âsi, 'Re ihâimana u'âsi mono u, isimi'manharĩzéb u'âbâ 're inomro mono norĩ hã. E marĩ wa. Zezusi hã te õne u'âsi 're hâimana, 'Re ihâimana u'âsi mono wi, te te da'ãma 're rowaptẽrẽ mono da.

26 Tahawa, Zezusi hã Sasedoti Ipire uptabi, sô 're iwanhimnhasi za'ra mono, te 're hâimana. Ta hã i'uwaibaba na si te 're hâimana. Duré iwasédé ãma hâimana waihu'u õ di. Duré marĩ te te i'upazé hã ãma hâimana õ di. Iwasété norĩ nhiti aimawi 're hâimana mono da, ma tô Imama hã pisutu. Ma tô duré apâ ti'â, hâiwa nhipai u. 27 Ta hã aimawi norĩ sasedoti ipire norĩ ne hã 're hâimana mono õ di. 'Re simnhasi mono õ di, bâtâ sidâpâ danhimizama zata na 're isõpru mono da hã, tiwasété da, duré taha pari, dawasété da zama. Ta hã ma tô misi haré sisõ, danhimizama zata na danhoprubzém ne, uburé dazada, sihâiba nhomri wamhã. 28 'Re ihâimana u'âsi mono nhimiroti zahi na Mozésihi nhimi'ui'éré hã ma tô te te 're da'apisutu, sasedoti ipire na 're dahâimana za'ra mono da, dawasété nherẽ. Tazahã, ropisutu zahi 'Re ihâimana u'âsi mono te te i'manharĩ na ma tô Ti'ra hã pisutu, wẽ uptabi na õne u'âsi 're hâimana mono da. Ta hã Mozésihi nhimiroti zahi za'u si ma tô tihâiba.