4 E niha te za ni'wam norĩ te te 're sazei utõrĩ za'ra mono nherẽ, apâ 'Re ihâimana u'âsi mono ma 're siwẽ'õ zahu za'ra. Ta norĩ hã ma tô aré 're hâimana za'ra, 'Re ihâimana u'âsi mono te rowa'a ãma. Ma tô duré aré pibu za'ra, hâiwa hawi 'Re ihâimana u'âsi mono nhoprubzé iwẽ uptabi hã. Duré 'Re ihâimana u'âsi mono Pẽ'ẽzani dama 're isõpru mono zém na ma tô aré dasiré 're hâimana za'ra. 5 Ma tô duré aré pibu za'ra, 'Re ihâimana u'âsi mono mreme iwẽ uptabi na hã. Duré 'Re ihâimana u'âsi mono waihu'u pese uptabi, romhutu'õ za 're iromhâimana mono zéb ãma za te te dama 're i'ahâi'ré mono zé hã ma tô aré pibu za'ra, we 're iromhâimana mono zéb 'remhã. 6 Tane nherẽ, te te pibu za'ra pari, ma tô sazei utõrĩ za'ra. Ãne wa, waihu'u õ uptabi di, ã norĩ hã apâ wa te 're i'ãwisi za'ra mono da hã, 'Re ihâimana u'âsi mono ma, 're siwẽ'õ zahu za'ra mono da. E marĩ wa. Ãne wamhã, 'Re ihâimana u'âsi mono 'ra, apâ te te siwi isasõmri zahu ne hã, wedepo'o nhonhi'rãmi na, danho'a duré ãma 're wa'ẽ za'ra mono wa.

7 'Re ihâimana u'âsi mono, iwẽ hã te te 're pisutu ti'ai ma, tã hã isisiwi 're ita'a u'âsi mono ma. Ta hã te amnho iwẽ hã te te 're azani, te te iwa 're irobzuri mono norĩ ma. 8 Tazahã, ti'a 'wabzéré duré warõtõ zama te te 're i'atébré mono hã, marĩ dai õ di. Tahawa, taha ma hã romnhimimnhasi di, 'Re ihâimana u'âsi mono iwasédé te te tãma pisutu õ'umnhasite. Taha ãma hã te za tô ãma sazu ni, sihõmo mono da.

9 Ĩsisãnawã norĩ, ĩma i'asawi pese za'ra wa'aba norĩ, ãne na wa te aima rowasu'u za'ra wa'aba nherẽ, ĩma aiwaihu'u pese za'ra wa'aba di tô, iwẽ hã 'Re ihâimana u'âsi mono te te aima ipisutu za'ra wa'aba na hã, danho'reptuzé asina uwaimrami za'ra wa'aba wa. 10 'Re ihâimana u'âsi mono hã i'uwaibaba si marĩ te te 're ab'manharĩ. Tahawa, ãma po're si'âri dai õ di, romhuri, 're i'manharĩ za'ra wa'aba mono na hã, duré asimizawizé tãma ihâi'ré za'ra wa'aba na 're idapawaptob za'ra wa'aba mono zém na, duré ãhã na zama asiré isazei'wa norĩ 're ipawaptob za'ra wa'aba mono na zama. 11 Wama iwẽ uptabi za'ra hã, aihâiba mono bâ ato sina ãma 're uzusi u'âsi za'ra wa'aba mono da rob'rãsutu u, rob'umnhasi sina marĩ iwẽ zô 're i'asimipari za'ra wa'aba mono zéb zarina tô waibui wa'aba da, asô isimi'wara 'wa hã. 12 Wama wẽ za'ra õ di, aiwa'a na oto 're i'aihâimana za'ra wa'aba mono da hã. Tazahã, isazei'wa norĩ ne, duré simi'ẽi hâ na 're ihâimana za'ra mono norĩ ne, 're i'aihâimana za'ra wa'aba mono da si, taha zarina, waibui wa'aba da, 'Re ihâimana u'âsi mono te te ãma iropisutuzé hã.

13 'Re ihâimana u'âsi mono, Abra'ãhã ma te te ropisutu wamhã, tinhisi na ma tô ropisutu zahi hã 'manha, ni'wa hã isipai u ipire hã hâimana õ wa. 14 Ãne ma tô Abra'ãhã ma ropisutu: “Iwẽ hã wa za tô aima pisutu. Asihudu norĩ hã wa za duré aima sõmri za'ra, ahâ uptabi na.” 15 Abra'ã hã ma tô simi'ẽ na sô 're simipari, 'Re ihâimana u'âsi mono te te tãma iropisutuzéb zô. Tahawa, ma tô oto sina uwaimra. 16 Ni'wa hã ropisutu zahi te te 'manharĩ wamhã, ni'wa nhisi isipai u ipire ihâimana na, te za 'manha. Ãne wamhã, ropisutu zahi hã te za 'rãtõ, dasiwasu hã. 17 Tane duré, 'Re ihâimana u'âsi mono hã ma tô sima wẽ, te te iropisutuzé za te te 're iwaibui mono norĩ hã te te 're waihu'u wẽ za'ra mono da, niwa za te te ãma isaprĩ õ na hã, te te iropisutuzém na. Tahawa, te te iropisutuzéb ré, ma tô 'manha, ropisutu zahi hã. 18 'Re ihâimana u'âsi mono isadawa nhipese da hã waihu'u õ uptabi di. Tahawa, maparane marĩ hã niwa sisaprĩ waihu'u zahuré õ di. Ãne wa, 're wasima'uri za'ra mono da, itẽme 're iwanhisisi mono hã, wa wa te 're sõpẽtẽ za'ra, wanhiptete na ãma 're iwahâimana za'ra mono zé hã. Wa za duré wa te 're tété tete za'ra, rob'umnhasi sina marĩ iwẽ zô 're iwanhimipari za'ra mono zé hã, 'Re ihâimana u'âsi mono te te wama isõmri za'ra hã. 19 Ã hã rob'umnhasi sina marĩ iwẽ zô 're iwanhimipari za'ra mono zé hã wahâimanazé siptete na te te duré wama 're upari za'ra, uba're tétézé âi ba, da te mei wa, za uba're te te itété ne. Ta hã te za ro'razâ, zazahâ ihâpa 'Re ihâimana u'âsi mono nhorõwa 'ri 'rãihâ ãma isa'o na hâiwa ãma. Te za duré ãzé, 'ri're wa'wa Iwazé pese uptabi u, hâiwa ãma 'Re ihâimana u'âsi mono 're isãmra mono zéb u. 20 Tamomo Zezusi hã ma tô wanhowab za'ra ãzé, wa'udâna za'ra. Ta hã te oto Sasedoti danhipai u Ipire uptabi na 're hâimana u'âsi, Méuquizédéqui sasedoti na 're ihâimana mono ne.