5
Sasedotia tisiré norĩ nhipai u ipire mono bâ, 'Re ihâimana u'âsi mono hã te te 're apisutu, ti'ai ãma dawazari 're ihâimana za'ra mono hã. Te duré ipisudu hã 're hâimana za'ra, 'Re ihâimana u'âsi mono ma, te te da'ãma 're romhuri za'ra mono da, danhoprubzé hã 'Re ihâimana u'âsi mono ma, te te 're sõmri za'ra mono da, duré danhimizama te te tãma 're zata za'ra mono da zama, dawasété parizéb da. 2 Sasedoti norĩ hã hâimana nhib'uware na te 're hâimana za'ra. Tahawa, tãma waihu'u pese za'ra di, simi'ẽi hâ na tiwasété na 'râwi 're isisãmri waihu'u za'ra mono õ norĩ ma, 're ihâimana za'ra mono da hã, duré tiwasété zarina sina 're ipahâ za'ra mono norĩ ma hã. 3 Duré sasedoti norĩ zama sib'uware di. Tahawa te ta norĩ zama 're simnhasi za'ra, danhimizama zata na 'Re ihâimana u'âsi mono ma 're sõprub za'ra mono da, mare di dawasété u'âbâp si hã, tazahã duré 'râwi tiwasété udâna zama. 4 Ni'wa hã 'râwi sipisutu waihu'u õ di, wazé pese na Sasedoti danhipai u ipire na 're ihâimana mono da hã. 'Re ihâimana u'âsi mono si te te 're da'apisutu, te te sima 're ida'awẽ mono zéb uwaibaba, Sasedoti ipire na 're dahâimana za'ra mono da hã, Arãhã ma iromhâimana ne.5 Tane duré, Cristu hã 'râwi sipisutu õ di, wazé pese na Sasedoti ipire uptabi na 're hâimana mono da hã. 'Re ihâimana u'âsi mono si ma tô tãma pisutu, wazé pese na pire uptabi na 're ihâimana mono zé hã. Ma tô tãma tinha, ãne:
“A hã ĩ'ra. Ã bâtâ na hã Aimama na wa oto ĩhâiba.”
6 Te duré tinha, nimame Ibaihâ Iwazé pese na rob'ui'éré na hã, ãne:
“A hã sasedoti na te za 're aihâimana u'âsi mo, Méuquizédéqui hã sasedoti na 're ihâimana mono zéb zarina.”
7 Zezusi hã ti'ai ãma 're morĩ ré hã, ma tô Timama wi rowaptẽ, mreme 'rãihâ na itõmo'u tiwi pu'u sina, te te pawaptob da. Ta hã te te aré sõ'reptui waihu'u pese di, dâ'â tõ da. Tawamhã isimirowaptẽrẽ hã Imama ma tô wapa, isipai'u 're si'madâ'â mono õ wa, duré te te 're wazé pese mono wa. 8 Zezusi hã tô 'Re ihâimana u'âsi mono 'ra nherẽ, ma tô waihu'u, Timama nhimiroti te te 'madâ'â pese da, te te irobzépata u'âbâmhã. 9 Tawamhã Zezusi hã Timama ma, te te ãma uwaimrami parimhã, te oto 're hâimana, danho'reptuzé isi'utõrĩ'õ nhana'rata na, isimiroti te te 're i'madâ'â pese za'ra mono norĩ ma hã. 10 Tahawa duré, 'Re ihâimana u'âsi mono hã ma tô pisutu, Sasedoti danhipai u ipire uptabi na 're hâimana mono da, Méuquizédéqui hã sasedoti na 're ihâimana mono zéb zarina.
Isimimnha 'Re ihâimana u'âsi mono, da te 're sazei utõrĩ za'ra mono õ'umnhasite
11 Ãne na wa te aima irowasu'u za'ra wa'aba da hã marĩ ahâ di. Tane nherẽ, ãma irowasu'u da hã pire uptabi di, asima wẽ za'ra wa'aba õ wa, iwaihu'u za'ra wa'aba da hã. 12 Ai'ãma ronomro hâ za'ra wa'aba nherẽ, isaze za'ra wa'aba zém na hã, rowahutu'wa na aré oto 're i'aihâimana za'ra wa'aba mono da hã. Tane nherẽ, te zahadu asimnhasi za'ra wa'wa, ni'wa te te aima rowasu'u za'ra wa'aba da, 'Re ihâimana u'âsi mono nhimiroti na imorĩ'rada iwapu, da te 're iwaihu'u za'ra mono zém na. Tane nherẽ, te zahadu 'Re ihâimana u'âsi mono nhimiroti iwapu zô si 're asõpré wa'aba mo, ai'uté norĩ tina hâiwa'u zô si 're isõpré mono ne, dasa ipire na aré oto 're asaihuri aba mono da nherẽ. 13 Ni'wa hã tina hâiwa'u na si 're ihâimana mono hã, ta hã zahadu ai'utére. Tãma hâimana õ di, te te iwaihu'u da hã, marĩ i'uwaibaba hã duré i'upa hã. 14 Tane nherẽ, iprédum norĩ sa hã dasa ipire. E marĩ wa. Ta norĩ hã tihâimanazém na te te 're waihu'u pese za'ra mono wa, marĩ iwẽ hã duré iwasété zama.