4
'Re ihâimana u'âsi mono hã ma wama hiri za'ra, ropisudu za 're iwanhisisi mono na hã dawa'utuzéb u. Tahawa, ma'ãpé ãma 're pibui pese za'ra wa'aba mono, 'Re ihâimana u'âsi mono hã te te ai'ãma 'mairowairébé aba tõ da, i'mai'upai aba zarina, ãne zarina 're idawa'utu za'ra mono zé hã asiwi 're simini za'ra wa'aba mono tõ da. 2 E marĩ wa. Rowasu'uwẽ hã da te 're iwapari za'ra mono ne, wa tô duré wa norĩ zama wapari za'ra ni. 'Re ihâimana u'âsi mono nhimiroti, ma wapari za'ra ni. Tane nherẽ, Rowasu'uwẽ hã dama marĩ dai õ di. E marĩ wa. Da te wapari za'ra nherẽ, i'umnhasi sina da te saze za'ra õ wa. 3 Tahawa, wa norĩ wa te isaze za'ra hã wa te sazei za'ra wa, wa waibu ni dawa'utuzé, 'Re ihâimana u'âsi mono te te ãma iropisudu hã. Ta hã ma tô tinha, ãne:“Wa tô ĩzahi pese. Tahawa ropisutu zahi wa tô 'manha, ãne:
‘Isisisi da hã mare uptabi di za, 're iwa'utu za'ra mono zéb da, te aré tãma ipisutu za'ra zéb u hã!’ ”
Ãne hã ma tô tinha, isimiromhuri hã oto 'rãsutu nherẽ, te te i'aropoto mono hawim haré. 4 E marĩ wa. Nimame Ibaihâ Iwazé pese na rob'ui'éré hã te nomro, bâdâ 7 ãma hã ãne: “Bâdâ 7 ãma hã 'Re ihâimana u'âsi mono te oto wa'udu, uburé tinhimiromhuri te te 'rãsutu parimhã.” 5 Tô duré Ibaihâ Iwazé pese na rob'ui'éré ãma isahu hã te nomro, ãne: “Isisisi da hã mare uptabi di za, 're iwa'utu za'ra mono zéb da, te aré tãma ipisutu za'ra zéb u hã.” 6 Rowasu'uwẽ duréihã te te iwapari na'rata za'ra norĩ hã sisisi õ di, 're idawa'utu za'ra mono zéb u hã, 'Re ihâimana u'âsi mono nhimiroti te te 're 'madâ'â pese za'ra mono õ wa. Tahawa, aimawi norĩ si te za 're sisisi, za te te 're iwapari za'ra mono norĩ si. 7 Ãne u'âbâ ma tô 'Re ihâimana u'âsi mono hã duré bâdâ ihâiba amo hã pisutu, taha wamri “ãhã na bâdâ”. Wahub ahâ pari, Davihi zadawa na te te 're iwaihu'u mono na, 'Re ihâimana u'âsi mono hã ma tô tinha, Ibaihâ Iwazé pese na ãma irob'ui'éré na, ã hã ibaihâ 're, nimosi te ãma irob'ui'éré pari na hã, ãne:
“Ã bâtâ na 'Re ihâimana u'âsi mono mreme wapari za'ra wa'aba wamhã, ma'ãpé aipẽ'ẽ tete na aihâimana za'ra wa'aba tõ.”
8 Zozué hã 're idawa'utu za'ra mono zéb u te te da'a'ãwisi 'wa'âhã, 'Re ihâimana u'âsi mono te te aré oto nharĩ õ di, bâdâ ihâiba amo na “ãhã na bâdâ” ihâimana na hã. 9 Ãne wa, 'Re ihâimana u'âsi mono nhib'a'uwẽ norĩ ma si te za 're hâimana, 're iwa'utu za'ra mono zé hã, tô Õhõ ma 7 ãma bâdâ iwa'utuzé ihâimana ne. 10 E marĩ wa. Ni'wa hã ã hã 're idawa'utu za'ra mono zé 'Re ihâimana u'âsi mono te te ãma iropisudu hã te te sina uwaimrami wamhã, te za wa'udu za, romhuri te te 're i'ab'manharĩ mono zé te te 'rãsutu parimhã, 'Re ihâimana u'âsi mono iwa'utu ne, romhuri te te 'rãsutu pari. 11 Tahawa, wa za sada 're wanhiptete za'ra, ã hã 're idawa'utu za'ra mono zé hã wa te 're waibui mono da. Ãne wamhã, ni'wa hã te te âri ãna hâimana õ di za, duréihã 'Re ihâimana u'âsi mono zada ihâimana za'ra norĩ ma iromhâimana ne hã. 12 E marĩ wa. 'Re ihâimana u'âsi mono mreme hã ihâiba ré ne, tô 're hâimana mono wa. Duré siptete uptabi di, duré marĩ nhihâri'wa sib'ézé 'wapa i'wa si'uiwa i'wa pese uptabi ne. Danhimirosa'rada i'rowi uptabi u te za ãzé, duré dapẽ'ẽzani u rosa'rada i'rowi uptabi dama 're ihâimana za'ra mono u. Duré 'râwi da te dasima 're iwẽ za'ra mono zém na te za dama rowairébé, duré rosa'rada dama 're ihâimana za'ra mono na zama. 13 Marĩ hã hâimana õ di, 'Re ihâimana u'âsi mono wi isima'uri da hã. Uburé isimipodo 're ihâimana za'ra mono 'remhã, uburé sõ'awi te tãma 're hâimana za'ra, itõmo nho'a. Duré taha ma, niwamhã wa za wahâimanazém na wasiwasu'u za'ra ni, ti'ab ré marĩ, wa te 're i'manharĩ za'ra mono zém na.
Cristu hã, Sasedoti ipire uptabi isi'utõrĩ'õ
14 Tahawa, wa za 're wanhiptete za'ra, Wanhib'apito Zezusi wa te wasina 're i'umnhasi za'ra mono zém na, wa te aima iwasu'u za'ra wa'aba na hã. E marĩ wa. Sasedoti ipire uptabi Iwaihu'u pe hã wama 're hâimana za'ra mono wa. Ta hã Zezusi, 'Re ihâimana u'âsi mono 'ra. Ta hã ma tô si'uihâ na ãzé, 'Re ihâimana u'âsi mono nho're u hã. 15 Wate za'ra Sasedoti ipire uptabi hã, ta hã 're hâimana mono õ di, ni'wam norĩ wanhib'uwa wa, wa'ãma 're isiwamri waihu'u za'ra mono õ norĩ ne. Ta norĩ nhiti, te wate za'ra Sasedoti ipire uptabi hã wama 're hâimana za'ra. Ta hã ma tô sipu'u pese na apibu, Wa'uburé nhimipibuzé hã wasine za'ra. Tane nherẽ, tiwasédé te te 'manharĩ õ di. 16 Tahawa, wa za rob'umnhasi sina, wa te wasina 're rotété za'ra Apito simasisizé iwẽ uptabi u, tame 'Re ihâimana u'âsi mono nhimizawizé 're ihâimana mono u. Tame wa za wa te 're sõpẽtẽ za'ra, wa'ãma 're isiba mono zé hã, duré isimizawizé hã wa'ãma 're sina mono da, sô 're wanhimnhasi za'ra mono sidâpâ.