Zezu Cristu hã duré Mozésihi zama
3
Ĩsisãnawã norĩ, 'Re ihâimana u'âsi mono ma si, aimawi 're i'aihâimana za'ra wa'aba mono norĩ, a norĩ wa'aba zô zama ihârâ za'ra wa'wa hã, ma'ãpé Zezusihi si asima 're 'madâ'â u'âsi za'ra wa'aba mono. Ta hã 'Re ihâimana u'âsi mono ma tô we satõ, Isadawa wasu'u'wa da, duré Sasedoti danhipai u Ipire uptabi na 're hâimana mono da. Ta hã wa wa te 're wasu'u za'ra. 2 E marĩ wa. Ta hã umnhasi na ma tô 'Re ihâimana u'âsi mono ma 're hâimana, romhuri hã ã hã te te tãma 'manharĩ da, te te sima ipisudu hã, Mozési hã umnhasi na tinhimiromhuri na 're ihâimana mono ne uburé 'Re ihâimana u'âsi mono nhib'a'uwẽ norĩ ma. 3 Ni'wa hã 'ri'wa, 'ri nhipai u ipire ne, tane duré Zezusi hã pire uptabi di, Mozésihi nhipai u. 4 'Ri hã, ni'wa te za tô 'ri. Tane nherẽ, 'Re ihâimana u'âsi mono si te uburé marĩ 'manharĩ'wa na 're hâimana. 5 Mozési hã umnhasi na ma tô 're hâimana, uburé 'Re ihâimana u'âsi mono nhib'a'uwẽ norĩ ma hã. Ma tô duré te te tãma 're awaihu'u, romhutu'õ 'Re ihâimana u'âsi mono za te te 're i'awaihu'u mono zém na hã. 6 Tane nherẽ, Cristu hã te umnhasi na 're hâimana, 'Re ihâimana u'âsi mono 'ra na 're ihâimana mono na hã. Isib'a'uwẽ norĩ te te 're i'anhimroi mono 'wa te 're hâimana. Wa norĩ hã isõrõwa na wa za 're wahâimana za'ra, wanhib'ru wama 're hâimana u'âsi za'ra mono wamhã, duré wa te 're rob'umnhasi u'âsi za'ra mono wamhã, sô 're iwanhimipari zara mono zô.'Re ihâimana u'âsi mono nhib'a'uwẽ 're iwa'utu za'ra mono zé
7 Tahawa, ma tô 'Re ihâimana u'âsi mono Pẽ'ẽzani hã tinha, ãne:
“Ã bâtâ na 'Re ihâimana u'âsi mono mreme wapari za'ra wa'aba wamhã, 8 aipẽ'ẽ tete na aihâimana za'ra wa'aba tõ, aihi'rata norĩ 'Re ihâimana u'âsi mono zada ihâimana za'ra ne hã, ãma wa'a su'u za'ra õ zô te te siwi pibui wamhã, rop si 're irosa'wari mono ãma.
9 Tame aihi'rata norĩ wa'wa hã ma tô siwi ĩpibu, ãma ĩwa'a su'u za'ra õ zô, 40 na wahub 're, te tãma 're i'manharĩ wẽ za'ra mono zé titõmo na te te 're 'madâ'â za'ra mono nherẽ.
10 Tahawa, wa tô sada ĩzahi za'ra, taha bâtâ mono na 're idapoto za'ra mono da hã. Wa tô tinha, ãne:
‘Tipẽ'ẽ 'remhã te ĩwi 're sipizari u'âsi za'ra. Duré ĩte bâdâdi hã te te waihu'u za'ra õ di.’
11 Tahawa, ĩzahi pese wa, wa tô ropisutu zahi hã 'manha, ãne:
‘Isisisi da hã mare uptabi di za, 're iwa'utu za'ra mono zéb da, te aré tãma ipisutu za'ra zéb u hã.’ ”
12 Ĩsisãnawã norĩ, 're asipibui pese za'ra wa'aba mono, ni'wa hã tipẽ'ẽ 're, wasété uptabi na duré isazei'õ'wa na 're hâimana mono tõ da, ta hã ãma pahâ tõ da, 'Re ihâimana u'âsi mono idâ'â'õ nhiti. 13 Iwa'rãmi, bâtâ sidâpâ 're asisiptete u'âsi za'ra wa'aba mono, bâdâ aima 're hâimana za'ra wa'aba mono ré, ni'wa hã tiwasété u'âbâ pẽ'ẽ tete na 're hâimana mono tõ da. 14 E marĩ wa. Wa norĩ hã Cristuhu siré, wa za 're wahâimana za'ra romhuri'wa na, wanhiptete sina ro i'rãsutu u, wa te 're umnhasi za'ra mono wamhã, Zezusi, wa te 're isaze na'rata za'ra mono zém hawi wama 're ihâimana za'ra mono ne.
15 Ãne na ma tô Ibaihâ Iwazé pese na rob'ui'éré inomro hã tinha:
“Ã bâtâ na 'Re ihâimana u'âsi mono mreme wapari za'ra wa'aba wamhã, aipẽ'ẽ tete na aihâimana za'ra wa'aba tõ, aihi'rata norĩ, rop si 're irosa'wari mono ãma sada ihâimana za'ra ne.”
16 E 'wam norĩ hã tawamhã 'Re ihâimana u'âsi mono mreme te te wapari za'ra nherẽ, sada ihâimana za'ra hã. Ta norĩ hã uburé Mozési te te i'azani, Ezitu hawi. 17 E 'wam norĩ da, ma tô duré bété tawamhã 'Re ihâimana u'âsi mono hã tizahi pese, 40 na wahub 'remhã, Mozési te te da'awazere wamhã. Tô tiwasédé te te i'manharĩ za'ra norĩ da, rop si 're irosa'wari mono ãma isi'utõrĩ norĩ da. 18 E 'wam norĩ ãma 'Re ihâimana u'âsi mono ma tô duré bété ropisutu zahi hã 'manha, ã hã: “Isisisi da hã mare uptabi di za, 're iwa'utu za'ra mono zéb da, te aré tãma ipisutu za'ra zéb u hã.” Tô sada ihâimana za'ra norĩ ãma ma tô ãne hã tinha. 19 Tahawa, ãmemhã wa tô waihu'u za'ra ni, 'Re ihâimana u'âsi mono Ti'a te te ãma Iropisutu u isisisi õ na hã te te saze za'ra õ wa.