Danho'reptuzé iwẽ uptabi
2
Tahawa, wa za ãma 're warĩtĩ nho'õmo pese za'ra, tô sena 'Re ihâimana u'âsi mono nhimiroti, wa te 're iwapari za'ra mono zém na hã, niwa isiti wasina 're wapahâ za'ra mono tõ da. 2 Tô sena uptabi na ma tô da te 're waihu'u za'ra, 'Re ihâimana u'âsi mono nhimiroti, hâiwa hawi romhuri'wa norĩ zadawa na duréihã te te iwaihu'uzé hã. Tawamhã ni'wam norĩ, ãma 're ihâimana za'ra mono õ hã duré te te 're i'madâ'â pese za'ra mono õ norĩ hã ma tô 'Re ihâimana u'âsi mono nhimirob'manharĩ pipa hã sõpẽtẽ za'ra, i'uwaibaba na. 3 Ãne wamhã, e niha wa za bété 're wawairébé, 'Re ihâimana u'âsi mono nhimirob'manharĩ pipa wi hã, danho'reptuzé iwẽ uptabi, wa te 're wata'ẽ za'ra mono nherẽ. Imorĩ'rata na, Wanhib'apito Zezusi hã si'uihâ na ma tô te te 're 'mahârâ, ã hã danho'reptuzé iwẽ uptabi hã. Taha nhipai u, iwapari'wa norĩ hã ma tô wama waihu'u pese za'ra, tô sena uptabi na hã. 4 'Re ihâimana u'âsi mono zama isiré za'ra ma tô duré te te wama 're awaihu'u pese, sipu'u pese na marĩ dama i'manharĩ waihu'u'õ tiwaihu'u pese na te te 're i'ab'manharĩ mono zéb zarina, tô sena na wa te ãma 're waihu'u za'ra mono da. Duré te te sima 're iwẽ mono zéb zarina ma tô 'Re ihâimana u'âsi mono Pẽ'ẽzani hã tinhoprubzé iwẽ uptabi romhuri mono bâ te te dama 're anhomri, ãma 're dahâimana za'ra mono da.Zezu Cristu hã, Danho'reptui'wa
5 'Re ihâimana u'âsi mono hã hâiwa hawi romhuri'wa norĩ te te pisutu za'ra õ di, pire na te te 're da'madâ'â za'ra mono da hã, ro ité romhutu'õ za 're idahâimana za'ra mono zéb ãma hã, tô õ hã wa te dama 're iwasu'u za'ra mono. 6 Tane nherẽ, nimame Ibaihâ Iwazé pese na rob'ui'éré hã te nomro, ãne:
“'Re ihâimana u'âsi mono, e marĩ na ti'ai ãma a'uwẽ 're hâimana za'ra mono bâ, ãma 're irosa'rata za'ra mono da hã, duré taré ti'ai ãma a'uwẽ, 're hâimana za'ra mono nherẽ, ãma 're i'aihâtâ'â za'ra mono da hã.
7 Ma tô duré tãma ipisutu za'ra, hâiwa hawi romhuri'wa norĩ zahâpâ ro'rutu na 're hâimana za'ra mono da a'â. Ma tô duré tãma ipisutu za'ra, wazé pese na duré pire na 're ihâimana za'ra mono zé hã, apito norĩ 're ihâimana za'ra mono ne.
8 Ma tô duré dama i'apisu, uburé marĩ hã danhimiroti pire zahâpâ 're hâimana za'ra mono da.”
'Re ihâimana u'âsi mono te te nharĩ wamhã, ãne: “Uburé marĩ hã danhimiroti pire zahâpâ 're hâimana za'ra mono da, te te dama ipisutu na hã”, ãne te te nharĩ wamhã, marĩ isimi'madâ'âzém nhiti i'maihâimana õ. Tane nherẽ, zahadu wa te 'madâ'â za'ra õ di, ti'ai ãma a'uwẽ norĩ hã uburé marĩ ma, simiroti pire na 're ihâimana za'ra mono zé hã. 9 Tane nherẽ, wa norĩ hã wa oto wa te 're waihu'u za'ra, Zezusi hã ro'rutu na hâiwa hawi romhuri'wa norĩ zahâpâ hâimana da, da te ipisutu na hã, 'Re ihâimana u'âsi mono nhimizawizéb zarina uburé dazada dâ'â da. Tawamhã ãhã na hã wa oto wasiwi waihu'u ni, rowẽ isa'ẽtẽ na da te isõpre na hã, duré wazé pese uptabi na 're ihâimana mono zém na zama, tidâ'âzém na te te irobzépata u'âbâ. 10 'Re ihâimana u'âsi mono hã, Ro'apoto mono 'wa duré uburé marĩ te te 're i'a'upari mono iwẽ hã ma tô 'manha. Zezusi hã ma tô pisutu, te te 're da'anho'reptui mono da, te te sina uwaimrami da, 'Re ihâimana u'âsi mono te te tãma ipisutuzéb zarina, te te irobzépata u'âbâmhã. I'ra norĩ hã ahâ uptabi na, rowẽ uptabi ãma Zezusihi siré 're hâimana za'ra mono da, ma tô ãne hã 'manha. E marĩ wa. Zezusihi si dazaprõni'wai wa, danho'reptuzéb u hã.
11 Zezusi hã dawasété hawi te te 're da'a'upsõ. Tahawa ta hã duré uburé te te 're i'a'upsõi mono hã te Imama hã misi tãma 're hâimana za'ra, tô Õ hã. Tahawa Zezusi hã te siséb ãna te te 're anhisi, tisisãnawã na. 12 Ãne ma tô tinha, 'Re ihâimana u'âsi mono ma:
“'Re ihâimana u'âsi mono, wa za te 're aiwasu'u, ĩsisãnawã norĩ ma.
Wa za duré ai'ãma 're ĩwata, siré 're isi'rã'õtõ mono zéb ãma.”
13 Ma tô duré tinha, ãne: “Wa za te 're umnhasi.” Ãne duré imreme hã: “Ãhãta wa ãme ĩhâiba, i'ra norĩ ré, 'Re ihâimana u'âsi mono te te ĩma isõmri za'ra ré, te 're ab'madâ'â pese mono da.”
14 'Re ihâimana u'âsi mono 'ra na tãma 're ihâimana za'ra mono hã, inhi ré norĩ duré iwapru ré norĩ. Tahawa Zezusihi zama ma tô oto isine za'ra 're hâimana, ti'ai ãma a'uwẽ hâiba na, tidâ'âzém na Wa'uburé ãma te te ai'uté da, dadâ'âzé ma isiptete ãma, 15 duré ni'wam norĩ hã Wa'uburé nhimiwada'uri nhiptete zarina tidâ'âzé ma pahi u'âsi para na 're nomro mono ré, 're ihâimana za'ra mono hã te te azani da. 16 Tô ibâ, Zezusi hã wei morĩ õ di, hâiwa hawi romhuri'wa norĩ te te 're apawapto mono da. Abra'ãhã nhihudu norĩ si te te 're apawapto mono da, ma tô wei mo. 17 Tahawa, tô i'ru zahi Zezusi hã tisisãnawã norĩ ne uburé marĩ mono bâ 're ihâimana mono da hã, Sasedoti ipire na tãma 're hâimana za'ra mono da, ihâimana wẽ na, duré umnhasi na 'Re ihâimana u'âsi mono ma romhuri na 're hâimana mono da, dawasédé hã 'Re ihâimana u'âsi mono te te oto da'ãma 're ab'madâ'â mono tõ da. 18 Tahawa, ãhã na hã Zezusi hã te te 're apawapto waihu'u pese mono di, Wa'uburé te te 're i'apibui mono hã. E marĩ wa. Õhõ zama Wa'uburé hã te te pibui wa, duré te te robzépata wab zama.