Ebreu
Ebreu norĩ ma, rob'ui'éré
'Re ihâimana u'âsi mono, ti'ra te te ihâi'rézé
1
Duréihã, 'Re ihâimana u'âsi mono hã tizadawa 'mahârâ'wa norĩ zadawa na ma tô te te 're awaihu'u ahâ, marĩ mono na ãma ipu'u na, wahi'rata norĩ ma hã. 2 Tanei õ di, ã bâtâ mono na hã. Ti'ra zadawa na si te te oto wama 're anharĩ. Ta hã ma tô 'Re ihâimana u'âsi mono hã pisutu, uburé roptede'wa na 're hâimana mono da. Duré taha zadawa na ma tô 'Re ihâimana u'âsi mono hã uburé ro'apoto. 3 I'ra hã te te 're rowa'a, 'Re ihâimana u'âsi mono te rowa'a na. Duré ta hã aiwa uptabi, 'Re ihâimana u'âsi mono ne te 're hâimana. Ta hã uburé marĩ te te 're a'upari, timreme nhiptete uptabi na. Duré dawasété hawi te te 're da'a'upsõi mono da, te te ãma uwaimrami parimhã, ma tô mo hâiwa u, 'Re ihâimana u'âsi mono danhipai'u Iwaihu'u pese uptabi nhimire niwĩ oto 're sãmra mono da.'Re ihâimana u'âsi mono 'ra, duré hâiwa hawi romhuri'wa norĩ
4 Ãne ma tô 'Re ihâimana u'âsi mono hã 'manha, I'ra hã pire uptabi na hâiwa hawi romhuri'wa norĩ nhipai u 're hâimana mono da. Ma tô duré isisi ipire uptabi hã tãma pisutu, ta norĩ nhisi nhipai u 're hâimana mono da. 5 E marĩ wa. 'Re ihâimana u'âsi mono hã niwa tite hâiwa hawi romhuri'wa norĩ ma, te te tãma 'manharĩ õ wa, ãne hã:
“A hã Ĩ'ra. Ã bâtâ na hã Aimama na wa oto ĩhâiba.”
Duré niwa hâiwa hawi romhuri'wai ãma te te ãma 'manharĩ õ di, ãne hã.
“Wa hã za Imama. Tahawa Ĩ'ra na te za ĩma 're hâimana.”
6 Te duré ãne tinha, 'Re ihâimana u'âsi mono hã Ti'ra ipoto 'rada ti'ai u we te te sõmri wamhã:
“Hâiwa hawi 'Re ihâimana u'âsi mono ma romhuri'wa norĩ hã uburé, ãma 're iwata za'ra mono da si, iwẽ hã.”
7 Ãne si ma tô tinha 'Re ihâimana u'âsi mono hã, tite hâiwa hawi romhuri'wa norĩ ãma hã:
“'Re ihâimana u'âsi mono hã te tite hâiwa hawi romhuri'wa norĩ hã te te 're ab'manharĩ, rowa'u'u ne 're hâimana za'ra mono da, duré tãma romhuri'wa norĩ hã unhama ro'o ne 're hâimana za'ra mono da.”
8 Tazahã, Ti'ra na hã ma tô tinha, ãne:
“'Re ihâimana u'âsi mono, da'ãma 're i'asib'a'uwẽ mono zé hã te za õne u'âsi 're hâimana.
Duré A hã i'uwaibaba na si te za asib'a'uwẽ norĩ hã 're i'ab'madâ'â mo.
9 Uburé marĩ iwẽ si, aima isawi hã. Tazahã aima 'ru ti, marĩ iwasédé hã.
Tahawa, 'Re ihâimana u'âsi mono, ate 'Re ihâimana u'âsi mono hã ma tô aipisutu. Aipire na 're i'aihâimana mono zé hã ma tô duré aima tisõ, rowẽ sina âri da, asiré romhuri'wa norĩ nhipai u.”
10 Duré ãne Ibaihâ Iwazé pese na rob'ui'éré hã:
“A hã Uburé Danhib'apito, romna'rata hawimhã ma tô ti'a hã ipo. Duré asib'rata na ma tô uburé i'a'manha, hâiwa na 're isimasa mono hã.
11 Ti'a hã duré hâiwa me te za ai'utõrĩ zahuré. Te za duré aiwamnarĩ zahuré, da'uza 're ihâ 'rata za'ra mono ne. Tanei õ di, A hã. Õne u'âsi te za 're aihâimana mo.
12 A hã te za isinha zahuré, da'uza pano pa da te 're isinha za'ra mono ne. Te za duré ãma isaprĩ zahuré, da'uza da te ãma 're isaprĩ za'ra mono ne.
Tanei õ di, A hã. Asisaprĩ waihu'u õ di za. Duré ai'ãma 're iwahu mono zé hã 'rãsutu waihu'u õ di za.”
13 'Re ihâimana u'âsi mono hã niwa te te nharĩ õ di, tite hâiwa hawi romhuri'wa norĩ ma hã, ãne:
“Ĩnhimire niwĩ asãmra, asitob'ru norĩ hã aipara zahâpâ te isõrézéb u, aipara nhimizusizéb zahâpâ.”
14 Tawamhã bété e 'wam norĩ, hâiwa hawi romhuri'wa norĩ hã. Uburé ta norĩ hã ihâiba'õ, 'Re ihâimana u'âsi mono ma te te 're iromhuri za'ra mono. Ta norĩ hã te te we 're azatõrĩ, tinho'reptuzé za te te sina 're i'uwaimrami za'ra mono norĩ hã te te 're pawaptob za'ra mono da.