4 Dasina damrozé hã, uburé da te 're iwazé pese za'ra mono da si, iwẽ hã. Duré aibâ imro ré norĩ hã, duré pi'õ imro ré norĩ zama, misi haré sena na sima 're ihâimana za'ra mono da si, iwẽ hã. 'Re ihâimana u'âsi mono hã hâimana nhiséb ãna dasina dahâimana na 're ihâimana za'ra mono norĩ ma, duré damro na dawi 're isimisaihuri za'ra mono norĩ ma zama, te za ropire hã te te 're apisutu, te te ãma 're i'arowairébé mono zéb zarina.

5 Rob'uiprazéb zawi pese zarina 're anomro aba mono tõ. Duré asima 're rowẽ za'ra wa'aba mono, awa'awi na asibro aima 're ihâimana za'ra wa'aba mono na. E marĩ wa. 'Re ihâimana u'âsi mono hã te te nharĩ wa, ãne: “Niwa te airẽme õ di za. Duré niwa asiwaprosi aihâimana da, asiti ĩhâimana õ di za.” 6 Tahawa, 'Re ihâimana u'âsi mono umnhasi sina wa za wa te 're nharĩ za'ra, ãne:

7 Ma'ãpé ãma aipo're pu'u za'ra wa'aba, isaze na'rata za'ra wa'aba hawi asib'ihâ'a za'ra wa'aba na, 'Re ihâimana u'âsi mono mreme te te aima i'mahârâ za'ra wa'aba na hã. Ihâimana za'ra zém na ãma rosa'rata pese za'ra wa'aba. Duré sizusi za'ra wa'aba, 'Re ihâimana u'âsi mono te te sina 're i'umnhasi za'ra mono zém na hã. 8 Zezu Cristu hã tihâimanazém na te te saprĩ waihu'u õ di, ahâmhâ hawimhã, duré ãhã na hã. Duré õne u'âsi, te za tô tihâimanazém na 're hâimana, te te ãma saprĩ waihu'u ãna. 9 Da'ãma 're sasõmri za'ra wa'aba mono tõ, roti senai'õ na duré aimawi na da te 're irowasu'u za'ra mono na sipu'u pese na, Cristuhu wasu'uwẽ upana. Wapẽ'ẽ na wanhiptete sina ãma 're iwanomro mono da si iwẽ hã, 'Re ihâimana u'âsi mono nhimizawizém na, mare di, dasa na roti, wa te 're i'madâ'â pese za'ra mono zarina hã. E marĩ wa. Dasa na roti te te 're i'madâ'â pese za'ra mono norĩ hã, taha ãma roti te te 're pawaptob za'ra mono dai õ wa.

10 Danhoprubzéb zatazé aimawi hã te wama 're hâimana za'ra. Sasedoti norĩ 'Re ihâimana u'âsi mono nhorõwa 'ri 'rãihâ ãma te te 're iromhuri za'ra mono norĩ hã, tãma i'ru zahi õ di, wate za'ra danhoprubzéb zatazém nhisiwi, danhimizama ãma 're idanhoprub za'ra mono zém nhi te te 're ihuri mono da hã. 11 Sasedoti tisiré norĩ nhipai u ipire hã te za danhimizama wapru hã ti'â, 'Ri're wa'wa Iwazé pese uptabi u, 'Re ihâimana u'âsi mono ma, ãma sõprub da, dawasété parizéb da. Tazahã, danhimizama hâiba hã te za zata ni, romhâ 'manharĩ na 'ri isisõré nhiti. 12 Ãne wa, Zezusihi zama 'ri nho'u Zeruzalẽ nhiti ma tô dârâ, tiwapru na dawasété hawi te te 're da'a'upsõi mono da. 13 Tahawa, Zezusihi u oto wa te wasina rotété za'ra wa'aba, romhâ 'manharĩ na 'ri isisõré nhiti, wa te sépata za'ra da, da te dasiwi sasõmri wa, da te tãma irob'manharĩ wasété ne hã. 14 E marĩ wa. Ãme ti'ai ãma hã 'ri nho'u wama 're 'maihâimana mono õ di, isi'utõrĩ waihu'u õ hã. Tahawa, 'ri nho'u niwa za we iwisi zô si, wa 're wanhopré, wa norĩ hã. 15 Tahawa, Zezusi wazada za'ra idâ'âzém na, wa 're wawata u'âsi za'ra, 'Re ihâimana u'âsi mono ãma hã. Ã hã ãma 're iwawata za'ra mono zé hã, danhimizama zata ne ãma tãma 're iwanhoprub za'ra mono zé, wazaihâ na i'umnhasi sina ãma 're iwawata za'ra mono zé hã. 16 Marĩ iwẽ 're i'manharĩ za'ra wa'aba mono zé hã 're sahâri za'ra wa'aba mono tõ, duré 're idapawaptob za'ra wa'aba mono zéb zama. E marĩ wa. Ã norĩ hã danhoprubzéb zata ne da te 're 'manharĩ za'ra mono wamhã, 'Re ihâimana u'âsi mono ma, te te tãma 're irowẽ mono.

17 Ate za'ra wa'wa isazei'wa norĩ 'madâ'â'wa norĩ hã 're wapari pese za'ra wa'aba mono. Duré isimiroti zahi zarina 're anomro aba mono. E marĩ wa. Ta norĩ hã aipẽ'ẽ 're aima ropire za'ra wa'wa hã te te 're 'madâ'â pese za'ra mono wa, za 'Re ihâimana u'âsi mono ma, tinhimiromhuri na 're isiwasu'u za'ra mono na tãma waihu'u pese za'ra wa. Ta norĩ hã 're wapari pese za'ra wa'aba mono wamhã, romhuri te za to sina te te 're 'manharĩ za'ra. Tazahã, 're wapari za'ra wa'aba mono õ wamhã, tãma robzei ãna te za te te 're romhuri za'ra. Taha zarina aihâimanazéb 'remhã marĩ iwẽ te te aima 're sani za'ra wa'aba mono õ di za.

18 Ma'ãpé wa'ãma 're rowaptẽrẽ u'âsi za'ra wa'aba mono. Wasiwawã za'ra õ di, marĩ na wa te i'upa za'ra zé te te wawi ro'wa'ré za'ra õ wa. E marĩ wa. Wa te wasima 're wẽ u'âsi za'ra mono wa, marĩ i'uwaibaba si wa te 're 'manharĩ za'ra mono da. 19 Tahawa, wa za aiwi waptẽrẽ za'ra wa'wa, ĩpẽ'ẽ na te ĩsima iwẽ uptabi na. Ma'ãpé 're rowaptẽrẽ za'ra wa'aba mono, 'Re ihâimana u'âsi mono hã apâ te te atẽme ĩzatõrĩ za'ra wa'aba da, waptui uptabi na.

20 'Re ihâimana u'âsi mono Rowẽ Nhomri'wa hã ma tô hâiwa'utu, Wanhib'apito Zezusi hã. Ta hã te 're hâimana, Pone'ẽrebâ 'madâ'â'wa Ipire uptabi na. Ta hã 'Re ihâimana u'âsi mono ma tô hâiwa'utu, tiwapru te te wazada isa'wari u'âbâ. Taha na ma tô oto ropisutu zahi isi'utõrĩ waihu'u'õ hã tob'rata to, 'Re ihâimana u'âsi mono hã. 21 'Re ihâimana u'âsi mono Rowẽ Nhomri'wa hã, uburé marĩ iwẽ te te aima 're isõmri za'ra wa'aba mono da si, iwẽ hã, te te sima 're iwẽ mono zéb zarina iwẽ si 're i'manharĩ za'ra wa'aba mono da hã. Duré Zezu Cristuhu u'âbâ, uburé marĩ te te wa'ãma 're i'ab'manharĩ mono da si, te te tãma 're irowẽ mono zarina. Tahawa, Cristuhu ãma si 're iwawata u'âsi za'ra mono da si, iwẽ hã, õne u'âsi. Tane tô.

22 Ĩsisãnawã norĩ, wa za ãma aiwi waptẽrẽ za'ra wa'wa. Ma'ãpé asimi'ẽ na 're wapari za'ra wa'aba mono, ã hã te ãma aima irob'ui'éré za'ra wa'aba zé hã, te ãma 're asiptete za'ra wa'aba mono da. E marĩ wa. Ã hã te aima irob'ui'éré za'ra wa'aba zé hã pa uptabi õ wa. 23 Wa ĩsima wẽ, waihu'u za'ra wa'aba da, wasisãnawã Timotiu hã dazazém hawi iwatobro na hã. Ta hã wei ĩtẽme morĩ su'u wamhã, wa za ãma ĩsiré saprõ, te asabu za'ra wa'aba da, ãma ĩmorĩ wamhã.

24 Ma'ãpé wama sawi za'ra wa'aba, uburé ate za'ra wa'wa isazei'wa norĩ 'madâ'â'wa norĩ hã duré uburé 'Re ihâimana u'âsi mono nhib'a'uwẽ norĩ zama. Italia ãma isazei'wa norĩ hã te duré ãma asawi za'ra wa'wa.

25 'Re ihâimana u'âsi mono ma, wa ai'ãma 're ĩmreme u'âsi za'ra wa'wa, isimizawizé hã ai'ãma 're ihâimana u'âsi za'ra wa'aba mono da si!