Dahâimanazé 'Re ihâimana u'âsi mono ma, te te 're irowẽ mono zé
4
Wasisãnawã norĩ, te ĩma tihâiba duré, aimawi na te aima iroti za'ra wa'aba da hã. Niha 're i'aihâimana za'ra wa'aba mono zéb da hã, wa tô aima roti za'ra wa'wa, 'Re ihâimana u'âsi mono ma, 're rowẽ zani za'ra wa'aba mono da. Tô ãne zarina te oto 're aihâimana za'ra wa'aba mo. Tahawa, ãhã na hã Wanhib'apito Zezusihi nhisi na wa ãma aiwi waptẽrẽ za'ra wa'aba ni. Wa duré aima roti za'ra wa'aba ni, tô õhõ na ãma 're uzusi u'âsi za'ra wa'aba mono da, ãma 're aiprédub u'âsi za'ra wa'aba mono da. 2 E marĩ wa. Wanhib'apito Zezusihi zadawa para, wa te aima iroti za'ra wa'aba na hã aima waihu'u pese za'ra wa'aba di. 3 'Re ihâimana u'âsi mono te te sima 're iwẽ mono hã, ai'ãma za'ra wa'aba, ã hã: Õhõ ma si aimawi 're i'aihâimana za'ra wa'aba mono da si, duré dahâimana nhiséb õ na dasina dahâimana na 're i'aihâimana za'ra wa'aba mono õ da si. 4 Duré aihâiba mono bâ iwaihu'u za'ra wa'aba da si, marĩ iwasété wi 're i'asitété za'ra wa'aba mono zé hã, duré aihâiba hã 're i'madâ'â pese za'ra wa'aba mono da si, aimawi 'Re ihâimana u'âsi mono ma si 're hâimana za'ra mono da, duré 'madâ'â pire sina. 5 Mare di, dahâimana nhiséb õ na dasina 're idahâimana wasété za'ra mono wi 're i'asitété waihu'u za'ra wa'aba mono õ na hã, 'Re ihâimana u'âsi mono waihu'u'õ'wa norĩ 're ihâimana za'ra mono ne hã. 6 Ã hã roti ihâimana na hã, ni'wa hã tisisãnawã zada wasété tõ, duré te te wazéb ãna tãma hâimana tõ. E marĩ wa. Wa tô aima ãma rowasu'u pari za'ra wa'aba ni. Wa tô duré ãma aipo're pu'u pari za'ra wa'aba ni, ãne na: Wanhib'apito hã te za pire na tãma arob'manharĩ wasété, ni'wam norĩ ãne hã te te 're i'manharĩ wasété za'ra mono norĩ ma hã. 7 E marĩ wa. 'Re ihâimana u'âsi mono hã te te sima 're wa'apisutu mono õ di, wahâimana nhiséb õ na dasina dahâimana na 're wahâimana za'ra mono da hã. Tazahã, aimawi tãma 're iwahâimana za'ra mono da si, ma tô sima wa'apisutu, isimiroti wa te 're 'madâ'â pese za'ra mono sina. 8 Tahawa, ni'wa ã hã roti te te siwi wẽ'õ wamhã, ti'ai ãma a'uwẽ te te siwi wẽ'õ dai õ di. Tazahã 'Re ihâimana u'âsi mono te za siwi wẽ'õ, Tipẽ'ẽzani te te aima 're i'anhomri aba mono hã.9 Asiré isazei'wa norĩ, 're isawi pese za'ra wa'aba mono zém na, wa te ãma aima irob'ui'éré za'ra wa'aba da hã, sadai õ di. E marĩ wa. Tô 'Re ihâimana u'âsi mono si'uihâ na ma tô aima waihu'u za'ra wa'wa, 're i'asisawi pese za'ra wa'aba mono zéb da hã. 10 Ãne hã te tô 're i'manharĩ za'ra wa'aba mo, uburé wasisãnawã norĩ Masédonia na danhipti'a nho'õmo nhisi ãma 're isi'ubumroi mono norĩ ma hã. Tahawa, ĩsisãnawã norĩ, wa ãma aiwi waptẽrẽ za'ra wa'aba ni, asimizawizém nhipai u 're 'manharĩ za'ra wa'aba mono da, ãne: 11 Asima sô 're asõpré u'âsi aba mono, rowẽ u'âsi asiré 're aihâimana za'ra wa'aba mono da, ro'wa'rutu ãna. Duré dahâimanazém na ate õ nherẽ, dawi 're ro'wa'rutu za'ra wa'aba mono tõ. Duré asib'rata na asima 're romhuri za'ra wa'aba mono, wasisõ'a ré wa te aima iroti za'ra wa'aba zéb zarina. 12 Ãne wamhã, isazei'õ'wa norĩ hã te za te te 're aiwazéb za'ra wa'wa. Duré danhib'rata 're aihâimana za'ra wa'aba mono õ di za.
Wanhib'apito Zezu Cristu apâ za we imorĩzé
13 Wasisãnawã norĩ, wa wasima wẽ za'ra ni, ni'wam norĩ 're idâ'â za'ra mono norĩ ma iromhâimanazé waihu'u za'ra wa'aba da, aiwi robzei'õ za'ra wa'aba tõ da, ni'wam norĩ hã apâ za 're ihâiwa'utu za'ra mono zô, 're isimipari waihu'u za'ra mono õ norĩ ne. 14 Wa norĩ hã wa saze za'ra ni, Zezusi hã ipẽ'ẽ si'utõrĩ na hã duré apâ ihâiwa'utu na hã. Ãne, wa duré saze za'ra ni, Zezusi apâ wei morĩ wamhã, 'Re ihâimana u'âsi mono, isazei'wa 're idâ'â za'ra mono norĩ hã Zezusihi siré za te te isimroi mono na hã.
15 Wanhib'apito mreme zarina, wa tô sena aima rowasu'u za'ra wa'aba ni, ãne: Wa norĩ hã Wanhib'apito apâ we imorĩzé bâtâ ãma hã zahadu wahâiba ré 're iwanomro mono, wasi'aba'réi õ di za, 're idâ'â za'ra mono norĩ wana ré hã. 16 E marĩ wa. Dahârâ 'rãihâ na rob'ru hã te za tihâiba, duré hâiwa hawi 'Re ihâimana u'âsi mono ma romhuri'wa tisiré norĩ nhipai u ipire hârâ zama. Duré 'Re ihâimana u'âsi mono te, danhimnhihârâzéb zama te za tihâiba. Tawamhã Wanhib'apito hã te za we oto si'ra, hâiwa hawi. Tawamhã Cristuhu zazei'wa 're idâ'â za'ra mono norĩ hã te za imorĩ'rata na tihâiwa'utu za'ra. 17 Taha parip si, wa norĩ wahâiba ré iwahâimana za'ra hã, te za da te wanhimro isiré za'ra hâiwa'a u, Wanhib'apito hã wa te wasiwi sõpẽtẽ da, hâiwa nho're u. Ãne wamhã, wa za oto 're wasi'ubumroi u'âsi, Wanhib'apito 'rata. 18 Tahawa, ã hã romreme na 're asisiptete u'âsi za'ra wa'aba mono.