Danhimiza'rese sina 're idanomro mono zé, Wanhib'apito apâ we imorĩzéb zô
5
Wasisãnawã norĩ, Wanhib'apito apâ we imorĩzé bâdâ hã niwa za iromhâimanazém na hã wa te ãma aima irob'ui'éré za'ra wa'aba da hã, sadai õ di. 2 E marĩ wa. Isimisaihuri simisaihuri da, barana sô 're idanhimipari za'ra mono õ zém na 're isisisi mono ne, Wanhib'apito te bâdâ dama sa'rese ãna za iwisizé hã aima waihu'u pese za'ra wa'aba wa. 3 Sô danhimipari za'ra õ wa, da te oto inharĩ za'ra zéb ãma, ãne: “Rowẽ u'âsi wa za 're wahâimana za'ra. Duré marĩ wa'ãma 're hâimana za'ra mono õ di za”, tane nherẽ, waptu na rosa'rese õ ré, te za ropire hã dazô 're wairébé. Tawamhã ni'wa hã sisõ'reptui waihu'u õ di za, pi'õ norĩ ma, i'ra 're rere'e mono da, tihâzé te te 're sépata za'ra mono wa, te te 're irobzépata za'ra mono zé wi, tiwi 're iwairébé waihu'u mono õ ne, da te robzépata za'ẽtẽ za'ra wa za.4 Tane nherẽ, ĩsisãnawã norĩ, a norĩ wa'wa hã robra na 're aihâimana za'ra wa'aba mono õ di oto. Tahawa, Wanhib'apito te bâdâ wisi wamhã, rosa'rese õ ré te te aiwaibui wa'aba õ di za, isimisaihuri rosa'rese õ ré, simisaihuri zô danhorõwa u 're izasi mono ne. 5 A norĩ wa'wa hã rowa'a te na, te uburé 're anomro aba mo, duré bâtâ na rowa'a te na zama. Wa norĩ hã mara tei õ di, duré robra tei õ di. 6 Tahawa, 're wanhotõ za'ra mono õ di za, dasine. Wanhimiza'rese sina wa te 're rob'madâ'â u'âsi za'ra wa'aba mono. Duré âzé na 're wasi'rãiwamnarĩ za'ra mono ãna 're wahâimana za'ra wa'aba mono. 7 'Re isõtõ za'ra mono hã, barana si te 're sõtõ za'ra. Duré âzé na 're isi'rãiwamnarĩ za'ra mono hã, barana te 'rãi wasété na 're hâimana za'ra. 8 Tazahã, wa norĩ, bâtâ na rowa'a na 're iwahâimana za'ra mono hã, âzé na 're wasi'rãiwamnarĩ za'ra mono õ di za. 'Re ihâimana u'âsi mono, wa te wasina 're i'umnhasi za'ra mono zém na, wa za ãma 're wasi'uza za'ra, duré dazawizém na zama, dasi'wapéi 'manharĩ'wa norĩ, ti'uza ihâtete na ãma 're isi'uza za'ra mono ne. Duré wanho'reptuzéb zô wasiwawãi ãna 're iwanhimipari za'ra mono zém na, wa za ãma wasi'rãzaza za'ra ni, dasi'wapéi 'manharĩ'wa norĩ 'rãzaza itete ne.
9 E marĩ wa. 'Re ihâimana u'âsi mono hã te te sima wa'apisutu õ di, isimihâzé wa te 're isépata za'ra mono da hã. Tazahã, te te 're wa'anho'reptui mono da si, Wanhib'apito Zezu Cristu wazada idâ'â za'ra zém na. 10 Ta hã ma tô wazada tidâ'â za'ra, isiré 're wahâimana u'âsi za'ra mono da, wahâiba ré 're wahâimana za'ra mono ré hã duré niwamhã 're wadâ'â za'ra mono wab zama, niwa apâ wei morĩ wamhã. 11 Tahawa, 're asipawaptob u'âsi za'ra wa'aba mono, duré 're asisiptete u'âsi za'ra wa'aba mono, ãwa bâtâ u 're i'manharĩ za'ra wa'aba mono ne.
'Re idanomro wẽ mono zém na roti
12 Wasisãnawã norĩ, wa ãma aiwi waptẽrẽ za'ra wa'aba ni, ai'reb za'ra wa'aba te te 're iromhuri za'ra mono norĩ hã 're iwazéb za'ra wa'aba mono da si. Ta norĩ hã te isazei'wa norĩ hâimanazém na te te 're asimroi wa'wa. Te duré te te aima 're roti wẽ za'ra wa'wa. 13 Ta norĩ hã 're wazé pese za'ra wa'aba mono, duré 're sawi pese za'ra wa'aba mono, isimiromhuri za'ra u'âbâ. Duré rowẽ u'âsi asiré 're aihâimana za'ra wa'aba mono.
14 Wasisãnawã norĩ, ãne wa za duré ãma aima roti za'ra wa'aba ni. Iwa'a norĩ ma hã aimreme tete na tãma 're roti za'ra wa'aba mono. Duré sina 're ihâtâ'â za'ra mono norĩ hã 're pawaptob za'ra wa'aba mono. Duré 'Re ihâimana u'âsi mono te te sina 're i'umnhasi za'ra mono zém na sib'uwa na 're ihâimana za'ra mono norĩ hã 're pawaptob za'ra wa'aba mono. Duré da'ãma 're aiwa'a su'u za'ra wa'aba mono tõ. 15 Ãma 're pibui pese za'ra wa'aba mono, ni'wai ma marĩ iwasédé da te 'manharĩ wa, asa marĩ iwasédé te te dama 'manharĩ tõ da. Iwa'rãmi asima sô 're asõpré wa'aba mono, uburé marĩ mono na iwẽ si asima 're 'manharĩ za'ra wa'aba mono da, duré ni'wam norĩ asiré isazei'õ'wa norĩ ma zama.
16 Ato sina 're aihâimana u'âsi za'ra wa'aba mono. 17 'Re rowaptẽrẽ u'âsi za'ra wa'aba mono. 18 Duré 'Re ihâimana u'âsi mono ãma 're aiwata u'âsi za'ra wa'aba mono, uburé ai'ãma 're iromhâimana za'ra wa'aba mono zém na. E marĩ wa. Ã hã 'Re ihâimana u'âsi mono te te sima 're wẽ, 're 'manharĩ za'ra wa'aba mono da hã, Cristu Zezusihi ãma 're anomro aba mono wa.
19 'Re ihâimana u'âsi mono Pẽ'ẽzani nhimiromhuri wi 're ro'wa'rutu za'ra wa'aba mono tõ. 20 Ni'wa hã 'Re ihâimana u'âsi mono Pẽ'ẽzani te te tãma iwaihu'u zarina, marĩ te te aima waihu'u aba wamhã, isimirowasu'u hã asiwi wẽ'õ wa'aba tõ, taré newa. 21 Uburé marĩ hã 're pibu za'ra wa'aba mono, wẽ zô. Duré iwẽ si asima 're tété za'ra wa'aba mono. 22 Uburé marĩ iwasédé imono bâ 're ihâimana za'ra mono wi, romhâ na 're aihâimana za'ra wa'aba mono.
23 'Re ihâimana u'âsi mono, rowẽ u'â te te wama 're i'anhomri mono hã, aimawi Õhõ ma si 're aihâimana za'ra wa'aba mono da, te te aima i'manharĩ za'ra wa'aba da si, iwẽ hã. Uburé aihâiba uptabi hã, duré aipẽ'ẽzani hã duré aihâiba za'ra wa'wa hã te te aima 're i'madâ'â pese za'ra wa'aba mono da si, aiwasédé, da te ai'ãma 're sa'ra waihu'u za'ra wa'aba mono ãna 're i'aihâimana za'ra wa'aba mono da si, niwa Wanhib'apito Zezu Cristu apâ we imorĩzéb u. 24 Te te sima i'aipisutu za'ra wa'wa hã umnhasi uptabi di. Tahawa ta hã te za tô aima 'manharĩ za'ra wa'wa, ãne hã.
Rob'ui'éré i'rãsudu
25 Wasisãnawã norĩ, wa'ãma 're rowaptẽrẽ za'ra wa'aba mono.
26 Uburé asiré isazei'wa norĩ hã 're sawi za'ra wa'aba mono, tob'rata hârâ na.
27 Wanhib'apito zadawa para, wa ãma aima 'ru za'ra wa'wa, ã hã rob'ui'éré hã sõré za'ra wa'aba da, uburé wasisãnawã norĩ ma.
28 Wa wa te ai'ãma 're rowaptẽrẽ za'ra wa'wa, Wanhib'apito Zezu Cristuhu nhimizawizé hã, ai'ãma 're ihâimana u'âsi za'ra wa'aba mono da si.