3
Tawamhã wanhimipari waihu'u za'ra õ di oto, aiwasu'u za'ra wa'wa hã, wa te waihu'u za'ra ãna wahâimana za'ra da hã. Tahawa, wa tô wasima waihu'u ni, wasiwaprosi wahâimana da Atena ãma hã, 2 duré wasisãnawã Timotiu wa te ãma atẽme satõrĩ za'ra wa'aba da hã. Ta hã wasiré te te 're romhuri, 'Re ihâimana u'âsi mono ma romhuri na, Cristuhu wasu'uwẽ na. Wa ãma satõrĩ ni atẽme za'ra wa'aba hã te te asiptete za'ra wa'aba da, duré 'Re ihâimana u'âsi mono asina 're i'umnhasi za'ra wa'aba mono zém na, asiptete sina ãma 're aihâimana za'ra wa'aba mono da, te te aipawaptob za'ra wa'aba da, 3 aiwi 'mairobzei'õ wa'aba tõ da, da te aima irob'manharĩ wasété za'ra wa'aba u'âbâmhã. Aima waihu'u pese za'ra wa'aba di, ãne na tô, wa te 're iro'rahâri za'ra mono da hã, 'Re ihâimana u'âsi mono te te wa'ãma 're irowa'õtõ za'ra mono zéb zarina. 4 E marĩ wa. Tame ai'rata wahâimana za'ra wa'aba ré hã, wa tô ãma aipo're pu'u za'ra wa'aba ni, za da te tô wama 're irob'manharĩ wasété za'ra mono na hã. Tawamhã ma tô ãne hã wama tiromhâiba tô. Ã hã aima waihu'u pese za'ra wa'aba di. 5 Tahawa, aiwasu'u za'ra wa'wa te waihu'u ãna ĩhâimana da hã, te oto 'wapéi waihu'u õ wa, wa ãma atẽme satõrĩ za'ra wa'wa Timotiu hã, Wanhib'apito Zezu Cristu asina 're i'umnhasi za'ra wa'aba mono zé hã te te waihu'u da, asiptete u'âsi ãma 're aihâimana za'ra wa'aba mono zô, duré ai'ãma ĩhâtâ'â za'ra wa'aba wa, Dapibui'wa hã te te aipibu za'ra wa'aba õ'umnhasite niha na, duré uburé wanhimiromhuri za'ra hã taré hâimana õ'umnhasite zama.Timotiu hã, rowasu'u wẽ apâ te te i'ãwisizé, Paulu norĩ ma
6 Ãhã na hã, Timotiu hã aihawi wa'aba ma tô we apâ watẽme sina siri za'ra. Aiwasu'u wẽ za'ra wa'wa hã ma tô we ãwisi, 'Re ihâimana u'âsi mono asina 're i'umnhasi za'ra wa'aba mono zém na duré 're i'asisawi pese za'ra wa'aba mono zém na zama. Ma tô duré wama aiwasu'u za'ra wa'wa, wa'ãma 're i'aipo're pu'u wẽ u'âsi za'ra wa'aba mono na hã duré wa'madâ'â zahu za'ra wa'aba da, asima iwẽ pese za'ra wa'aba na hã, wa te ai'madâ'â za'ra wa'aba da, wa te wasima iwẽ uptabi za'ra ne. 7 Ãne wasisãnawã norĩ, ropire hã duré robzépada hã ahâ na wama hâimana za'ra nherẽ, aiwasu'u za'ra wa'wa hã, ma wama rowẽ pese za'ra, wa te wapari za'ra wa, 'Re ihâimana u'âsi mono asina 're i'umnhasi za'ra wa'aba mono zém na hã. 8 Tahawa, wasisãnawã norĩ, ãhã na hã apâ wa aptete za'ra ni, Wanhib'apito ãma asiptete sina i'aihâimana za'ra wa'aba zé hã wa te waihu'u za'ra wa. 9 Ãne wa, e niha wa za 'Re ihâimana u'âsi mono ãma wawata za'ra ni, ibâ na hã, asiptete sina ãma 're i'aihâimana za'ra wa'aba mono zém na hã duré watoi uptabi na 'Re ihâimana u'âsi mono nho're iwahâimana za'ra zém na, ai'u'âbâ za'ra wa'aba hã. Waihu'u õ di. 10 Bâtâ na duré mara na zama sa'ẽtẽ, wa wa te 're rowaptẽrẽ u'âsi za'ra, te te wama pisutu za'ra da, wasi'uihâ na wa te ãma asabu za'ra wa'aba da, wa te duré aipawaptob za'ra wa'aba da, 'Re ihâimana u'âsi mono asina 're i'umnhasi za'ra wa'aba mono zé hã ibâ na oto aima hâimana za'ra wa'aba da.
11 Wamama 'Re ihâimana u'âsi mono duré Wanhib'apito Zezusi hã si'uihâ na bâdâdi te te wama isa'ra pese za'ra da si, ãma atẽme za'ra wa'aba, iwasi'aba'rézéb da hã! 12 Wanhib'apito hã asisawi za'ra wa'aba zé hã duré uburé 're idazawi pese za'ra wa'aba mono zéb zama aima sa'ẽtẽ u'âsi za'ra wa'aba mono da, te te aima i'manharĩ za'ra wa'aba da si iwẽ hã, wa te 're i'asawi pese za'ra wa'aba mono ne. 13 Duré aipẽ'ẽ 're, te te 're i'asiptete u'âsi za'ra wa'aba mono da si, iwẽ hã, aiwasédé hã da te ai'ãma 're sa'ra waihu'u za'ra wa'aba mono ãna duré aiwasété ãna zama, Wamama 'Re ihâimana u'âsi mono nho're aimasa wa'aba da, niwa Wanhib'apito Zezusi apâ wei morĩ wa, uburé isib'a'uwẽ norĩ wẽ uptabi na 're ihâimana za'ra mono norĩ siré.