Paulu hã tisiré norĩ me, Tesalonita ãma te te iromhuri za'ra zé
2
Wasisãnawã norĩ, aima waihu'u pese za'ra wa'aba di, wa te ãma i'asabu za'ra wa'aba zé hã, taréi õ na hã. 2 Aima waihu'u pese za'ra wa'aba di duré, Filipu ãma da te wama irob'manharĩ wasété za'ra na hã duré da te wa'ãma iwasété za'ra na hã, tamomo Tesalonita u ãma wasihutu wana ré hã. Wazada dahâimana za'ẽtẽ za'ra nherẽ, wate za'ra 'Re ihâimana u'âsi mono hã ma tô wama sõmri za'ra wanhib'ru hã, Rowasu'uwẽ ihawimhã wa te aima wasu'u za'ra wa'aba da. 3 Wa te i'aiwada'uri za'ra wa'aba zé hã, i'upai õ di duré marĩ iwasédé, wa te wasima wẽ za'ra wab õ di. Duré wa te wasima wẽ za'ra wab õ di, wa te aima rob'rãmi za'ra wa'aba da hã. 4 Tazahã, 'Re ihâimana u'âsi mono te te sima 're iwẽ mono zéb zarina si, wa wa te 're rowasu'u za'ra, ta hã te te wawẽsãmri za'ra wa, duré romhuri hã te te wama sõmri za'ra wa, Rowasu'uwẽ na wa te dama 're rob'mahârâ za'ra mono da. Wa te wasima 're rob'ruiwapari za'ra mono õ di, ti'ai ãma a'uwẽ te te 're iwawẽsãmri za'ra mono da hã. 'Re ihâimana u'âsi mono si, te te 're wa'awẽsãmri mono da si, taha si wapẽ'ẽ 'remhã te te 're wa'apibui mono wa, wa te wasima 're iwẽ za'ra mono zé hã, tô sena zô.5 Aima wawaihu'u pese za'ra wa'aba di, wamreme zasi ãna wa te 're irowasu'u za'ra mono õ na hã wa te aima 're rob'rãmi za'ra mono da hã. Duré rob'uiprazé, wa te aiwi ubumro za'ra wa'aba da hã, Rowasu'uwẽ hã wa te aima wasu'u za'ra wa'aba õ di. Ãne na hã 'Re ihâimana u'âsi mono si te te wawaihu'u pese za'ra di. 6 Niwa, ni'wa hã te te wa'uzei wẽ za'ra zô wasina wanhopré õ di, duré iwa'uzei wẽ za'ra wa'aba zô duré da te wa'uzei wẽ za'ra zô zama. 7 Tô, marĩ hã wa te aré aiwi iwaptẽrẽ zahi za'ra wa'aba da hã iré hã, Cristuhu zadawa wasu'u'wa 're wanomro mono wa. Tane nherẽ, ai'rata wahâimana za'ra wa'aba ré hã, dana hã ti'ra norĩ te te 're i'a'madâ'â pese mono ne, wa tô wanhimizawi wẽ na aima wahâimana zara wa'aba ni. 8 Wama asawi uptabi za'ra wa'aba wa, wa tô wasima rowairébé za'ra ni, Rowasu'uwẽ hã 'Re ihâimana u'âsi mono hawimhã wa te aima sõmri za'ra wa'aba da, duré wasisawi ãna wa te 're aipawaptob za'ra wa'aba mono da. Wama asawi uptabi za'ra wa'aba di tô! 9 Wasisãnawã norĩ, wa'ãma i'aipo're pu'u za'ra wa'aba ré hã tô, wa te iromhuri pese za'ra na hã. Bâtâ na hã duré barana zama wa romhuri pese za'ra ni, asib'ratab za'ra wa'aba wahâimana za'ra tõ da, tame 'Re ihâimana u'âsi mono hawi Rowasu'uwẽ na wa te aima rowasu'u za'ra wa'aba ré hã.
10 Cristuhu zazei'wa norĩ 'rata, ai'rata wahâimana za'ra wa'aba ré hã, sena na wa aima wahâimana za'ra wa'aba ni, duré i'uwaibaba na duré wa te upa za'ra ãna. Atõmo nho'a za'ra wa'aba, duré 'Re ihâimana u'âsi mono nho'a, wa tô ãne hã wahâimana za'ra ni. 11 Duré aima waihu'u pese za'ra wa'aba di, damama hã ti'ra norĩ te te 're i'a'madâ'â wẽ mono ne, aihâiba mono bâ wa te i'ai'madâ'â wẽ za'ra wa'aba na hã. 12 Ãne zarina, rowasu'u na wa tô asiptete za'ra wa'aba ni. Wa tô duré aipẽ'ẽ nhiptete za'ra wa'aba ni. Wa duré aima roti za'ra wa'aba ni, 're aihâimana wẽ za'ra wa'aba mono da, taha zarina 'Re ihâimana u'âsi mono ma, ai'ãma 're rowẽ za'ra wa'aba mono da. Ta hã ma tô aipisutu za'ra wa'wa, Da'ãma 're Isib'a'uwẽ mono zé hã duré sa'ẽtẽ uptabi na 're ihâimana mono zé hã aima 're hâimana za'ra wa'aba mono da.
13 'Re ihâimana u'âsi mono ãma, wa duré 're wawata u'âsi za'ra. E marĩ wa. Isimiroti hã wahawi wapari za'ra wa'aba wa, ma isaze za'ra wa'wa. Mare di, aibâ norĩ nhimiroti da te 're iwapari za'ra mono ne hã. Tazahã, tô sena 'Re ihâimana u'âsi mono nhimiroti 're ihâimana mono, ma isaze za'ra wa'wa. Ta hã te ai'ãma tihâimana za'ra wa'wa, isaze za'ra wa'aba norĩ ãma hã.
Isazei'wa norĩ ma, da te 're irob'manharĩ wasété za'ra mono zé, Zezusihi u'âbâ
14 Ĩsisãnawã norĩ, aima iromhâimana za'ra wa'aba zém ne ma tô duré tiromhâiba, Zudéa na danhipti'a nho'õmo nhisi ãma isazei'wa norĩ, 'Re ihâimana u'âsi mono te, 're isi'ubumroi mono norĩ ma hã, tame Cristu Zezusihi nhib'a'uwẽ 're ihâimana za'ra mono norĩ ma hã. Ta norĩ hã asiré uptabi a'uwẽ nherẽ, ma tô te te aima 're rob'manharĩ wasété za'ra wa'wa, Zudéa ãma isazei'wa norĩ ma, Zudeu norĩ te te 're irob'manharĩ wasété za'ra mono ne. 15 Tô õ norĩ Zudeu norĩ hã ma tô te te 're simro, 'Re ihâimana u'âsi mono zadawa 'mahârâ'wa norĩ hã. Tane ma tô duré Wanhib'apito Zezusi hã siwi hâiba nho, da te wĩrĩ da hã. Tane te duré ãhã na hã te te wama 're rob'manharĩ wasété za'ra. Ta norĩ hã 'Re ihâimana u'âsi mono ma, tihâimanazém na te te 're rowẽ za'ra mono õ di. Duré ta norĩ hã te uburé dazada 're hâimana za'ra. 16 Ta norĩ hã te te sima 're wẽ za'ra, te te wawi 're sawi za'ra mono da, Zudeu'õ norĩ ma danho'reptuzé wasu'u hã wa te 're wasu'u za'ra mono tõ da. Taha na te ta norĩ hã tiwasédé te te 're sa'wari 'rãihâ u'âsi za'ra. Tane nherẽ, ãhã na hã 'Re ihâimana u'âsi mono nhimihâzé ma tô oto isisiwib za'ra hã waptãrã.
Paulu hã Tesalonita u apâ morĩ da, te te sima irowa'õtõzé
17 Wasisãnawã norĩ, romnhimimnhasi te, wa a'â asiti za'ra wa'aba wahâimana za'ra ni, niha bâtâ u. Romhâ na wa wahâimana za'ra ni, wasitõmo nhiti. Tane nherẽ, wapẽ'ẽ na hã wa 'râwi wasi'ratamhã wahâimana za'ra ni. Ai'ãma za'ra wa'aba hã wapẽ'ẽzé uptabi za'ra di. Tahawa wa wasima wẽ za'ra ni, apâ wa te ãma asabu zahu za'ra wa'aba da. 18 Tahawa, wa te ãma asabu za'ra wa'aba neza. Tô wa hã Paulu, wa ĩsima wẽ pese aré, te nasi ãma asabu za'ra wa'aba da hã, õne u'âsi. Tane nherẽ, Satanasi hã ma tô wawi ro'wa'rutu za'ra. 19 E marĩ wa. A norĩ wa'wa hã wasiwawãi ãna 're iwanhimipari za'ra mono zé, Wanhib'apito Zezusi apâ wei imorĩzéb zô, duré watoi u'âsi zé, duré wanhoprezém ne, wa te wasima irowẽ za'ra zéb da hã, niwa apâ wei morĩ wa. 20 Tane tô, a norĩ wa'wa hã wa te wasima 're irowẽ za'ra mono zé, duré watoi u'âsi zé.