'Re ihâimana u'âsi mono nhimizawizé duré rowẽ u'â ite hã ai'ãma 're ihâimana u'âsi za'ra wa'aba mono da si, iwẽ hã.

2 Wa norĩ hã wa te 're rowaptẽrẽ za'ra mono wamhã, 'Re ihâimana u'âsi mono ãma wa 're wawata u'âsi za'ra, uburé ai'ãma za'ra wa'aba. Wa duré wa te ai'ãma 're rowaptẽrẽ u'âsi za'ra wa'wa, te te 're aipawaptob za'ra wa'aba mono da. 3 Wate za'ra Wamama 'Re ihâimana u'âsi mono nho're, wa ãma 're wapo're pu'u u'âsi za'ra, romhuri 're i'manharĩ za'ra wa'aba mono zém na isaze za'ra wa'aba u'âbâ, duré asimizawi za'ra wa'aba zéb zarina 're iromhuri pese za'ra wa'aba mono na hã duré asiwawãi ãna asiptete sina Wanhib'apito Zezu Cristu apâ we imorĩzéb zô i'asimipari za'ra wa'aba zém na hã.

4 Wasisãnawã norĩ, wa waihu'u za'ra ni, 'Re ihâimana u'âsi mono te te 're i'asawi pese za'ra wa'aba mono na hã duré te te sima i'aipisutu za'ra wa'aba na hã, ite da. 5 E marĩ wa. Rowasu'uwẽ hã wa te aima wasu'u za'ra wa'aba wamhã, wamreme na si wa te aima wasu'u za'ra wa'aba õ di. Tazahã, 'Re ihâimana u'âsi mono Pẽ'ẽzani waihu'u pese uptabi na 're ihâimana mono nhimipawaptobzéb zarina, duré Rowasu'uwẽ hã tô sena 'Re ihâimana u'âsi mono nhimiroti na ãma iwasiwawãi õ uptabi za'ra na. Duré aima wawaihu'u pese za'ra wa'aba di, aiwazari wahâimana za'ra wa'aba ré hã, wa te ãma ipibui pese za'ra na hã ai'udâna za'ra wa'aba. 6 Ãma aima iwasisanho za'ra wa'aba zéb zarina, te aihâimana za'ra wa'wa, wanhirã zarina duré Wanhib'apito nhirã zarina.

A norĩ wa'wa hã 're robzépata za'ẽtẽ za'ra wa'aba mono nherẽ, ma tô ato sina iwaibui wẽ wa'wa Cristuhu wasu'u wẽ hã, rowẽ uptabi 'Re ihâimana u'âsi mono Pẽ'ẽzani hawi we 're ine mono ré.

7 Ãne wa, te 're aihâimana za'ra wa'aba mo, uburé Zezu Cristuhu zazei'wa norĩ ma ãma isisanho'wa na, Masédonia duré Acaia ãma danhipti'a nho'õmo 're, 're ihâimana za'ra mono norĩ ma zama. 8 E marĩ wa. Wanhib'apito wasu'u hã aihawib za'ra wa'aba watobro wamhã, Masédonia ãma duré Acaia ãmab zama ma tô ropé. Duré 'Re ihâimana u'âsi mono asina 're i'umnhasi za'ra wa'aba mono zé wasu'u hã ma tô ropé ropâ. Tahawa, taha na wa te inharĩ za'ra da hã wanhimnhasi waihu'u za'ra õ di oto. 9 E marĩ wa. Tame 're isi'ubumroi mono norĩ hã si'uihâ na te te aiwasu'u za'ra wa'aba wa, iwawaibui wẽ wa'aba na hã. Te duré aiwasu'u za'ra wa'wa, romhâiba 'manharĩ ãma 're i'aiwata za'ra wa'aba mono zé irẽme za'ra wa'aba na hã, 'Re ihâimana u'âsi mono hâiba ré 're ihâimana mono ãma si oto 're aiwata za'ra wa'aba mono da, tô sena 're ihâimana mono ãma si. 10 Te duré aiwasu'u za'ra wa'wa, Zezusi, 'Re ihâimana u'âsi mono 'ra zô i'asimipari za'ra wa'aba na hã, 'Re ihâimana u'âsi mono te te ihâiwa'udu apâ hâiwa hawi we imorĩzéb zô, ta hã Zezusi Wa'anho'reptui'wa, 'Re ihâimana u'âsi mono nhimihâzé, za iwisi wi hã.