5 Ãne wa, ma'ãpé 're uprosi pese za'ra wa'aba mono, uburé marĩ ti'ai ãma iwasédé aihâiba 're te te 're iromhuri za'ra wa'aba mono hã, ã norĩ hã: Dasina dahâimana, duré danhiséb õ na marĩ 'manharĩ wasédé, duré marĩ iwasété zô si dasima rob'ruiwapari pe, duré marĩ na danho'ru. E marĩ wa. Marĩ na danho'ru hã ta hã 'Re ihâimana u'âsi mono upana, 're idawata za'ra mono zé. 6 Ãne hã da te 're i'manharĩ za'ra mono u'âbâ, te za 'Re ihâimana u'âsi mono nhimihâzé hã 're rere'e, ni'wam norĩ isimiroti te te 're i'madâ'â za'ra mono õ norĩ nhisiwimhã. 7 A norĩ wa'wa hã 're saze za'ra wa'aba mono õ ré hã, ma tô siwa'ru 're aihâimana za'ra wa'aba mo aré, ãne hã 're 'manharĩ za'ra wa'aba mono ré hã.

8 Tane nherẽ, ãhã na hã ma'ãpé oto rẽme pese za'ra wa'aba, uburé ã norĩ hã: marĩ na dasi'rãzézé hã, duré dasisada dasi'rãiwa'rozé hã duré da'ãma marĩ 'manharĩ wasédé duré damreme iwasété na robzanhamri zama. 9 Asima 're asadawa nhipese za'ra wa'aba mono tõ, aihâimanazé i'rada hã duré taha na marĩ iwasédé 're i'manharĩ za'ra wa'aba mono zé hã rẽme pari za'ra wa'aba wa oto, 10 duré aihâimanazé itém na oto asi'uza za'ra wa'aba wa. Ta hã oto aihâiba ité wa'wa, Tisine ai'manharĩ'wa ne te za 're sihâtéb u'âsi za'ra, 'Re ihâimana u'âsi mono te rowaihu hã ibâ na oto aima 're hâimana za'ra wa'aba mono da. 11 Ã hã dahâimanazé itéb 'remhã, aiwab õ na da'madâ hã oto hâimana õ di. Aiwapsi te oto 're dahâimana za'ra, Zudeu'õ norĩ hã Zudeu norĩ me duré isihâiwata nhihâri'õ, isihâiwata nhihâri ré norĩ me duré ni'wa dasiré a'uwẽ'õ hã darob 're dasiré a'uwẽ me duré wada'uri zarina titede'wai ma romhuri'wa norĩ, wada'uri ãna 're ihâimana za'ra mono norĩ me. Tazahã, Cristuhu si uburé danhipai u, te 're hâimana. Duré uburé te tizazei'wa norĩ wa 're hâimana.

12 Tahawa, a norĩ wa'wa hã 'Re ihâimana u'âsi mono, tinhib'a'uwẽ da, te te sima aipisutu za'ra wa'aba wa, aimawi tãma 're aihâimana za'ra wa'aba mono wa, duré te te 're asawi pese za'ra wa'aba mono wa, ma'ãpé asima sô 're asõpré u'âsi aba mono, da'ãma 're aiba za'ra wa'aba mono da, duré aihâimana wẽ na dama 're aihâimana za'ra wa'aba mono da, duré asi'madâ'â zei ãna, duré marĩ da te dasima 're iwẽ za'ra mono zéb zarina, ãma 're dazaze za'ra wa'aba mono da, mare di, asima iwẽzéb zarina si 're idawati za'ra wa'aba mono da hã, duré da'ãma aiwa'a su'u ãna 're aihâimana za'ra wa'aba mono da. 13 Asi'ãma 're aiwa'a za'ra wa'aba mono tõ. Duré marĩ na asina 're upa za'ra wa'aba mono wamhã, asi'ãma 're 'madâ'â za'ra wa'aba mono tõ. Wanhib'apito hã aiwasédé te te ai'ãma 're i'ab'madâ'â aba mono õ ne, dawasédé hã da'ãma 're 'madâ'â za'ra wa'aba mono tõ. 14 Uburé ã norĩ nhipai u, ma'ãpé dazawizé hã aima 're hâimana za'ra wa'aba mono. E marĩ wa. Dazawi hã te za uburé marĩ hã ibâ na sitẽme te te 're a'ubumro. 15 Cristu hã rowẽ u'â te te aima 're i'anhomri aba mono hã, aipẽ'ẽ 're te te 're i'asimroi wẽ u'âsi aba mono da si iwẽ hã, rowẽ u'âsi na 're aihâimana za'ra wa'aba mono da. E marĩ wa. Tô õ hã rowẽ u'âsi da, ma tô 'Re ihâimana u'âsi mono hã asô tihârâ za'ra wa'wa, dahâiba misi ne asiré 're aihâimana za'ra wa'aba mono da. Tahawa, ma'ãpé 'Re ihâimana u'âsi mono ãma si 're aiwata u'âsi za'ra wa'aba mono. 16 Cristuhu wasu'uwẽ, aiwa sa'ẽtẽ uptabi na 're ihâimana za'ra wa'aba mono da si, iwẽ hã! Tahawa, ma'ãpé asima 're rowahutu za'ra wa'aba mono duré 're asipawaptob za'ra wa'aba mono, uburé rowaihu'u wẽ na hã. Duré asõ're na 'Re ihâimana u'âsi mono ãma 're aiwata za'ra wa'aba mono, Salmu ãma rob'ui'éré zarina duré isazei'wa norĩ nho'rezém na, aipẽ'ẽ 're 'Re ihâimana u'âsi mono ãma ato za'ẽtẽ za'ra wa'aba sina. 17 Uburé marĩ 're 'manharĩ za'ra wa'aba mono sidâpâsi duré 're nharĩ za'ra wa'aba mono sidâpâ, ma'ãpé Wanhib'apito Zezusihi nhisi na 're 'manharĩ za'ra wa'aba mono. Taha u'âbâ duré ãma 're aiwata za'ra wa'aba mono, 'Re ihâimana u'âsi mono Imama ãma.

18 Pi'õ imro ré norĩ, aimro zahâpâ 're aihâimana za'ra wa'aba mono, Wanhib'apito ãma 're inomro mono norĩ hâimanazéb zarina.

19 Aibâ imro ré norĩ, ma'ãpé aimro hã 're sawi pese za'ra wa'aba mono. Duré aihâimana zasi õ na tãma 're aihâimana za'ra wa'aba mono.

20 Da'ra norĩ, ma'ãpé aimama norĩ, ana me 're wapari pese za'ra wa'aba mono, ãne hã Uburé Danhib'apito ma, te te sina tãma 're rowẽ mono wa.

21 Damama norĩ, ai'ra norĩ ma 're ipẽtẽ u'âsi za'ra wa'aba mono zém na 're sahi zani za'ra wa'aba mono tõ, robzei ãna 're hâimana za'ra mono tõ da.

22 Aiwada'uri zarina atede'wai ma romhuri'wa norĩ, ti'ai ãma asib'apito na aima 're ihâimana za'ra wa'aba mono hã, uburé marĩ na 're wapari pese za'ra wa'aba mono, mare di, te te 're ai'madâ'â za'ra wa'aba mono wap si hã, te te 're aiwẽsãmri za'ra wa'aba mono zô. Tazahã, tô sena na aipẽ'ẽ na 're wapari pese za'ra wa'aba mono, Wanhib'apito hã 're iwazé pese za'ra wa'aba mono zéb zarina. 23 Uburé marĩ 're 'manharĩ za'ra wa'aba mono sidâpâsi, ma'ãpé aipẽ'ẽ toi uptabi sina 're 'manharĩ za'ra wa'aba mono, Wanhib'apito ma 're i'manharĩ za'ra wa'aba mono ne, mare di, ti'ai ãma dama 're i'manharĩ za'ra wa'aba mono ne hã. 24 Ma'ãpé ãma 're asipo're pu'u u'âsi za'ra wa'aba mono, za aipawa'â iwaibui wa'aba na hã, Wanhib'apito tinhib'a'uwẽ norĩ ma te te ãma iropisutu siromo zé hã. Ta hã Cristu, Wanhib'apito ma, te 're iromhuri za'ra wa'aba mo. 25 Ni'wa hã marĩ iwasédé te te 'manharĩ wamhã, iwa'rãmi te za tô wa'â, marĩ iwasédé te te i'manharĩzéb zarina. E marĩ wa. 'Re ihâimana u'âsi mono te te da'ãma arowairébé wamhã, aiwab õ na te te da'ãma arowairébé dai õ di.