à hã ibaihâ hã, Paulu ma tô 'Re ihâimana u'âsi mono nhib'a'uwẽ norĩ ma tisõ, Filipu na 'ri nho'õmo nhisi u. Paulu norĩ hã Silaha me, imorĩ'rata na Filipu u simasisi zahuré wamhã, ma tô isazei'õ'wa norĩ hã siwi tiza, dazazéb 're. Tawamhã tame sima'wara ré ma tô dazazéb 're, da'madâ'â'wa hã imro me, duré i'ra norĩ me pawaptob za'ra, Zezusi hã te te saze za'ra da. Tahawa, awẽm na ma tô oto tãma waprosi zahuré ni, apâ pusi da.

à hã ibaihâ hã darob amoi ãma dazazéb 're oto sãmra ré, ma tô ãma rob'ui'éré, Filipu ãma 're isi'ubumroi mono norĩ ma. Paulu hã ma tô tãma waihu'u za'ra, ãne: Zezusihi zazei'wa norĩ hã te za tô te te 're robzépata za'ẽtẽ za'ra. Isazeté'wa norĩ ãma ma tô duré hâtârâ, senai'õ na rowasu'u'wa norĩ hã iwazari 're hâimana za'ra mono wa. Ma tô duré tãma siwasu'u za'ra, te te 're isawi pese za'ra mono na hã. Ma tô duré tãma roti za'ra, Cristuhu nhirã zarina si 're nomro mono da, ta hã sina 're iwata mono õ ne. 'Re ihâimana u'âsi mono hã te te tãma 're iwẽ za'ra mono zéb zarina si, te te 're 'manharĩ za'ra mono da, ma tô duré tãma roti pese za'ra, Cristu hã wedepo'o nhonhi'rãmi na dâ'â wa, Imama hã te te tãma ipisutuzéb zarina, te te sina tãma ãma i'uwaimrami ne.