4 Damama norĩ, ai'ra norĩ ma, 're pẽtẽ u'âsi za'ra wa'aba mono tõ, tiwi 're robzei'õ pese za'ra mono tõ da. Iwa'rãmi, 're prédu wẽ za'ra wa'aba mono 'rãi waihu'u wẽ na. Duré tãma 're roti pese za'ra wa'aba mono, Wanhib'apito nhimiroti na hã.

5 Aiwada'uri zarina atede'wa nhorõwa 're romhuri'wa norĩ, 're wapari pese za'ra wa'aba mono, ti'ai ãma atede'wa na aima 're ihâimana za'ra wa'aba mono hã, tãma aipahi sina duré 're wazé pese za'ra wa'aba mono sina. Ãne hã tô sena 're 'manharĩ za'ra wa'aba mono aipẽ'ẽ na, Cristu hã 're iwapari pese za'ra wa'aba mono ne. 6 Isõ'a si 're iwapari pese za'ra wa'aba mono da hã, mare di, te te 're aiwẽsãmri za'ra wa'aba mono zô hã. Tazahã, aiwada'uri zarina Cristuhu ma romhuri'wa na 're aihâimana za'ra wa'aba mono. 'Re ihâimana u'âsi mono te te sima 're iwẽ mono zép si 're 'manharĩ wẽ za'ra wa'aba mono, aipẽ'ẽ na. 7 Ato sina 're romhuri za'ra wa'aba mono, atede'wa norĩ ma hã. Wanhib'apito ma 're iromhuri za'ra wa'aba mono ne, ãma 're rosa'rata za'ra wa'aba mono. Mare di, ti'ai ãma dama si hã. 8 Ma'ãpé ãma 're aipo're pu'u za'ra wa'aba mono, ãne na: Wanhib'apito hã te za te te dama 're awa'âbâ, da te 're iromhuri wẽ za'ra mono zéb zarina, wada'uri zarina titede'wa nhorõwa 're romhuri'wa norĩ ma, duré niwamhã wada'uri ãna 're ihâimana za'ra mono norĩ ma zama.

9 Wada'uri zarina romhuri'wa norĩ tede'wa norĩ, ma'ãpé ta norĩ hã 're wazé pese za'ra wa'aba mono. Duré tãma 're amhâzépa za'ra wa'aba mono tõ, tãma 're rob'manharĩ wasété za'ra wa'aba mono da hã. Ãma 're aipo're pu'u za'ra wa'aba mono, a norĩ wa'wa duré wada'uri zarina titede'wa nhorõwa 're romhuri'wa norĩ me hã, simisutu 're i'aihâimana za'ra wa'aba mono na, asiré Asib'apito za'ra wa'wa hâiwa ãma 're isãmra mono te na, ta hã uburé aiwapsi te te 're ida'a'madâ'â mono te na.

10 Wa za oto aima roti 'rãsutu za'ra wa'wa: Ma'ãpé 're asiptete u'âsi za'ra wa'aba mono, Wanhib'apito ãma hã duré iwaihu'u pe isiptete uptabi ãma zama. 11 Dasi'wapéi 'manharĩ'wa norĩ uza ihâtete ne, 'Re ihâimana u'âsi mono te te aima 're i'anhomri aba mono na, asi'uza za'ra wa'aba, asiptete sina 're aihâimana za'ra wa'aba mono da, Wa'uburé nhimimramizé wi hã. 12 E marĩ wa. Ti'ai ãma wasiré a'uwẽ norĩ hã wa te 're 'wapé za'ra mono õ wa. Tazahã, hâiwa nho're na siptete na 're ihâimana za'ra mono, wa wa te 're 'wapé za'ra, roti wasété'wa norĩ duré isimiroti wasété pire norĩ duré siptete na ti'ai ãma isazei'õ'wa norĩ robra na 're ihâimana za'ra mono norĩ te te 're iwada'uri wasété za'ra mono norĩ hã. 13 Tahawa, uburé dasi'wapéi 'manharĩ'wa norĩ uza ihâtete ne, 'Re ihâimana u'âsi mono te te aima 're i'anhomri aba mono na, asi'uza za'ra wa'aba, asiptete sina 're aihâimana za'ra wa'aba mono da, bâdâ iwasédé asô 're sihutu aba mono wamhã, duré marĩ te te 're airési za'ra wa'aba mono ãna asiptete sina 're aihâimana za'ra wa'aba mono da, ai'wapé za'ra wa'aba zé hã 're 'rãsutu za'ra mono parimhã.

14 Tahawa, asiptete sina 're anomro aba mono. Dasi'wapéi 'manharĩ'wa norĩ usisizém ne, tô sena 'Re ihâimana u'âsi mono nhimiroti na asi'usisi za'ra wa'aba. Duré dasi'wapéi 'manharĩ'wa norĩ tinho'utu ubuzé te te sima 're iséme mono ne, asima séme aba. Ta hã 're i'anomro wẽ wa'aba mono zé, te wasu'u. 15 Duré aipara uza ne asima séme aba, 're i'asisa'ra pese aba mono zé hã, Rowasu'uwẽ rowẽ u'âsi 're idanomro mono zé hã dama 're 'mahârâ za'ra wa'aba mono da. 16 Duré ibaihâ zapoto 'manharĩ na dasimapazém ne, 'Re ihâimana u'âsi mono hã asina 're umnhasi za'ra wa'aba mono, taha na 're aimapa za'ra wa'aba mono da, Iwasété Uptabi nhimihâzé po'o 'wa ro'o wi hã. 17 Da'rãzaza itete ne^a waibui wa'aba danho'reptuzé hã. Duré 'Re ihâimana u'âsi mono nhimiroti hã sib'ézé 'wapa ne, 're 'wasari aba da, waibui wa'aba, 'Re ihâimana u'âsi mono Pẽ'ẽzani te te aima 're i'anhomri aba mono hã. 18 Uburé ãne hã 're 'manharĩ za'ra wa'aba mono, 'Re ihâimana u'âsi mono wi 're rowaptẽrẽ za'ra wa'aba mono sina, duré isimipawaptobzé tiwi 're waptẽrẽ za'ra wa'aba mono sina. Tiwi 're rowaptẽrẽ u'âsi za'ra wa'aba mono, 'Re ihâimana u'âsi mono Pẽ'ẽzani te te aima 're iwaihu'u za'ra wa'aba mono zéb zarina. Asimiza'rese sina 're aihâimana za'ra wa'aba mono. Aiwi 're robzei'õ za'ra wa'aba mono tõ. Duré 're rowaptẽrẽ u'âsi za'ra wa'aba mono, uburé 'Re ihâimana u'âsi mono nhib'a'uwẽ norĩ ropâ 're ihâimana za'ra mono ãma. 19 Duré ĩ'ãma zama 're rowaptẽrẽ za'ra wa'aba mono, 'Re ihâimana u'âsi mono hã i'uwaibaba na tizadawa wasu'u hã te te ĩma 're awaihu'u mono da, taha na te 're rowasu'u mono wamhã, ĩpahi ãna te dama 're rowasu'u mono da, Rowasu'uwẽ waihu'u ãna aré 're ihâimana mono hã sõ'awi te dama 're wasu'u mono da, da te oto 're waihu'u wẽ za'ra mono da. 20 Cristuhu wasu'u'wa na wa 're ĩhâimana. Rowasu'uwẽ hã te 're iwasu'u mono u'âbâ, wa dazazéb 'remhã za. Tahawa, ĩ'ãma 're rowaptẽrẽ za'ra wa'aba mono, ĩpahi ãna 're ĩhâimana mono da, duré Rowasu'uwẽ na te dama 're rob'mahârâ mono da, te ãma 're uwaimrami mono da, iwasu'u na hã.

21 Tiquicu, wasisãnawã wama isawi pe hã duré Wanhib'apito ma umnhasi na romhuri'wa hã, te za aima ĩwasu'u pese za'ra wa'wa, waihu'u za'ra wa'aba da, ãhã na niha ĩhâimanazém na. 22 Wa ãma atẽme satõrĩ za'ra wa'wa, te te aima wawasu'u za'ra wa'aba da, niha hã ãme iwahâimana za'ra zém na, te te aima wawasu'u za'ra wa'aba wa, taha na asima rowẽ za'ra wa'aba da.

23 Wamama 'Re ihâimana u'âsi mono wi, wa te te 're rowaptẽrẽ, duré Wanhib'apito Zezu Cristuhu wi, rowẽ u'â hã te te aima 're sõmri za'ra wa'aba mono da, duré asimizawizé hã, asina 're i'umnhasi za'ra wa'aba mono siré. 24 Duré 'Re ihâimana u'âsi mono nhimizawizé hã Wanhib'apito Zezu Cristu uburé te te 're i'azawi pese mono norĩ ãma 're ihâimana mono da si iwẽ hã, isimizawizé i'rãsutu waihu'u õ hã!