Zezusi hâiwa u apâ imorĩzéb u hã, Zudeu norĩ si ma tô isimirowasu'u na te te 're saze za'ra. Ta norĩ si te uburé sihâiwata nhihâri ré 're hâimana za'ra, 'Re ihâimana u'âsi mono hã Abra'ãhã ma, te te ipisutuzéb zarina. Zezusi hã hâiwa u apâ morĩ za'u si, ma tô iwasu'uwẽ hã datẽme te te ropé, zudeu'õ norĩ u, isihâiwata nhihâri'õ norĩ u.

Nima norĩ Zudeu norĩ Galasia na danhipti'a nho'õmo nhisi ãma 're isi'ubumroi mono norĩ hã ma tô Paulu hã zudeu'õ norĩ ma wasu'u za'ra, isimiroti na te te ãma i'uwaimrami õ na hã. Ta norĩ hã ma tô ãne hã dama roti za'ra: “Re ihâimana u'âsi mono nhimiroti 'rata na Mozési te te ãma irob'ui'éré zama te za da te 're 'madâ'â pese za'ra, te te 're da'awẽsãmri mono da. Taha da, te za duré 're dasisihâiwata nhihâri za'ra.” Ãne na roti hã Paulu ma tô siwi wẽ'õ pese. Zezusi hã wazada dâ'â wa, duré taha zarina wawasédé hã te te wama 're apari mono wa, danhihâiwata nhihârizé hã marĩ dai õ di. Zezusihi si te za tiwapru na te te 're da'a'upsõ, dawasété hawi. Ãne wa, ma tô Paulu hã tãma rob'ui'éré za'ra, Galasia norĩ ma, aimawi hã te te 're 'manharĩ za'ra mono tõ da, Zezusihi si te te sina 're umnhasi pese za'ra mono da, taha zarina si 'Re ihâimana u'âsi mono Pẽ'ẽzani hã ipẽ'ẽ 're, 're sãmra za'ra mono da.