3 Wamama 'Re ihâimana u'âsi mono nhimizawizé duré ite rowẽ u'â hã, duré Wanhib'apito Zezu Cristuhu te zama, asiré 're ihâimana u'âsi za'ra wa'aba mono da si, iwẽ hã.

4 Zezusi hã ma tô sisõ sisawi ãna, wawasété za'ra da, ãhã na ti'ai ãma dawasété na 're idahâimana za'ra mono zém hawi te te 're wa'azani mono da, Wamama 'Re ihâimana u'âsi mono te te sima iwẽzéb zarina. 5 'Re ihâimana u'âsi mono ãma si wa za ãma 're wawata u'âsi za'ra, õne u'âsi! Tane tô!

6 Wa ai'ãma ĩtob'uzui pese za'ra wa'wa, Cristuhu nhimizawizéb u'âbâ asô Ihârâ za'ra wa'wa hã aiwara sina asiwi rẽme aba wa, rowasu'u aimawi senai'õ u si aipizari za'ra wa'aba da. 7 Tane nherẽ, i'uptabi na hã rowasu'uwẽ aimawi hã hâimana õ di. Tahawa wa ãne ãma aima waihu'u za'ra wa'wa. E marĩ wa. Ni'wam norĩ hã te tinhimirowasu'u na aiwi ro'wa'rutu za'ra wa'wa. Ta norĩ hã te sima wẽ za'ra, Cristuhu wasu'uwẽ hã te te ãma siwi saprĩ da. 8 Ni'wa hã, duré niwamhã wa norĩ hã duré niwamhã hâiwa hawi romhuri'wa hã rowasu'u aimawi na wa te aima 're irowasu'u za'ra wa'aba mono nhiti te te aima 'mairowasu'u aba wamhã, taha ma 'Re ihâimana u'âsi mono hã iwasété uptabi te te tãma ipisutu da si tô! 9 Wa tô ãma aima rowasu'u pari za'ra wa'aba ni. Wa za duré ãma sahu, ãne: Ni'wa hã, Rowasu'uwẽ isaze za'ra wa'aba upana, rowasu'u aimawi na te te aima rowasu'u za'ra wa'aba wamhã, taha ma, 'Re ihâimana u'âsi mono iwasété uptabi hã te te tãma ipisutu da si tô! 10 E te ĩsima sô 're rob'ruiwapari mono bâ, da te dasiwi 're iwẽsãmri mono da hã. 'Re ihâimana u'âsi mono si te te iwẽsãmri da, te ĩsima 're iwẽ mono hã. E ãhã na hã te oto ĩsima wẽ bâ bété, te dama arowẽ da hã, ĩhâimanazém na. Te ĩsima wẽ 'wa'âhã, wa hã aré Cristuhu ma romhuri'wai õ di.

11 Ĩsisãnawã norĩ, tô sena wa za aima waihu'u za'ra wa'wa. Rowasu'uwẽ te 're iwasu'u mono hã, ti'ai ãma a'uwẽ norĩ nhimiropoto õ di. 12 Ni'wai ãma te waihu'u õ di, duré ni'wa hã ãma ĩma sisanho õ di. Tazahã, Zezu Cristuhu si si'uihâ na ma tô ĩma hâi'ré.

13 Ma tô 're iwapari za'ra wa'aba mo, 're ĩhâimana 'rata mono zé wasu'u hã, Zudeu norĩ nhimizaze zarina 're ĩhâimana mono ré hã. 'Re ihâimana u'âsi mono zazei'wa norĩ ma, wa tô te tãma 're arob'manharĩ wasété, ãma 're ĩsiwamri za'ra mono ãna. Wa tô duré te ĩsima 're wẽ aré, te 're a'uprosi mono da. 14 Ã hã danhimizaze na 're ĩhâimana mono ré hã, ĩsiré ãma iwahum norĩ nhipai u pese, wa te te 're 'madâ'â pese. Duré isipai u za'ra, wa tô sena uptabi, ãma 're ĩhâimana, wahi'rata norĩ hâimanazém na hã.

15-16 Tane nherẽ, 'Re ihâimana u'âsi mono hã tinhimizawizém na ma tô sima ĩpisutu, ĩpoto wana ré. Ma tô ĩzô hâ, te tãma 're romhuri mono da. Tawamhã Zudeu'õ norĩ ma, Rowasu'uwẽ na iwasu'u hã te dama 're wasu'u mono da, ti'ra te te ĩma hâi'ré da, te te sima rowairébé wamhã, ni'wa sô ĩrĩtĩ õ di, tinhimiroti na te te ĩpawaptob da. 17 Duré Zeruzalẽ u ĩmorĩ õ di, te sabu za'ra da, ĩwana ré Cristuhu zadawa wasu'u'wa norĩ hã. Tazahã, õne haré wa tô mo, Arabia u. Taha pari wa tô duré apâ mo, Damascu u. 18 Si'ubdatõ wahu parimhã, wa tô oto mo Zeruzalẽ u, Pedru hã te waihu'u wẽ da, te sõpẽtẽ da. Tamemhã maparane romhuri na wa tô isiré nhamra. 19 Tawamhã isiré Cristuhu zadawa wasu'u'wa norĩ hã te 'manhopẽtẽ õ di. Tiaguhu si wa tô sõpẽtẽ, Wanhib'apito no si.

20 Tô sena wa ãma aima ĩsiwasu'u za'ra wa'wa, 'Re ihâimana u'âsi mono nho'a. Ĩzadawa nhipese na te ãma aima rob'ui'éré za'ra wa'aba õ di.

21 Taha parimhã, wa tô oto mo Siria na ti'a nhisi u, duré Silisia na ti'a nhisi u zama. 22 Zudéa ãma Cristuhu zazei'wa norĩ hã te te siwi ĩhâiba pibui õ di, taha bâtâ mono na hã. 23 Ãne si, ma tô ĩwasu'u hã te te 're wapari za'ra: “Te te aré wama 're i'arob'manharĩ wasété mono hã, te te oto 're 'mahârâ, Wanhib'apito da te dasina 're i'umnhasi za'ra mono zé hã, iwana ré te te aré sima 're iwẽ mono hã te te uprosi da.” 24 Tahawa, te 'Re ihâimana u'âsi mono ãma 're wata za'ra, ĩ'ãma isisaprĩ u'âbâ.