Paulu hã, Wanhib'apito zadawa wasu'u'wa norĩ te te siwi i'âri wẽ zé
2
Tawamhã 14 na wahu pari, wa tô apâ ĩsina siri Zeruzalẽ u, Barnabéhé me. Titu hã wa tô duré ĩsiré saprõ. 2 Tamomomhã, wa tô apâ ĩsina siri, 'Re ihâimana u'âsi mono te te ĩma hâi'ré wa, ãne hã te 'manharĩ da. Tamemhã, isazei'wa norĩ 'madâ'â'wa norĩ me wahâiba pisutu wasi'rã'õtõ wamhã, wa tô ãma tãma rowasu'u za'ra, Rowasu'uwẽ te 're iwasu'u mono na Zudeu'õ norĩ ma. Te ĩsima wẽ õ di, romhuri te i'manharĩ pari hã, duré ãhã na te 're i'manharĩ mono hã taré ihâimana da hã. 3 Titu hã ma tô ĩsiré tihâiba. Ta hã Gregu na 're hâimana mono nherẽ, da te tãma 'ru zahi õ di, isisihâiwata nhizâri da hã. 4 Ni'wam norĩ watẽme ma tô asisi sa'rese ãna wapsãi'a'wa ne, wasiré isazei'wa newa. Ta norĩ hã ma tô aré sima wẽ za'ra, Tituhu ma, te te 'ru zahi za'ra da, sisihâiwata nhizâri da. Ma tô duré sima wẽ za'ra, Cristu Zezusihi ãma wasima iwẽ na 're iwahâimana za'ra mono zéa hã te te wawi waihu'u za'ra da, duré titede'wai ma wada'uri zarina romhuri'wa 're ihâimana za'ra mono ne, apâ 're wahâimana za'ra mono da. 5 Tane nherẽ, niwamhã ta norĩ ãma wa te ãma sasõmri waihu'u za'ra õ di. E marĩ wa. Rowasu'uwẽ sena na 're ihâimana mono si aima 're hâimana u'âsi za'ra wa'aba mono da, wa te wasima wẽ za'ra wa.6 Ni'wam norĩ hã isazei'wa norĩ 'madâ'â'wa na da te 're i'madâ'â za'ra mono hã, rosa'rada ité hã te te ĩma sõmri za'ra õ di. Ĩma hã marĩ dai õ di tô, 're ihâimana za'ra mono zé hã. E marĩ wa. 'Re ihâimana u'âsi mono hã te te da'ãma 're arowairébé mono õ wa, romana wawi 're idahâimana za'ra mono zéb zarina. 7 Tazahã, ma tô 'madâ'â waihu'u za'ra, 'Re ihâimana u'âsi mono te te ĩpisutu na hã Rowasu'uwẽ te 're 'mahârâ mono da, Zudeu'õ norĩ ma, Pedru hã Zudeu norĩ ma, te te ãma 're irob'mahârâ mono ne. 8 E marĩ wa. 'Re ihâimana u'âsi mono tiwaihu'u pese uptabi na ma tô ĩpisutu, Rowasu'uwẽ hã Zudeu'õ norĩ ma, te 're wasu'u mono da, Pedru hã Zudeu norĩ ma, te te tãma 're wasu'u za'ra mono da, te te ipisutu ne. 9 Tiagu hã duré Pedru duré Zuwãhã zama, isazei'wa norĩ 'madâ'â'wa na da te 're i'madâ'â za'ra mono norĩ hã ma tô waihu'u za'ra, 'Re ihâimana u'âsi mono ã hã romhuri iwẽ uptabi aimawi te te ĩma isõmri na hã. Tahawa, ma tô siwi ĩzawi Barnabéhé zama sib'rata tete na, da te wawaihu'u za'ra da, wa te wasiré 're iromhuri za'ra mono na. Ãne zarina, wa tô wasima waihu'u za'ra ni, wa norĩ hã Zudeu'õ norĩ u, wa te 're romhuri mono da, duré õ norĩ hã Zudeu norĩ u. 10 Ãne si, ma tô misi marĩ hã wawi waptẽrẽ za'ra: Ãma 're wapo're pu'u mono da, Wanhib'apito zazei'wa norĩ isibrob'õ norĩ ãma. Tahawa ta hã te 're 'manharĩ u'âsi mono da si, wa sada 're ĩsisapẽtẽ.
Paulu hã, Pedruhu ma te te ipẽtẽzé
11 Tane nherẽ, Pedru hã Ãtioquia u wei wisi wamhã, danho'a wa tô sada ĩhâiba, te te ãma upai uptabi wa. 12 Ãne ma tô tiromhâiba: Aibâ norĩ, Tiagu te te ãma isatõrĩ za'ra, ãma sihutu wana ré, Pedru hã ma tô nasi aré tisa, Zudeu'õ norĩ siré. Tane nherẽ, aibâ norĩ oto ãma sihutu wamhã, ma tô tiwi ai'ré za'ra, Zudeu'õ norĩ wi. Ma tô duré tiwi sina tipahâ za'ra. Ãne hã ma tô 'manha, Zudeu norĩ ma pahi wa, ta norĩ hã ãma 're simizaze za'ra mono wa, Zudeu'õ norĩ hã uburé 're sisihâiwata nhihâri za'ra mono da. 13 Tane duré wasisãnawã norĩ Zudeu norĩ hã ma tô hâimana si'ahâ na 're ihâimana za'ra mono ne tihâimana za'ra, Pedruhu ne. Tawamhã Barnabéhé zama ma tô ãma sasõmri za'ra. 14 Tawamhã tô sena Rowasu'uwẽ zarina ihâimana za'ra õ na te 'madâ'â za'ra wamhã, wa tô Pedruhu ma tinha danho'a, ãne: “A hã Zudeu. Tane nherẽ, Zudeu norĩ hâimanazém na aihâimana õ di. Zudeu'õ norĩ hâimanazém na si te ãhã na hã aihâiba. Tahawa, e niha te za bété tãma i'ru zahi za'ra, Zudeu'õ norĩ hã Zudeu norĩ hâimanazém na oto 're hâimana za'ra mono da hã.”
15 Wa norĩ hã, Zudeu na wa 're wahâimana za'ra tô, wapoto hawim haré. Mare di, Zudeu'õ norĩ “siwa'ru tiwasédé te te 're i'manharĩ za'ra mono” na da te 're i'mahârâ za'ra mono ne hã. 16 Tane nherẽ, wama waihu'u pese za'ra di, Zezu Cristu da te dasina 're i'umnhasi za'ra mono zéb zarina si, 'Re ihâimana u'âsi mono te te 're ida'awẽsãmri mono na hã. Mare di, 'Re ihâimana u'âsi mono nhimiroti zahi na Mozésihi te te ãma irob'ui'érézé, da te 're i'madâ'â pese za'ra mono zarina hã. Tane duré wa norĩ zama, Cristu Zezusi hã wa tô saze za'ra ni, 'Re ihâimana u'âsi mono hã te te 're wa'awẽsãmri mono da, Cristu hã wa te wasina 're i'umnhasi za'ra mono zém na. Mare di, 'Re ihâimana u'âsi mono nhimiroti zahi na Mozési te te ãma irob'ui'éré te te i'ru, wa te 're 'manharĩ za'ra mono wẽ te hã. E marĩ wa. 'Re ihâimana u'âsi mono hã ni'wa te te wẽsãmri waihu'u õ wa tô, Mozésihi nhimi'ui'éré na roti zahi te te i'ru, te te ãma 're uwaimrami mono wẽ te. 17 Wa norĩ hã Zudeu norĩ, Cristuhu ãma 're wahâimana za'ra mono wa, 'Re ihâimana u'âsi mono te te 're wa'awẽsãmri mono da, wasima sô 're wanhopré mono wamhã, ãne wamhã, sõ'awi wa za wa te 're waihu'u za'ra, wa norĩ zama wawasété na 're iwanomro mono na hã, Zudeu'õ norĩ ne. Ãne wamhã, e wa za wa te ãma 're rosa'rata upa za'ra, Cristu hã 're wawasété za'ra mono da, te te 're iwanhimroi mono na hã. Mare uptabi di. 18 Wa hã, marĩ te irẽme na apâ te 're rowahutu mono wamhã, wa aré ãma upai pese. Ta hã te irẽme, Mozésihi nhimi'ui'éré na roti zahi. 19 Ãhã na hã 're ĩhâimana mono õ di oto, 'Re ihâimana u'âsi mono nhimiroti zahi na Mozési te te ãma irob'ui'érézé ma hã. Taha ma, wa tô dârâ tô, 'Re ihâimana u'âsi mono ma si oto 're ĩhâimana mono da. Cristuhu siré wa tô dârâ oto, wedepo'o nhonhi'rãmi na. 20 Tahawa, wa hã oto 're ĩhâimana mono õ di. Cristuhu si te oto ĩwa 're hâimana. Ã hã ĩhâimanazé hã, 'Re ihâimana u'âsi mono 'ra te 're umnhasi mono sina, wa 're ĩhâimana, ĩzawi pese 'wai ma duré ĩzada isisõmri ma. 21 Te ĩsiwi wẽ'õ waihu'u õ di, 'Re ihâimana u'âsi mono nhimizawizé hã. E marĩ wa. 'Re ihâimana u'âsi mono nhimiroti zahi na Mozési te te ãma irob'ui'érézéb zarina 're dahâimana za'ra mono wẽ te, 'Re ihâimana u'âsi mono te te 're da'awẽsãmri mono 'wa'âhã, marĩ dai õ di aré, Cristu idâ'âzé hã.