'Re ihâimana u'âsi mono iwẽ te te dama 're i'apisutu mono zé, da te dasina 're i'umnhasi za'ra mono zéb zarina
3
Galata ãma 're i'ai'ubumroi wa'aba mono norĩ, i'ai'rã nhimiza'rese za'ra wa'aba õ! E 'wa hã ma ai'rãiwamnarĩ za'ra wa'wa. Zezu Cristu wedepo'o nhonhi'rãmi na da te dasiwi isasõmrizé hã wa tô asõ're aima wasu'u pese za'ra wa'wa, atõmo na idâ'âzé asiwi i'madâ'â aba ne hã. 2 Wa ĩsima wẽ, misi marĩ hã te waihu'u da: E 'Re ihâimana u'âsi mono nhimiroti zahi na Mozési te te ãma irob'ui'érézé 're i'madâ'â pese za'ra wa'aba mono zarina, ma tô iwaibui wa'wa, 'Re ihâimana u'âsi mono Pẽ'ẽzani hã. E niwamhã Rowasu'uwẽ hã wapari za'ra wa'aba wa, duré saze za'ra wa'aba wa. 3 E niha te merẽ ai'rã nhimiza'rese ãna oto aihâimana za'ra wa'wa. Isazei'wa na aihâimanazé hã ma ãma isãna'rata za'ra wa'wa, 'Re ihâimana u'âsi mono Pẽ'ẽzani waihu'u pese uptabi na 're ihâimana mono te te i'aipawaptob za'ra wa'aba na hã. E niha te tane nherẽ, ãhã na hã asima iwẽ za'ra wa'wa, asihawi asiptete na oto ai'aba'réi wa'aba da, ti'ai ãma aihâimanazé i'rãsutu za'ra wa'aba zéb u. 4 E taré te tihâimana za'ra, uburé marĩ 're isépata za'ra wa'aba mono zé hã. Ĩma hã taréi õ di! 5 'Re ihâimana u'âsi mono si ma tô Tipẽ'ẽzani hã aima sõmri za'ra wa'wa. Ta hã ma tô marĩ dama i'manharĩ waihu'u'õ hã te te 're ab'manharĩ, ai'reb za'ra wa'aba hã. E tane nherẽ, Mozésihi nhimi'ui'éré na roti zahi hã 're i'madâ'â pese za'ra wa'aba mono zéb zarina, ãne hã te te 're ab'manharĩ. E niwamhã Rowasu'uwẽ hã wapari za'ra wa'aba wa, duré saze za'ra wa'aba wa.6 Ma'ãpé ãma aipo're pu'u za'ra wa'aba, Ibaihâ Iwazé pese na rob'ui'éré inomro na, Abra'ãhã wasu'u na, ãhã na: “Abra'ã hã ma tô saze, 'Re ihâimana u'âsi mono. Tahawa, 'Re ihâimana u'âsi mono hã ma tô wẽsã.” 7 Tahawa, waihu'u za'ra wa'aba, Abra'ãhã nhihudu uptabi na 're ihâimana za'ra mono hã, tô ni'wam norĩ 'Re ihâimana u'âsi mono te te sina 're i'umnhasi za'ra mono. 8 Ãne hã romhâimana wana ré, 'Re ihâimana u'âsi mono hã ma tô tinhimiroti na Ibaihâ Iwazé pese na waihu'u siro, Zudeu'õ norĩ za te te 're i'awẽsãmri mono na hã, te te sina 're i'umnhasi za'ra mono zéb zarina. Tahawa, bâdâ iwa waptã'ã wana ré, ma tô Abra'ãhã ma waihu'u siromo za'ra, Rowasu'uwẽ 'Re ihâimana u'âsi mono nhimiroti hã, ãne: “Ai'u'âbâ, wa za iwẽ hã te dama 're apisutu, uburé dapoto mono bâ.” 9 Abra'ã hã ma tô saze, 'Re ihâimana u'âsi mono. Tahawa iwẽ hã ma tô tãma pisutu. Ãne zarina, uburé te te 're isaze za'ra mono norĩ ma, iwẽ hã te za 'Re ihâimana u'âsi mono te te tãma 're apisutu, Abra'ãhã ma te te ipisutu ne.
10 Ni'wam norĩ hã Mozésihi nhimi'ui'éré na roti zahi te te 're i'madâ'â pese za'ra mono zép si te te 're umnhasi za'ra mono wamhã, te za 're hâimana za'ra, 'Re ihâimana u'âsi mono iwasédé te te dama 're i'apisutu mono zéb 're. E marĩ wa. Ibaihâ Iwazé pese na rob'ui'éré hã nomro wa, ãne: “Mozésihi nhimi'ui'éré na roti zahi, ni'wa hã imono bâ te te 're ab'madâ'â pese mono õ wamhã, te za siwi wẽ'õ pese, 'Re ihâimana u'âsi mono hã.” 11 Tô ibâ tô, 'Re ihâimana u'âsi mono hã, ni'wa te te wẽsãmri õ di za, Mozésihi nhimi'ui'éré na roti zahi te te 're i'ab'madâ'â pese mono zéb zarina, Ibaihâ Iwazé pese na isimiroti zahi na rob'ui'éré hã nomro wa, ãne: “Ni'wam norĩ hã 'Re ihâimana u'âsi mono te te sina 're i'umnhasi za'ra mono zéb zarina, te te 're i'awẽsãmri mono norĩ si te za 're hâimana u'âsi za'ra, rowẽ uptabi na.” 12 Mozésihi nhimi'ui'éré na roti zahi hã, 'Re ihâimana u'âsi mono, da te dasina 're i'umnhasi za'ra mono zém nei õ di. Tazahã, ãne Ibaihâ Iwazé pese na rob'ui'éré inomro hã: “Ni'wa hã, Mozésihi nhimi'ui'éré na roti zahi nima hã te te 'madâ'â nhimini ãna te te 're a'madâ'â pese mono wamhã, taha na te za tô 're hâimana u'âsia, rowẽ uptabi na.”
13 Cristu hã ma tô wa'awa'â, 'Re ihâimana u'âsi mono nhimi'ahârizé wi, Mozésihi nhimi'ui'éré na roti zahi, wa te 're 'madâ'â pese waihu'u za'ra mono õ wa. Wa'upana ma tô 'Re ihâimana u'âsi mono nhimihâzé hã sina uwaimra, Ibaihâ Iwazé pese na rob'ui'éré inomro zarina, ãne: “Ni'wam norĩ, wedepo'o nhonhi'rãmi na, da te 're isasõmri za'ra mono hã te 'Re ihâimana u'âsi mono nhimi'ahârizéb 're, 're hâimana za'ra.” 14 Cristu ma tô ãne hã 'manha, 'Re ihâimana u'âsi mono iwẽ na Abra'ãhã ma te te ãma iropisudu hã Zudeu'õ norĩ ma, te te 're sõmri mono da. Cristu Zezusihi u'âbâ, ma tô te te dama 're anhomri, uburé wa norĩ hã 'Re ihâimana u'âsi mono, Tipẽ'ẽzani te te wama ãma iropisutu za'ra hã wa te 're waibui mono da, Zezusi wa te wasina 're i'umnhasi za'ra mono zéb zarina.
'Re ihâimana u'âsi mono te te iropisutuzé, duré isimiroti zahi na Mozési te te irob'ui'érézé
15 Ĩsisãnawã norĩ, wa za aima romnhimiré'é za'ra wa'wa, bâtâ sidâpâ 're idahâimana za'ra mono zém na, ãne: Ni'wam norĩ hã marĩ na sisaze zahuré wamhã, te za ãma sisihâtâ zahuré, te te sima iropisutu zahuré zém na hã. Tawamhã ni'wa hã te te tiwi pru waihu'u zahuré õ di za. Duré te te ãma tiwi sipai waihu'u zahuré õ di za. 16 Tane 'Re ihâimana u'âsi mono hã ropisutu zahi ma tô Abra'ãhã ma 'manharĩ za'ra, duré misi isihudu ma zama. Ibaihâ Iwazé pese na rob'ui'éré hã te nomro, 'Re ihâimana u'âsi mono Abra'ãhã ma, te te iropisutu zahi na hã duré misi isihudu ma. Taha na rob'ui'éré hã da'ahâ ma nomro õ di. Misi dahâiba ma si, tô ta hã Cristuhu ma si. 17 Wa ĩsima wẽ, ãne te aima roti za'ra wa'aba da: 'Re ihâimana u'âsi mono, ma tô ropisutu zahi hã 'manha, Abra'ãhã ma. Tawamhã ma tô tãma ropisutu, te te ãma uwaimrami da. Ta hã roti zahi Mozési te te ãma irob'ui'éré hã, 430 na da'ãma wahu pari te te dama isõmri hã, 'Re ihâimana u'âsi mono te te iropisutuzé hã te te pru waihu'u õ di, duré te te pari waihu'u õ di. 18 'Re ihâimana u'âsi mono tinhoprubzém na, Abra'ãhã ma te te ãma iropisudu hã, Mozésihi nhimi'ui'éré na roti zahi zarina 'wa'âhã, tawamhã ropisutu zahi zarina hâimana õ di aré. Tane nherẽ, 'Re ihâimana u'âsi mono hã ma tô tinhoprubzé hã tãma tisõ, tô wa'âbâ ãna, ropisutu zahi hã te te tãma i'manharĩ zarina.
19 Tawamhã, e marĩ da, te Mozésihi nhimi'ui'éré na roti zahi hã 're hâimana. Ta hã ma tô 'Re ihâimana u'âsi mono hã dama tisõ, te te dama hâi'ré da, te te sima 're iwẽ mono zé wa'rãmi, uburé marĩ 're ihâimana za'ra mono hã. Mozésihi nhimi'ui'éré na roti zahi hã 'Re ihâimana u'âsi mono, hâiwa hawi romhuri'wa norĩ zadawa na ma tô Mozésihi ma waihu'u. Tawamhã ta hã aré tô 're ihâimana mono da hã, Abra'ãhã nhihudu we imorĩzéb u, taha ma, 'Re ihâimana u'âsi mono ropisudu te te 'manharĩ wa. 20 Tane nherẽ, damreme 'mahârâ'wa hã hâimana waihu'u õ di, ni'wa misi hâimana wamhã. Sadai õ di, 'Re ihâimana u'âsi mono hã misi pese 're hâimana mono wa.
'Re ihâimana u'âsi mono nhimiroti zahi na, Mozési te te irob'ui'érézé
21 E tawamhã Mozésihi nhimi'ui'éré na roti zahi hã, 'Re ihâimana u'âsi mono te te i'aropisutu zada, te 're hâimana. Mare di! E marĩ wa. Dahâimana u'âsi zém nhomri'wa da, Mozésihi nhimi'ui'éré na roti zahi hã 're hâimana mono 'wa'âhã, taha zarina te aré 'Re ihâimana u'âsi mono te te 're da'awẽsãmri, da te 're i'madâ'â pese za'ra mono zéb zarina. 22 Tane nherẽ, Ibaihâ Iwazé pese na rob'ui'éré hã te tinha ãne: Ti'ai ãma uburé pese isazei'õ'wa 're idahâimana za'ra mono hã te dawasété nhimiwada'uri zarina si 're dahâimana za'ra, taha zarina 'Re ihâimana u'âsi mono te te iropisutuzé te te 're isaze za'ra mono norĩ te te 're waibui mono da, Zezu Cristu te te sina 're i'umnhasi za'ra mono zéb zarina.
23 Tane nherẽ, Cristu, da te dasina 're i'umnhasi za'ra mono zéb da, bâdâ iwa waptã'ã õ ré hã, dazazéb 're, 're idasimasa mono ne, wa aré 're wahâimana za'ra, Mozésihi nhimi'ui'éré na roti zahi 're, da te dasina 're i'umnhasi za'ra mono zéb da hã za we isihâi'rézéb u. 24 Ãne wa, Mozésihi nhimi'ui'éré na roti zahi hã ma tô te te wama 're roti za'ra aré, Cristu hã we imorĩzéb u, wa te wasina 're i'umnhasi za'ra mono zém na si 'Re ihâimana u'âsi mono te te 're wa'awẽsãmri mono da oto.
25 Ãhã na hã, bâdâ ma tô oto iwa waptãrã tô, Cristu wa te wasina 're i'umnhasi za'ra mono zéb da hã. Tahawa 're wanhimnhasi za'ra mono õ di za oto, Mozésihi nhimi'ui'éré na roti zahi te te wama 're iroti za'ra mono zô hã.
26 E marĩ wa. Cristu Zezusi hã asina 're i'umnhasi za'ra wa'aba mono zéb zarina, te uburé oto 'Re ihâimana u'âsi mono 'ra na 're aihâimana za'ra wa'aba mo. 27 E marĩ wa. Â dawabzuri hã ma tô i'manharĩ za'ra wa'wa, Cristuhu ãma oto 're aihâimana za'ra wa'aba mono da. Ãne wa, ma tô oto asi'uza za'ra wa'wa, Cristuhu hâimanazé iwẽ uptabi na oto 're aihâimana za'ra wa'aba mono da. 28 Ãne zarina, 'Re ihâimana u'âsi mono hã aiwab õ na te te 're ab'madâ'â mono õ di, Zudeu norĩ hã Zudeu'õ norĩ me, duré wada'uri zarina titede'wai ma romhuri'wa norĩ, wada'uri ãna sima iwẽ na 're ihâimana za'ra mono norĩ me, duré aibâ norĩ pi'õ norĩ me. Uburé a norĩ wa'wa hã, misi aihâiba ne te oto 're aihâimana za'ra wa'aba mo, Cristu Zezusihi ãma 're aihâimana za'ra wa'aba mono wa. 29 Tawamhã Cristuhu te na oto 're anomro aba mono wa, te Abra'ãhã nhihudu na 're anomro aba mo. Ãne zarina, te za duré iwaibui wa'wa, 'Re ihâimana u'âsi mono te te ãma iropisutuzé hã.