6 Tawamhã i'ra na oto tãma 're i'aihâimana za'ra wa'aba mono na sihâi'ré da, 'Re ihâimana u'âsi mono hã ma tô Ti'ra Pẽ'ẽzani hã we atẽme satõrĩ za'ra wa'wa aipẽ'ẽ aba u. Ta hã Ipẽ'ẽzani hã te 're wata, hârâ 'rãihâ na ãne: “Ĩmama, ĩma i'asawi uptabi.” 7 Ãne wa, wada'uri zarina titede'wai ma romhuri'wa ne 're anomro aba mono õ di oto, 'Re ihâimana u'âsi mono 'ra na oto 're anomro aba mono wa. Tawamhã i'ra na oto 're aihâimana za'ra wa'aba mono wa, a norĩ wa'aba ma zama te za 'Re ihâimana u'âsi mono hã te te aima 're anhomri 'wa, uburé marĩ ti'ra norĩ ma te te 're i'anhomri mono da hã.

8 'Re saze za'ra wa'aba mono õ ré hã, 'Re ihâimana u'âsi mono, 're waihu'u za'ra wa'aba mono ãna, ma tô aré 're aihâimana za'ra wa'aba mo. Tahawa wada'uri zarina titede'wai ma romhuri'wa ne, te aré 're aihâimana za'ra wa'aba mo, ihâiba'õ norĩ ma romhuri'wa na, ta norĩ hã tô i'uptabi õ nherẽ. 9 Tane nherẽ, ãhã na hã 'Re ihâimana u'âsi mono aima waihu'u pese za'ra wa'aba di oto. Ma. Tô 'Re ihâimana u'âsi mono hã te te aiwaihu'u pese za'ra wa'aba di. E niha te ãne nherẽ, apâ asina siri za'ra wa'aba da, asima iwẽ za'ra wa'wa, ihâiba'õ norĩ hâiwa nho're na siptete na te te 're idawada'uri wasété za'ra mono norĩ u hã, ta norĩ hã sib'uware nherẽ, duré tarére nherẽ. E niha te duré asima iwẽ za'ra wa'wa, wada'uri zarina titede'wai ma romhuri'wa ne, ta norĩ ma, apâ 're aihâimana za'ra wa'aba mono da hã. 10 E marĩ da, te asima iwẽ za'ra wa'wa, dato Zudeu norĩ tozé hã 're 'madâ'â pese za'ra wa'aba mono da, bâdâ ipire norĩ hã, duré a'amo ipire norĩ hã, duré a'ẽ ta'azé hã duré wahub zama, taha zarina asõ'reptuzé hã asina 're uwaimrami za'ra wa'aba mono da newa. 11 Ai'ãma ĩhâtâ'â uptabi za'ra wa'aba di. E tawamhã romhuri te atẽme i'manharĩ za'ra wa'wa hã, marĩ dai õ di.

12 Ĩsisãnawã norĩ, wa za ãma aiwi waptẽrẽ za'ra wa'wa: Ma'ãpé ĩsine 're aihâimana za'ra wa'aba mono, wa hã asine za'ra wa'aba, 're ĩhâimana mono wa. Duré tame ai'rata ĩnhamra za'ra wa'aba ré hã, marĩ iwasédé ĩma 'manharĩ za'ra wa'aba õ di. 13 E ma tô ãma aipo're pu'u za'ra wa'wa, marĩ wa, imorĩ'rata na Rowasu'uwẽ na te aima irowasu'u za'ra wa'aba na hã. Ĩhâzé wa, wa tô ãma aima rowasu'u za'ra wa'wa. 14 Ĩhâzé ipire ĩ'ãma hâimana wa, te ĩsina aima ropire hã wazere za'ra wa'aba nherẽ, asiwi ĩwẽ'õ aba õ di. Duré asiwi ĩzatõrĩ aba õ di, ĩmorĩ da hã. Iwa'rãmi, ma asiwi ĩ'âri wẽ wa'wa, 'Re ihâimana u'âsi mono te hâiwa hawi romhuri'wa ne hã, niwamhã wa hã Zezu Cristuhu ne hã. 15 Bété oto ãhã na hã, e mahãta rowẽ aima ihâimana za'ra wa'wa hã. E marĩ hâimana bâ. Tô sena tô ĩma hã, wapu 'wa'âhã, taha bâtâ na hã, ato te aré isani za'ra wa'wa, ĩma sõmri za'ra wa'aba da! 16 E tawamhã ãhã na hã, rowasu'u tô sena hã te aima wasu'u za'ra wa'aba wa, wa asitob'ru na oto aima ĩhâimana za'ra wa'wa.

17 Ã hã aibâ norĩ aimawi rowasu'u'wa norĩ hã te sima aiwẽ za'ra wa'wa. Tane nherẽ, te te sima iwẽ za'ra hã iwẽ õ di. Te te sima iwẽ za'ra hã, ai'ãma sipo'o za'ra wa'aba da, ĩwi, duré asima wẽ za'ra wa'aba da, te te ai'ãma sima iwẽ za'ra wa'aba ne. 18 Iwẽ tô, ni'wam norĩ ai'ãma 're ihâtâ'â za'ra wa'aba mono da hã, marĩ iwẽ na si 're aihâimana za'ra wa'aba mono da. Tô ãne hã 're romhâimana mono, ai'rata 're ĩnhamra aba mono õ nherẽ zama. 19 Ĩ'ra uptabi ne ĩma 're i'aihâimana za'ra wa'aba mono norĩ, wa ai'ãma robzépata za'ra wa'wa, pi'õ hã i'ra tama poto da, tiwasã te te isépata ne. Wa za tô ai'ãma robzépata u'âsi za'ra wa'wa, Cristu hã ai'ãma 're ihâimana za'ra wa'aba mono zéb u. 20 Ãhã na hã, wa aré ĩsima wẽ upta, tame ai'rata ĩhâimana za'ra wa'aba da hã, ĩmreme zasi õ na te aima rowasu'u za'ra wa'aba da, ai'ãma ĩhâtâ'â uptabi za'ra wa'aba wa.

21 Mozésihi nhimi'ui'éré na roti zahi nhiptete zahâpâ zahadu 're aihâimana za'ra wa'aba mono da, asima iwẽ za'ra wa'wa hã ma'ãpé misi marĩ hã ĩma wasu'u za'ra wa'aba pé: E wapari za'ra wa'aba ã bâ, Mozésihi nhimi'ui'éré na roti zahi inomro hã. 22 Ta hã rob'ui'éré inomro hã te ãne rowasu'u. Abra'ãhã ma, te i'ra hã maparane 're hâimana zahuré, wada'uri zarina tãma romhuri'wa Aga na isisi wa te te ime hã, duré ihâiba amo pi'õ wada'uri ãna 're ihâimana mono, Saraha wa te te ime hã. 23 I'ra, wada'uri zarina tãma romhuri'wai 'ra hã ma tô podo, uburé ai'uté norĩ hã 're ipoto za'ra mono ne. Tanei õ di, pi'õ wada'uri ãna 're ihâimana mono 'ra hã. Ta hã ma tô podo, 'Re ihâimana u'âsi mono te te ãma iropisutuzéb zarina. 24 Ã hã romhâimanazém na ãma isimiré, da te ãma 're iwaihu'u za'ra mono zéb da hã, te iwasu'u zahuré 're hâimana: Maparane pi'õ norĩ hã te maparane ropisutu zahi hã wasu'u zahuré. Imorĩ'rada pi'õ Aga na isisi hã, ta hã te ẽtẽ 'rãihâ Sinai na isisi ãma ropisutu zahi hã wasu'u. Ta hã ropisutu zahi zarina 're ipoto za'ra mono norĩ hã te wada'uri zarina titede'wai ma romhuri'wa da, 're poto za'ra. 25 Aga hã te wasu'u ẽtẽ 'rãihâ Sinai, Arabia ãma 're ihâimana mono hã. Ta hã te duré 'ri nho'u Zeruzalẽ hã wasu'u, awa'awi na 're ihâimana mono. Ta hã 'ri nho'u hã, wada'uri zarina titede'wai ma romhuri'wa ne te 're hâimana. Duré uburé iwa 're isi'ubumroi mono norĩ hã te Mozésihi nhimi'ui'éré na roti zahi nhiptete zahâpâ 're hâimana za'ra, tiwi 're wairébé waihu'u mono ãna, wada'uri zarina titede'wai ma romhuri'wa ne. 26 Tanei õ di, Zeruzalẽ hâiwa ãma 're ihâimana mono hã. Ta hã te sima iwẽ na rowẽ na 're idahâimana za'ra mono zé hã wasu'u. Duré ta hã, pi'õ Sara uburé wana za'ra te wasu'u. 27 E marĩ wa. Ibaihâ Iwazé pese na rob'ui'éré hã nomro wa, ãne:

28 Ĩsisãnawã norĩ, a norĩ wa'wa hã 'Re ihâimana u'âsi mono 'ra, te 're aihâimana za'ra wa'aba mo, te te iropisutu u'âbâ, Izaquihi ãma te te iropisutu ne. 29 Taha wahu mono 'remhã, ai'uté ipodo hã uburé ai'uté 're ipoto za'ra mono ne, te sada 're hâimana, 'Re ihâimana u'âsi mono Pẽ'ẽzani nhimiromhuri hawi ipoto da hã. Tane te ãhã na hã ai'ãma tiromhâimana za'ra wa'wa. 30 Tazahã, e niha te Ibaihâ Iwazé pese na rob'ui'éré hã tinha. Ãne te tinha: “Ma'ãpé wada'uri zarina aima romhuri'wai ma, rob'ru na oto morĩ da, duré i'ra zama. E marĩ wa. Wada'uri zarina aima romhuri'wai 'ra hã, imama nhibro i'uirĩ na tãma 're hâimana waihu'u mono õ wa za, pi'õ wada'uri ãna 're ihâimana mono 'ra siré hã.” 31 Tahawa, ĩsisãnawã norĩ, wa norĩ hã ã hã pi'õ wada'uri zarina titede'wai ma romhuri'wai 'ra na 're wahâimana za'ra mono õ di. Tazahã, pi'õ ihâiba amo, sima iwẽ na wada'uri ãna 're ihâimana mono 'ra na si, wa 're wahâimana za'ra.