2 Ma'ãpé asiwi ĩwapari pese aba! Wa hã Paulu, wa za ãne aima waihu'u za'ra wa'wa: Mozésihi nhimi'ui'éré na roti zahi zarina, da te asihâiwata nhihâri za'ra wa'aba da, apâ asi'ru za'ra wa'aba wamhã, tawamhã Cristu hã marĩ dai õ di za, aima za'ra wa'aba hã. 3 Wa za duré ãma aipo're pu'u zahu za'ra wa'wa, ãne: Da te asihâiwata nhihâri za'ra wa'aba da, asi'ru za'ra wa'aba wamhã, tô i'ru zahi uburé pese Mozésihi nhimi'ui'éré na roti zahi 're i'madâ'â pese za'ra wa'aba mono da hã. 4 Mozési nhimi'ui'éré na roti zahi 're i'madâ'â pese za'ra wa'aba mono zarina, 'Re ihâimana u'âsi mono hã te te 're aiwẽsãmri za'ra wa'aba mono da, asima sô 're i'asõpré wa'aba mono norĩ, Cristuhu nhiti 're aihâimana za'ra wa'aba mono da, ma tô asiwi isihâri za'ra wa'wa 'râwi. 'Re ihâimana u'âsi mono nhimizawizém nhiti ma tô duré asina aipahâ za'ra wa'wa. 5 Tanei õ di, wa norĩ hã. Wasiwawãi ãna, wa 'Re ihâimana u'âsi mono hã wa te 're umnhasi za'ra, za te te 're iwa'awẽsãmri mono na hã. Ãhã zô wa 're wanhimipari za'ra tô, 'Re ihâimana u'âsi mono Pẽ'ẽzani nhimipawaptobzém na, wawa 're ihâimana za'ra mono na, Cristu wa te wasina 're i'umnhasi za'ra mono zéb zarina. 6 E marĩ wa. Cristu Zezusihi ãma 're wahâimana za'ra mono wamhã, marĩ dai õ di, isihâiwata nhihâri ré norĩ hã duré isihâiwata nhihâri õ norĩ hã. Ipire hã Cristu, wa te wasina 're i'umnhasi za'ra mono zé, taha zarina wanhimizawizé wama 're hâimana za'ra mono da.

7 Te aré ai'aba'réi wẽ wa'wa! Tane nherẽ, e 'wa hã ma bété ai'rã pizari za'ra wa'wa, tô sena 'Re ihâimana u'âsi mono nhimiroti hã 're 'madâ'â za'ra wa'aba mono tõ da oto. 8 Ta hã te te i'ai'rã pizari za'ra wa'wa hã, 'Re ihâimana u'âsi mono hawib õ di, tô asô ihârâ za'ra wa'aba hawib õ di. 9 “I'u'ẽtẽ wapu mapuzé hã surure nherẽ, te za uburé mapu, i'u'ẽtẽ wapu hã.” 10 Tane nherẽ, Wanhib'apito si wa umnhasi, rosa'rada aimawi hã za isaze za'ra wa'aba õ na. Te te aiwi iro'wa'rutu za'ra wa'wa hã, tô ni'wai wamhã, te za tô 'Re ihâimana u'âsi mono hã tãma rob'manharĩ pipa za.

11 Ĩsisãnawã norĩ, 're dasisihâiwata nhihâri za'ra mono da, wa hã zahadu te 're rowahutu mono õ nherẽ, e niha bâ bété te zahadu tawamhã da te ĩma 're rob'manharĩ wasété za'ra. Ãne na te tô 're rowahutu mono 'wa'âhã, tawamhã wedepo'o nhonhi'rãmi na Cristu, wazada idâ'âzé wasu'u, da'ahâ na da te dasiwi 're iwẽ'õ mono hã te te aré dawi 're aro'wa'ré mono õ di. 12 Ĩma wẽ di, te te aiwi iro'wa'rutu za'ra wa'aba norĩ hã õne haré si're zani za'ra, wẽ te bâ danhihâiwata nhihâri hã.

13 Tanei õ di, a norĩ wa'wa hã ĩsisãnawã norĩ. 'Re ihâimana u'âsi mono ma tô asô tihârâ za'ra wa'wa, asima iwẽ na rowẽ sina 're anomro aba mono da. Tane nherẽ, asima iwẽ na 're aihâimana za'ra wa'aba mono wẽ te, siwa'ru aipẽ'ẽ na asima 're iwẽ za'ra wa'aba mono hã wẽ õ nherẽ, marĩ 're 'manharĩ za'ra wa'aba mono tõ. Taha wa'rãmi, asisawi sina asima 're romhuri za'ra wa'aba mono. 14 E marĩ wa. Uburé Mozésihi nhimi'ui'éré na roti zahi hã ahâ uptabi nherẽ, te simisutu misi roti zahi na tihâiba, ã hã: “'Re da'azawi pese mono, 'râwi 're i'asisawi pese mono ne.” 15 Tane nherẽ, abaze zahi ne 're asi'u'a za'ra wa'aba mono wamhã, duré asiwi 're ro'wa'rutu za'ra wa'aba mono wamhã, ãne wi, ãma 're pibui pese za'ra wa'aba mono, 'râwi 're asisimroi wa'aba mono tõ da.

16 Wa ĩsima wẽ, ãne te aima roti za'ra wa'aba da: Ma'ãpé 'Re ihâimana u'âsi mono Pẽ'ẽzani si te te 're asimroi wa'aba mono, aihâimanazéb 'remhã. Duré marĩ iwẽ'õ na 'râwi aipẽ'ẽ 're, asima 're irosa'rata za'ra wa'aba mono zé hã 're 'madâ'â za'ra wa'aba mono tõ. 17 E marĩ wa. 'Râwi marĩ, wa te wasima 're iwẽ za'ra mono zé hã, te 're hâimana, 'Re ihâimana u'âsi mono Pẽ'ẽzani te te sima 're iwẽ mono zéb zada. Duré tane 'Re ihâimana u'âsi mono Pẽ'ẽzani te te sima 're iwẽ mono zé hã, te 're hâimana, 'râwi marĩ, wa te wasima 're iwẽ za'ra mono zéb zada. Ã norĩ hã te sisada 're hâimana zahuré, tinhitob'ru na. Tahawa 'râwi marĩ asima 're iwẽ za'ra wa'aba mono zé hã 're 'manharĩ za'ra wa'aba mono õ di za. 18 E marĩ wa. Tô 'Re ihâimana u'âsi mono Pẽ'ẽzani si te te 're asimroi wa'aba mono wamhã, ãne wamhã, 're aihâimana za'ra wa'aba mono õ di tô, Mozésihi nhimi'ui'éré na roti zahi nhiptete zahâpâmhã.

19 Marĩ dapẽ'ẽ na ãma 're idasiwasété za'ra mono zé dama iwaihu'u pe, ã norĩ hã: Damro nai õ nherẽ danhimisaihuri, duré siwa'ru danhiséb õ na dasina dahâimana, 20 duré 'Re ihâimana u'âsi mono upana romhâiba na dawada, duré abzé 'manharĩ, duré danhimizawi õ, duré dasi'ahâri, duré danhimi'umnhasi pe, duré dasisada danhiti'ru, duré 'râwi dasi'madâ'â ze, duré dasiwẽ'õ, duré dasima dasipo, 21 duré marĩ na danhiminho'ru, duré âzé na dasi'rãiwamnarĩ pe, duré âzé na dasi'rãiwamnarĩ pese wa, siwa'ru marĩ 'manharĩ wasédé, duré ã norĩ sine marĩ 'manharĩ wasété zama. Wa za duré apâ ãma sahu, te i'aipo're pu'u za'ra wa'aba zém na, ãne: Ã norĩ te te 're i'manharĩ za'ra mono norĩ hã, 'Re ihâimana u'âsi mono da'ãma 're isib'a'uwẽ mono zém na ãma isite za'ra da hã waihu'u õ uptabi di.

22 Tanei õ di, 'Re ihâimana u'âsi mono Pẽ'ẽzani hã. Ta hã te te dama 're tébré za'ra, ã norĩ hã: Danhimizawi pe, duré datoi u'âsi zé, duré rowẽ u'â, duré danhimi'ẽi hâ, duré dama dahâimana wẽ, duré dahâimana zasi õ, duré dama da'umnha, 23 duré 'râwi dasi'madâ'â zei õ, duré 'râwi dasiwi danhimi'rãmi. Ã norĩ zada hã hâimana õ di, 'Re ihâimana u'âsi mono nhimiroti zahi hã. 24 Ni'wam norĩ hã Cristu Zezusihi nhib'a'uwẽ na 're ihâimana za'ra mono norĩ hã ma tô wedepo'o nhonhi'rãmi na sasõmri za'ra, marĩ tipẽ'ẽ na ãma 're isiwasété za'ra mono zé hã, marĩ iwasédé te te sima 're iwẽ za'ra mono siré. 25 'Re ihâimana u'âsi mono Pẽ'ẽzani ãma oto 're wahâimana za'ra mono wa, wa za duré tãma 're wasisõmri za'ra, õhõ si te te 're wa'anhimroi mono da. 26 'Râwi 're wasi'madâ'â ze za'ra mono ãna wa za 're wanomro. Duré 're wasi'ru zani za'ra mono õ di za. Duré marĩ na wa te 're danho'ru za'ra mono õ di za.