Ma'ãpé 're asipawapto wẽ za'ra wa'aba mono
6
Ĩsisãnawã norĩ, ni'wa hã tiwasédé te te i'manharĩ na, da te upsibi mei wamhã, a norĩ wa'wa, 'Re ihâimana u'âsi mono Pẽ'ẽzani nhimiwada'uri na si 're i'aihâimana za'ra wa'aba mono hã, tô asiwi pawapto wa'aba, apâ bâdâdi iwẽ u te te sina siri da. Tane nherẽ, ãne hã 're 'manharĩ za'ra wa'aba mono, aihâimana zasi õ na. Duré ãma 're pibui pese za'ra wa'aba mono, a norĩ wa'aba da zama aipibuzé hã asada 're hâimana za'ra wa'aba mono tõ da. 2 Ropire aima 're ihâimana za'ra wa'aba mono na 're asipawaptob za'ra wa'aba mono. Ãne wapsi, te za ãma 're i'uwaimrami za'ra wa'aba mo, Cristuhu nhimiroti zahi hã. 3 Ni'wa hã pire na 're hâimana mono õ nherẽ, tipire na 'râwi te te si'ãma 're rosa'rata mono wamhã, ta hã te za 'râwi si'ãma rosa'rata upa. 4 Dahâiba mono bâ dahâimanazém na 're idasisarẽ za'ra mono da si iwẽ hã, i'uwaibaba na 're dahâimana za'ra mono zô! I'uwaibaba na 're dahâimana za'ra mono wamhã, da te sima 're rowẽ za'ra mono, iwẽ da te 're i'manharĩ za'ra mono zém na, dahâimanazé hã da te dawi 're 'madâ'â za'ra mono da, 're danhimnhasi za'ra mono ãna. 5 E marĩ wa. Dahâiba mono bâ, te za tô da te 're 'wasari, romhuri 'Re ihâimana u'âsi mono te te dama 're i'anhomri mono hã.6 Ni'wa hã Cristuhu wasu'uwẽ te te awaihu'u mono wamhã, marĩ iwẽ hã te te tô 're apo'o mono, ti'rãiwaihu'u wẽ 'wai ma.
7 'Râwi asima 're rosa'rata upa za'ra wa'aba mono tõ: Ni'wa hã 'Re ihâimana u'âsi mono ãma sima toi waihu'u õ di. Ni'wa marĩ te te i'a're hã ta hã te za tô tehâ. 8 Ni'wa hã marĩ na tipẽ'ẽ na ãma 're isiwasété mono zéb zarina, marĩ iwasété si te te 're a're mono wamhã, taha zarina te za tehâ, dadâ'âzép si. Tanei õ di, ni'wa hã 'Re ihâimana u'âsi mono Pẽ'ẽzani ma, te te rowẽ da, marĩ iwẽ si te te 're i'a're mono hã. Ta hã 'Re ihâimana u'âsi mono Pẽ'ẽzani hawi te za tô tehâ, dahâimanazé isi'utõrĩ õ hã. 9 Iwẽ hã wa te 're i'manharĩ za'ra mono zém na, wa te ãma wazere za'ra õ di tô. E marĩ wa. Bâdâ i'uwaibaba hã iwa waptã'ã wamhã, wa za tehâri za'ra ni za, wawi robzei'õ za'ra õ wamhã. 10 Tahawa, bâdâ wama 're hâimana za'ra mono ré hã, iwẽ hã wa za tô wa te 're 'manharĩ za'ra, uburé dama. Tane nherẽ, wasiré isazei'wa norĩ ma, wa za iwẽ hã wa te 're 'manharĩ za'ra, isazei'õ'wa norĩ ma, wa te 're i'manharĩ za'ra mono nhipai u.
Paulu, tinhimi'ui'éré na roti te te i'rãsutuzé
11 Ma'ãpé 'madâ'â za'ra wa'aba, ĩnhimi'ui'éré za'ẽtẽ na te ãma aima irob'ui'éré za'ra wa'aba zé hã, ĩsi'uihâ na ĩnhib'rata na! 12 Asisihâiwata nhihâri za'ra wa'aba da, te te i'aiwati pese za'ra wa'aba norĩ hã, ta norĩ hã dama sihâi'ré za'ra da, te te sima iwẽ za'ra norĩ, duré da te 're 'madâ'â ze za'ra mono zô. Ta norĩ, te ãne hã 'manharĩ za'ra, Cristu wedepo'o nhonhi'rãmi na dazada idâ'âzé wasu'u u'âbâ, da te tãma 're rob'manharĩ wasété za'ra mono õ'umnhasite. 13 Ni'wam norĩ hã sihâiwata nhihâri ré 're nomro mono nherẽ, uburé te te 're 'madâ'â pese za'ra mono õ di, 'Re ihâimana u'âsi mono nhimiroti zahi na Mozési te te ãma i'arob'ui'érézé hã. Tane nherẽ, ta norĩ hã te sima wẽ za'ra, asisihâiwata nhihâri za'ra wa'aba wamhã, 're si'madâ'â ze za'ra mono da, asisihâiwata nhihâri za'ra wa'aba wẽ te, isimiroti za'ra zarina. 14 Tazahã, oto wa hã niwa ĩsina ĩwata da hã, mare uptabi di. Wanhib'apito Zezu Cristu wedepo'o nhonhi'rãmi na dazada idâ'âzém na si, wa za te ĩsima 're rowẽ. Taha u'âbâ, wa ĩdâ'â na 're ĩhâimana, ti'ai ãma isazei'õ'wa norĩ hâimanazé ma hã. Tane duré te dâ'â na ĩma 're hâimana, ti'ai ãma isazei'õ'wa norĩ hâimanazé hã. 15 Aiwab õ hã hâimana õ di, ni'wa hã sihâiwata nhizâri ré wamhã, niwamhã sihâiwata nhizâri õ wamhã. Ipire hã ni'wa ipẽ'ẽ 're, poto tém na 're hâimana mono wap si. 16 'Re ihâimana u'âsi mono te rowẽ u'â duré isimizawizé hã ãma 're ihâimana za'ra mono da si, ni'wam norĩ ã hã dahâimanazéb da, ãma 're ihâimana za'ra mono norĩ ãma, duré uburé 'Re ihâimana u'âsi mono nhib'a'uwẽ na 're ihâimana za'ra mono norĩ ãmab zama.
17 Te oto ãma 'rãsutu da. Oto wa hã, ni'wa ropire te te ĩzada iwazere õ da si. E marĩ wa. Iré 're ĩmorĩ wa, da te 're ĩ'ahâri mono zéb ré, Zezusihi te na 're ĩhâimana mono 'ru te.
18 Ĩsisãnawã norĩ, wa te te ai'ãma 're rowaptẽrẽ u'âsi za'ra wa'wa, Wanhib'apito Zezu Cristuhu ma, isimizawizé hã ai'ãma 're hâimana u'âsi za'ra wa'aba mono da.
Tane tô.