3 A norĩ wa'wa hã 'Re ihâimana u'âsi mono nhib'a'uwẽ te oto 're aihâimana za'ra wa'aba mo. Tahawa, dasina dahâimana hã duré danhiséb õ na marĩ 'manharĩ wasédé duré marĩ iwasété zô si dasima rob'ruiwapari pe hã, ã norĩ hã 're 'manharĩ za'ra wa'aba mono da, ãma asima 're rosa'rata wasété za'ra wa'aba mono tõ, isazei'õ'wa norĩ hã aiwasédé te te ai'ãma 're sa'ra za'ra wa'aba mono tõ da. 4 Duré marĩ iwasété na aimreme nhiséb'õ na asima 're robzanhamri za'ra wa'aba mono tõ, duré aimreme to na hã niwamhã duré aimreme nhipese na zama, ã norĩ hã ai'ãma 're ihâimana za'ra wa'aba mono da hã, sadai õ wa. Tazahã, 'Re ihâimana u'âsi mono ãma aimreme na 're aiwata za'ra wa'aba mono sina asima 're robzanhamri za'ra wa'aba mono, sõpru uptabi wa, ta hã. 5 Ã hã tô sena na waihu'u pese sina 're aihâimana za'ra wa'aba mono: Ni'wa hã sébré waihu'u õ di za, Cristu hã duré 'Re ihâimana u'âsi mono me da'ãma 're isib'a'uwẽ zahuré mono zéb u hã, dasina dahâimana na 're ihâimana mono hã duré danhiséb õ na marĩ 'manharĩ wasété na 're ihâimana mono, duré marĩ iwasété zô si te te sima 're irob'ruiwapari pese mono hã. (Marĩ iwasété zô si dasima rob'ruiwapari pe hã, ta hã tô 'Re ihâimana u'âsi mono upana marĩ aimawi ãma 're idawata za'ra mono zé).

6 'Re asi'madâ'â pese za'ra wa'aba mono, ni'wa hã tizadawa nhipese na te te 're irowasu'u mono na te te aima 're rob'rãmi za'ra wa'aba mono tõ da, senai'õ nherẽ. E marĩ wa. Ãne u'âbâ te za 'Re ihâimana u'âsi mono nhimihâzé hã 're rere'e, ni'wam norĩ isimiroti te te 're i'madâ'â za'ra mono õ norĩ nhisiwimhã. 7 Tahawa, ãne na 're idahâimana wasété za'ra mono norĩ siré hã, 're aihâimana za'ra wa'aba mono tõ. 8 Duréihã 're saze za'ra wa'aba mono õ ré hã, robra na te aré 're aihâimana za'ra wa'aba mono. Tane nherẽ, ãhã na hã oto Wanhib'apito ãma 're anomro aba mono wa, te oto rowa'a na si 're anomro aba mo. Tahawa, ma'ãpé rowa'a te a'uwẽ na si 're anomro aba mono. 9 E marĩ wa. Rowa'a hã te za roptehâri isa'ẽtẽ ne te te dama 're a'manharĩ, imono bâ dahâimana wẽ na 're idanomro mono zé hã, duré awa'awi na dahâimanazé hã duré tô sena na dahâimanazéb zama. 10 Duré sô 're rob'ruiwapari za'ra wa'aba mono, marĩ Uburé Danhib'apito ma te te 're irowẽ mono zéb zô si, 're waihu'u za'ra wa'aba mono da. 11 Robra na si 're danomro mono wa, marĩ iwasédé da te 're i'manharĩ za'ra mono na dasiré 're aihâimana za'ra wa'aba mono tõ. Iwa'rãmi rowa'a u 're ãwisi za'ra wa'aba mono, dahâimanazé iwasédé hã. 12 E marĩ wa. Ta norĩ hã marĩ iwasédé pi'uriwi te te 're i'manharĩ za'ra mono hã iwasu'u da hã sõ'awi, wazéb di tô. 13-14 Tane nherẽ, uburé marĩ hã sõ'awi te za oto 're hâimana za'ra, rowa'a u da te 're ãwisi za'ra mono wamhã. Duré uburé marĩ sõ'awi oto ihâimana za'ra hã, rowa'a na te za oto 're hâimana za'ra. Tahawa, wa wa te 're nharĩ za'ra, ãne:

15 Tahawa, ma'ãpé aihâimanazém na ãma 're pibui pese za'ra wa'aba mono. I'rã nhimiza'rese'õ norĩ hâimanazém ne, 're aihâimana za'ra wa'aba mono tõ. I'rã nhimiza'rese wẽ norĩ 're ihâimana za'ra mono zém ne si 're aihâimana za'ra wa'aba mono. 16 Ãhã na bâtâ mono na 're iwahâimana za'ra mono zé hã wasété uptabi di. Tahawa, ma'ãpé bâdâ aima 're ihâimana za'ra wa'aba mono hã 're 'manharĩ wẽ za'ra wa'aba mono, ãma 're pibui pese za'ra wa'aba mono sina. 17 Tahawa, ai'rã nhimiza'rese ãna 're aihâimana za'ra wa'aba mono tõ. Tazahã, Uburé Danhib'apito te te sima 're iwẽ mono zé, 're waihu'u za'ra wa'aba mono da si, asima sô 're rob'ruiwapari za'ra wa'aba mono.

18 Âzé na 're asi'rãiwamnarĩ za'ra wa'aba mono tõ. E marĩ wa. 'Re asi'rãiwamnarĩ za'ra wa'aba mono wamhã, taha na te za aihâimanazé hã asiwi 're i'uprosi za'ra wa'aba mo. Tazahã, 'Re ihâimana u'âsi mono Pẽ'ẽzani na si aihâiba hã 're 'masisi za'ra wa'aba mono. 19 Asiré ãma asima 're rowẽ za'ra wa'aba mono, Salmu ãma danho're na duré Uburé Danhib'apito ãma dawatazém na danho're na zama. Taha na aipẽ'ẽ na ãma 're aiwata za'ra wa'aba mono. 20 Wanhib'apito Zezu Cristuhu nhisi na, Wamama 'Re ihâimana u'âsi mono ãma 're aiwata za'ra wa'aba mono, uburé marĩ iwẽ wa'ãma 're ihâimana za'ra mono zém na. 21 Asiré isazei'wa norĩ zahâpâ 're aihâimana za'ra wa'aba mono da, 're asi'madâ'â za'ra wa'aba mono aiwapu na, Cristu hã 're iwazé pese za'ra wa'aba mono zéb zarina.

22 Pi'õ imro ré norĩ, aimro zahâpâ 're aihâimana za'ra wa'aba mono, Wanhib'apito zahâpâ 're i'aihâimana za'ra wa'aba mono ne. 23 E marĩ wa. Damro aibâ hã timro 'rã na 're hâimana za'ra mono wa, Cristu hã isazei'wa norĩ 'rã na 're ihâimana mono ne. Duré isazei'wa norĩ hã Cristuhu hâiba te 're hâimana za'ra. Cristu hã ta norĩ nho'reptui'wa, te 're hâimana. 24 Tahawa, isazei'wa norĩ hã Cristuhu zahâpâ 're ihâimana za'ra mono ne, tane te za duré pi'õ imro ré norĩ hã timro zahâpâ 're hâimana za'ra.

25 Aibâ imro ré norĩ, aimro hã 're sawi pese za'ra wa'aba mono, Cristu hã tizazei'wa norĩ te te 're i'azawi pese mono ne, duré tihâiba hã sawi ãna te te sada isõmri za'ra ne, sawi te za'ra. 26 Isazei'wa norĩ hã wẽ uptabi na wasété ãna 're hâimana za'ra mono da, ma tô ãne hã 'manha. Â na marĩ, da te 're i'upsõ za'ra mono ne, ma tô tinhimiroti na a'upsõ, iwasété hawi. 27 Ma tô duré ãne hã 'manha, isazei'wa norĩ hã wẽ uptabi na sitẽme 'râwi te te ãwisi za'ra da, wasété ãna duré iwasédé hã da te ãma 're sa'ra waihu'u mono ãna, zazahâ ihâ uptob õ ne duré ihâ'rã'ru õ ne duré niwamhã marĩ siwa'ru aimawi iwasédé ãma ihâimana õ ne. 28 Tane duré, aibâ imro ré norĩ hã timro te za te te 're sawi pese za'ra, tihâiba hã 'râwi te te 're isawi pese za'ra mono ne. Aibâ hã timro te te 're isawi pese mono hã, ta hã te tô 're sisawi pese. 29 E marĩ wa. Ni'wa hã tihâiba 'râwimhã te te siwi 'ruiwapari waihu'u õ di. Tazahã, te za te te tãma 're a. Te za duré te te 're 'madâ'â wẽ tihâiba hã, Cristu hã tizazei'wa norĩ te te 're i'a'madâ'â wẽ mono ne. 30 E marĩ wa. Wa norĩ hã Cristuhu hâiba, wa 're wahâimana za'ra. 31 Ibaihâ Iwazé pese na rob'ui'éré te nomro, ãne: “Ãne wa, aibâ hã mro wamhã, te za timama norĩ hã rẽme zahuré tina me, timro me, si'ãma hâiba sitob zahuré da. Tawamhã maparane ihâiba nherẽ, misi ihâiba ne te za oto 're hâimana zahuré.” 32 Ã hã ipire uptabi waihu'u ãna aré 're ihâimana mono. Tazahã, wa hã te iwaihu'u na hã Cristuhu zama te wasu'u, duré isazei'wa norĩ zama^a. 33 Tahawa, aibâ imro ré norĩ, aihâiba mono bâ te za aimro 're isawi pese za'ra wa'aba mo, 'râwi 're i'asisawi pese za'ra wa'aba mono ne. Tane duré pi'õ imro ré norĩ, aimro te za 're iwazé pese za'ra wa'aba mo.