Isazei'wa norĩ hã, Cristuhu hâiba te 're hâimana za'ra
4
Tahawa, wa hã Wanhib'apito Zezu Cristuhu ma, te 're iromhuri mono u'âbâ dazazéb 're ĩza hã, wa za aima roti za'ra wa'wa, ãne: Ma'ãpé 'Re ihâimana u'âsi mono te te sima 're iwẽ mono zéb uwaibaba si, 're aihâimana za'ra wa'aba mono. Taha da, ma tô asô tihârâ za'ra wa'wa. 2 Ma'ãpé asi'madâ'â zei ãna 're aihâimana za'ra wa'aba mono, duré asimiwazé pese na duré asimi'ẽ sina. Da'ãma 're aiwa'a su'u za'ra wa'aba mono tõ, asimizawizé aima 're ihâimana za'ra wa'aba mono zarina. 3 'Re ihâimana u'âsi mono Pẽ'ẽzani te te aima 're isõmri za'ra wa'aba mono zéb zarina rowẽ u'âsi asiré 're aihâimana za'ra wa'aba mono wa oto, ma'ãpé ãma 're pibui pese za'ra wa'aba mono, tô õhõ na si asiré 're aihâimana u'âsi za'ra wa'aba mono da, 'râwi. 4 Wa norĩ hã misi dahâiba ne, wa oto 're wahâimana za'ra. Duré misi Ipẽ'ẽzani 're ihâimana mono zarina te wahâiba mono bâ wama 're hâimana za'ra. Tane duré misi haré wa iwẽ uptabi zô 're wanhimipari za'ra wasiwawãi ãna. Taha da si, ma tô sima aipisutu za'ra wa'wa. 5 Misire Õhõ si Wanhib'apito hã, duré misire Õhõ ãma si, wa 're wanhimizaze za'ra. Duré Õhõ zadawa parap si, wa â dawabzuri hã wa te 're 'manharĩ za'ra. 6 Õhõ si misire 'Re ihâimana u'âsi mono, uburé Damama hã. Ta hã Uburé Danhib'apito. Ta hã te uburé wa'ãma za'ra te te 're romhuri. Duré uburé te isazei'wai pẽ'ẽ mono bâ 're sãmra.7 Wahâiba mono bâ te Cristuhu nhoprubzé iwẽ uptabi hã wama 're hâimana za'ra, wa te ãma 're idapawaptob za'ra mono da hã, te te sima iwẽzéb zarina te te wama 're i'anhomri mono hã. 8 Ãne na te Ibaihâ Iwazé pese na rob'ui'éré hã ãma tinha, ãne:
“Hâimo uptabi u apâ morĩ wamhã, siré ma tô da'ahâ na te te danhimro, dazazéb 're, 're idasimasa mono ne 're idahâimana za'ra mono hã.
Ma tô duré dahâiba mono bâ dama tinhopru, tinhoprubzé iwẽ uptabi na.”
9 Tawamhã e marĩ te wasu'u, “hâimo uptabi u imorĩzé hã.” Ti'ai 'rowi uptabi u zama te te isi'ra na te wasu'u, tô adâ 're ihâimana za'ra mono zéb u. 10 Ta hã we te te isi'ra hã, tô ta hã apâ hâimo uptabi u imorĩ, ropâ 're hâimana mono da. 11 Ta hã Cristu, si'uihâ na ma tô tinhoprubzé iwẽ uptabi hã ni'wam norĩ ma te te 're apisutu, te te dama 're sadawa wasu'u za'ra mono da, duré ni'wam norĩ hã isadawa 'mahârâ'wa da, duré ni'wam norĩ hã Rowasu'uwẽ hã te te dama 're 'mahârâ za'ra mono da, duré ni'wam norĩ isazei'wa norĩ 'madâ'â'wa da, rowahutuzéb 're te te 're rowahutu za'ra mono da. 12 Ãne ma tô Cristu hã da'apisutu, 'Re ihâimana u'âsi mono nhib'a'uwẽ norĩ hã te te 're aza'ra pese mono da, isazei'wa norĩ 're ihâimana za'ra mono zéb 're, te te 're romhuri za'ra mono da, da te 're i'ri nhoré mono ne, Cristuhu hâiba hã siptete na 're hâimana mono da. 13 Ãne zarina, wa za misi haré wasiré 're wahâimana za'ra, wa te wasina 're i'umnhasi za'ra mono zém na hã duré 'Re ihâimana u'âsi mono 'ra, wa te 're iwaihu'u za'ra mono zém na hã. Ãne wa, te za duré wahâimana prédup sina 're iwanomro mono zé hã wama 're hâimana za'ra. Wa za duré wa te 're uwe za'ra, Cristu 're ihâimana mono zém na oto 're wahâimana za'ra mono da. 14 Ãne wa, ai'uté norĩ ne oto 're wahâimana za'ra mono õ di za, rosa'rese ãna. Âsisasi hã uba're siwa'ru te te 're i'mapraba za'ra mono ne duré rowa'u hã siwa'ru te te 're isate mono ne, senai'õ na sipu'u pese na danhimiroti hã wa te 're wapari za'ra mono õ di za. Ta norĩ hã te sadawa nhipese na sihawi te te 're ropoto za'ra, taha zarina te te 're danhimroi mono da, bâdâdi i'upana. 15 Tazahã, wa norĩ hã 'Re ihâimana u'âsi mono nhimiroti tô sena 're ihâimana mono na si, wanhimizawi sina, wa te dama 're rowasu'u u'âsi za'ra mono wamhã, uburé wahâimanazé imono bâ, wa za 're waprédub u'âsi za'ra, Cristuhu hâimanazém ne oto 're wahâimana za'ra mono da, ta hã da'rã na 're hâimana mono dâ'âsina. 16 Õhõ si te te 're a'manharĩ, ihâiba hãa wahuré siptete na 're hâimana mono da hã duré uburé ihâiba na iwa'õtõ mono hã si'ãma 're hâimana za'ra mono da, siré 're hâimana za'ra mono wa. Ãne zarina, te ihâiba na iwa'õtõ mono bâ 're ihâimana za'ra mono hã wẽ na te te 're romhuri za'ra. Duré ihâiba hã wahuré te za tiprédu wẽ. Te za duré siré 're hâimana za'ra, isimizawizé hã tãma 're hâimana za'ra mono wa.
Dahâimanazé i'rata hawi, Cristuhu ãma oto 're idanomro mono zé ité
17 Tahawa, ãne wa za aima roti za'ra wa'wa. Tô Wanhib'apito nhisi na wa za aima ĩzadahutu'õ za'ra wa'wa: Ma'ãpé 're aihâimana za'ra wa'aba mono tõ, Wanhib'apito zazei'õ'wa norĩ 're ihâimana za'ra mono zém ne hã. E marĩ wa. Ta norĩ nhimirosa'rada hã marĩ dai õ di. 18 Isimirosa'rata za'ra 'remhã robra di. 'Re ihâimana u'âsi mono, dahâimanazé iwẽ uptabi te te dama 're i'anhomri mono zém nhiti te 're hâimana za'ra. E marĩ wa. 'Re ihâimana u'âsi mono hã te te waihu'u za'ra tõ da, te te sima pisutu za'ra wa, ipẽ'ẽ tete za'ra u'âbâ. 19 Sisém na aré 're ihâimana za'ra mono zé hã ma tô simini pese za'ra. Ma duré sisõmri pese za'ra, uburé marĩ hâimana nhiséb õ na te te 're i'manharĩ za'ra mono ma. Marĩ iwasété wi hã 're sitété waihu'u za'ra mono õ di. Duré uburé marĩ iwasédé hã te siwa'ru te te 're 'manharĩ za'ra.
20 Tanei õ di, a norĩ wa'wa hã. Ã hãi õ di dahâimanazé iwaihu'u za'ra wa'wa hã, Cristuhu nhirã zarina 're anomro aba mono wamhã. 21 Aipo're na ma tô iwasu'u hã iwapari za'ra wa'wa tô. Duré isirã zarina 're anomro aba mono wa, ma iwaihu'u za'ra wa'wa, tô sena 'Re ihâimana u'âsi mono nhimiroti Zezusihi ãma 're ihâimana mono hã. 22 Tahawa, ma'ãpé rẽme pese za'ra wa'aba, aihâimanazé i'rada hã. Ta hã ma tô aré te te aima 're 'manharĩ za'ra wa'wa, aiwasété si 're 'manharĩ u'âsi za'ra wa'aba mono da. Duré marĩ iwẽ newa aré asima 're iwẽ za'ra wa'aba mono zé hã ma tô aihâimanazéb 'rada hã te te aiwi 're uprosi za'ra wa'wa. 23 Ma tô da te aima 're roti za'ra wa'wa, aihâimanazé itéb ré oto 're aihâimana za'ra wa'aba mono da, duré 're irosa'rata za'ra wa'aba mono zé itéb 'ré zama. 24 Ma'ãpé aihâimanazé itép si oto asima 're séme aba mono, 'Re ihâimana u'âsi mono te te i'aipoto za'ra wa'aba zarina, isine 're aihâimana za'ra wa'aba mono da, duré dahâimanazé tô sena na ãma 're asihâi'ré za'ra wa'aba mono da, i'uwaibaba na Õhõ ma si 're aihâimana za'ra wa'aba mono da.
25 Tahawa, 're asadawa nhipese za'ra wa'aba mono tõ oto. Iwẽ hã, tô sena na aihâiba mono bâ asima 're irowasu'u za'ra wa'aba mono da si, asiré isazei'wa norĩ ma hã. E marĩ wa. Uburé wa norĩ hã, Cristuhu hâiba 're wahâimana za'ra mono wa. 26 'Re asiti'ru za'ra wa'aba mono wamhã, taha zarina aiwasédé 're 'manharĩ za'ra wa'aba mono da hã asima 're rowairébé za'ra wa'aba mono tõ. Duré bâtâ wahuré na hã asiti'rui haré 're aihâimana za'ra wa'aba mono tõ. 27 Wa'uburé ma hã bâdâ 're sõmri za'ra wa'aba mono tõ, te te 're aipibu za'ra wa'aba mono wa, aiwasédé hã 're 'manharĩ za'ra wa'aba mono tõ da.
28 Ni'wa hã danhibrom na aré dawi 're simisaihuri mono wamhã, 're simisaihuri mono tõ oto. Tazahã, te te 're romhuri pese mono, tinhib'rata na marĩ iwẽ te te 're 'manharĩ mono da, taha zarina marĩ te te dama 're anhomri mono da, marĩ zô ni'wai wi rowaptâ'â wamhã.
29 Aimreme iwasété na dama 're nharĩ za'ra wa'aba mono tõ. Iwẽ na si dama 're aimreme zusi aba mono, i'uwaibaba na si ãma 're danhiptete za'ra wa'aba mono da, aiwapari'wa norĩ hã ãma 're pawaptob za'ra wa'aba mono da. 30 Duré 'Re ihâimana u'âsi mono Pẽ'ẽzani wi aihâimana wasété na tiwi 're robzei'õ za'ra wa'aba mono tõ. E marĩ wa. 'Re ihâimana u'âsi mono Pẽ'ẽzani hã te ai'ãma 're hâimana za'ra wa'wa, atob'rata to ré ne 're i'aihâimana za'ra wa'aba mono zé hã, za niwa bâdâ i'rãsutu ãma te te i'asõ'reptu za'ra wa'aba zé hã. 31 Uburé 're ida'ruiwapari u'âsi za'ra wa'aba mono zé hã rẽme pese za'ra wa'aba, duré asiti'ru hã duré asahi hã duré aimreme 'rãihâ na dama 're i'apari za'ra wa'aba mono zé hã duré da'ãma 're iwasété za'ra wa'aba mono zé hã duré uburé marĩ iwasété 'manharĩ zama! 32 Aihâimana wẽ na si 're aihâimana za'ra wa'aba mono. Duré asimizawizé hã dama 're hâi'ré za'ra wa'aba mono, da'ãma 're i'aiba za'ra wa'aba mono zéb zarina. Marĩ iwasédé da te ai'ãma 're i'manharĩ za'ra wa'aba mono zé hã da'ãma 're 'madâ'â u'âsi za'ra wa'aba mono tõ, 'Re ihâimana u'âsi mono hã aiwasédé te te ai'ãma 're i'a'madâ'â aba mono õ ne, Cristu hã asada dâ'â aba wamhã.