Paulu hã, Zudeu'õ norĩ wazari te te iromhurizé
3
Ãne wa, Zudeu'õ norĩ, wa hã Paulu 'Re ihâimana u'âsi mono wi, wa te te ai'ãma 're rowaptẽrẽ za'ra wa'wa, asawi te za'ra wa'aba. Cristu Zezusihi ma romhuri'wa na 're ĩhâimana mono u'âbâ, wa dazazéb 'remhã za. 2 Aima waihu'u pese za'ra wa'aba di tô, 'Re ihâimana u'âsi mono tinhimizawizéb zarina ã hã romhuri te te ĩma isõmri na hã, ai'udâna za'ra wa'aba. 3 'Re ihâimana u'âsi mono hã tite rowa'õno dama waihu'u ãna aré 're ihâimana mono hã te te ĩma ihâi'rézéb zarina wa tô oto waihu'u. Taha na wa tô ãma rob'ui'éré, 'rutu na. 4 Ta hã 're sõré za'ra wa'aba mono wamhã, te za iwaihu'u za'ra wa'wa, Cristuhu wasu'u dama waihu'u ãna 're ihâimana mono te iwaihu'u pese na hã. 5 Duréihã, ã hã rowasu'u dama waihu'u ãna 're ihâimana mono hã, a'uwẽ norĩ ma 'Re ihâimana u'âsi mono te te hâi'ré õ di. Tanei õ di ãhã na hã. Tipẽ'ẽzani na ma tô oto 'Re ihâimana u'âsi mono hã hâi'ré, tizadawa wasu'u'wa aimawi tãma 're ihâimana za'ra mono norĩ ma, duré tizadawa 'mahârâ'wa norĩ ma zama. 6 Dama waihu'u ãna rowasu'u aré 're ihâimana mono hã, ã hã: Rowasu'uwẽ zarina te Zudeu'õ norĩ hã Zudeu norĩ zu oto tãma 're hâimana za'ra, 'Re ihâimana u'âsi mono iwẽ uptabi te te dama 're i'apisutu mono na hã. Ta norĩ hã aiwa dahâiba na dapru siré 're ihâimana za'ra mono ne, te oto Zudeu norĩ me simisutu 're hâimana za'ra. Te duré oto dasiré 're hâimana za'ra, 'Re ihâimana u'âsi mono te te dama iropisutuzém na Cristu Zezusihi ãma.7 'Re ihâimana u'âsi mono nhoprubzé iwẽ uptabi hã tinhimizawizéb zarina ma tô ĩma tisõ, tiwaihu'u pese uptabi zarina. Taha zarina ma tô ĩnha, tãma iromhuri'wa na 're ĩhâimana mono da, Rowasu'uwẽ hã te 're 'mahârâ mono da. 8 Wa hã dazahâpâ uptabi, wa ĩwapu na 're ĩhâimana, 'Re ihâimana u'âsi mono nhib'a'uwẽ norĩ 'remhã. Tane nherẽ, 'Re ihâimana u'âsi mono hã ma tô romhuri aimawi iwẽ uptabi hã ĩma tisõ, Zudeu'õ norĩ ma Rowasu'uwẽ hã te 're wasu'u mono da, Cristuhu ãma marĩ iwa'âbâ za'ẽne isi'utõrĩ waihu'u õ 're ihâimana za'ra mono hã. 9 Aimawi romhuri iwẽ uptabi hã ma tô duré ĩma tisõ, ite rowa'õno dama waihu'u ãna aré 're ihâimana mono hã te dama 're hâi'ré mono da. Ropoto na'rata hawim haré ma tô ã hã ite rowa'õno dama waihu'u ãna 're ihâimana mono hã simi'uri na aré 're hâimana, 'Re ihâimana u'âsi mono uburé marĩ te te i'apoto ãma. 10 'Re ihâimana u'âsi mono ma tô sima wẽ, tizazei'wa norĩ ãma, hâiwa ãma duré hâiwa nho're na siptete na 're ihâimana za'ra mono hã duré ipire norĩ hã te te waihu'u za'ra da, ite rowaihu iwẽ hã iwa'õtõ mono bâ. 11 Ãne zarina, 'Re ihâimana u'âsi mono hã ma tô 'manha, te te sima irowa'õtõzé isi'utõrĩ õ, Cristu Zezusi Wanhib'apito ãma te te i'uwaimrami hã. 12 Tahawa, Cristuhu ãma 're wahâimana za'ra mono wa, wa te wasina 're i'umnhasi za'ra mono zéb zarina, wa wapahi ãna 're wasimasa 'Re ihâimana u'âsi mono nho'remhã, wasiwawãi ãna. 13 Tahawa, wa za ãma aiwi waptẽrẽ za'ra wa'wa. Ma'ãpé aiwi 're robzei'õ za'ra wa'aba mono tõ, ai'u'âbâ za'ra wa'aba te 're irobzépata mono na hã. E marĩ wa. Ta hã te za aipire na 're i'aihâimana za'ra wa'aba mono zé hã te te aima sina 're ãwisi za'ra wa'wa.
Paulu hã, isazei'wa norĩ ãma te te irowaptẽrẽzé
14 Ãne zarina, wa Wamama nho're ĩhi'rãtitõ 're ĩsimasisi. 15 Ta hã te uburé isimipoto norĩ hâiwa ãma duré ti'ai ãma zama 're ihâimana za'ra mono norĩ 're ihâimana za'ra mono zé hã te te tãma 're anhomri. 16 'Re ihâimana u'âsi mono wi wa te te 're rowaptẽrẽ, tiwaihu'u pese uptabi hawi Tipẽ'ẽzani na asiptede hã te te aima sõmri za'ra wa'aba da, aipẽ'ẽ 're asiptete sina 're aihâimana za'ra wa'aba mono da. 17 Wa duré te tiwi 're waptẽrẽ, asina 're i'umnhasi za'ra wa'aba mono zéb zarina, Cristu hã aipẽ'ẽ 're, 're sãmra aba mono da. Wa duré te tiwi 're rowaptẽrẽ, wede hã tizari nhiptete na 're isimasa mono ne duré 'ri nhana'rata ne asimizawizém na asiptete na 're aimasa wa'aba mono da, 18 ãne zarina, uburé 'Re ihâimana u'âsi mono nhib'a'uwẽ norĩ siré waihu'u pese za'ra wa'aba da, Cristuhu nhimizawizé isa'ẽtẽ uptabi na i'rãsutu waihu'u õ na. 19 Duré isimizawizé iwaihu'u pese wẽ da hã pire nherẽ, wa te te 're rowaptẽrẽ, tô waihu'u pese za'ra wa'aba da, taha zarina 'Re ihâimana u'âsi mono hã ibâ na te te 're aihâiba ubu za'ra wa'aba mono da, tihâimanazém na.
20 'Re ihâimana u'âsi mono hã waihu'u pese uptabi di, 'rãsutu waihu'u ãna uburé marĩ, wa te 're iwaptẽrẽ za'ra mono nhipai u pese, duré niwamhã uburé marĩ na, wa te 're irosa'rata za'ra mono nhipai u pese, te te ãma wama 're i'a'uwaimrami mono da hã, waihu'u pese uptabi na wa'ãma 're ihâimana za'ra mono zéb zarina. 21 Tahawa, 'Re ihâimana u'âsi mono ãma si wa za ãma 're wawata za'ra, sa'ẽtẽ uptabi na 're ihâimana mono zém na, isib'a'uwẽ norĩ te te 're ihâi'ré za'ra mono zéb zarina, duré Cristu Zezusihi ãma zama, 're dapoto za'ra mono sidâpâsi, õne u'âsi! Tane tô!