4 Tane nherẽ, 'Re ihâimana u'âsi mono da'ãma 're isiba mono zé hã sa'ẽtẽ uptabi di. Duré te te 're iwa'azawi pese mono zé hã sa'ẽtẽ uptabi di. 5 Tahawa, wawasédé hã wa te 're 'manharĩ za'ra mono wa, wapẽ'ẽ 're wadâ'â na 're wanomro mono ré, ma tô oto wahâimanazé ité hã wama sõmri za'ra, Cristuhu ãma oto 're wanomro mono da. 'Re ihâimana u'âsi mono nhimizawizéb zarina ma asõ'reptuzé hã asina i'uwaimrami za'ra wa'wa. 6 Cristu Zezusihi ãma 're wahâimana za'ra mono wa, ma tô 'Re ihâimana u'âsi mono hã isiré wa'ahâiwa'utu, hâiwa ãma duré hâiwa nho're ãma wapire na 're wasi'ubumroi mono da, isiré. 7 'Re ihâimana u'âsi mono ma tô ãne hã 'manha, tinhimizawizé isa'ẽtẽ uptabi marĩ na ãma simiré'é waihu'u ãna 're ihâimana mono hã te te hâi'ré da, niwa za sidâpâsi 're idapoto za'ra mono norĩ ma hã. Ã hã isimizawizé hã tihâimana wẽ zéb zarina ma tô wama hâi'ré za'ra, Cristu Zezusihi ãma.

8 E marĩ wa. 'Re ihâimana u'âsi mono nhimizawizém na ma tô asõ'reptuzé hã asina i'uwaimrami za'ra wa'wa, asina 're i'umnhasi za'ra wa'aba mono zéb zarina. Ta hã aihawib za'ra wa'aba õ di. Tazahã, 'Re ihâimana u'âsi mono nhoprubzé, ta hã. 9 Asõ'reptuzé hã mare di, asihawi marĩ zô 're i'asiwasutu za'ra wa'aba mono zéb zarina hã, ni'wa hã si'madâ'â ze tõ da. 10 E marĩ wa. Wa norĩ hã 'Re ihâimana u'âsi mono nhimipodo, Cristu Zezusihi ãma te te iwa'apodo, romhuri iwẽ hã wa te tãma 're 'manharĩ za'ra mono da, duréi uptabi te te wazô isa'ra pese siromo za'ra, wa te 're 'manharĩ za'ra mono da.

11 A norĩ wa'wa Zudeu'õ norĩ hã, ma'ãpé ãma aipo're pu'u za'ra wa'aba, Zudeu norĩ asihâiwata nhihâri ãna te te 're i'asisi za'ra wa'aba mono na hã, ta norĩ hã isihâiwata nhihâri ré na 'râwi 're sisisi za'ra mono wa, 're sisihâiwata nhihâri za'ra mono wẽ te. Ma'ãpé duré ãma aipo're pu'u za'ra wa'aba, duréihã aré 're i'aihâimana za'ra wa'aba mono zém na hã. 12 Taha bâtâ mono na hã Cristuhu nhiti ma tô aré 're aihâimana za'ra wa'aba mo, dasiré a'uwẽ'õ na. Duré 'Re ihâimana u'âsi mono tinhib'a'uwẽ da, te te sima i'apisutu norĩ siré aré 're aihâimana za'ra wa'aba mono õ di. Te te iropisutu zahi hã aré aima 're hâimana za'ra wa'aba mono õ di, ta hã 'Re ihâimana u'âsi mono tinhib'a'uwẽ norĩ ma, te te ãma iropisutuzé. Tahawa ãme ti'ai ãma dahâimanazé isi'utõrĩ'õ hã asina 're uwaimrami waihu'u za'ra wa'aba mono ãna ma tô aré 're aihâimana za'ra wa'aba mo, duré 'Re ihâimana u'âsi mono hã asiré 're hâimana za'ra wa'aba mono ãna.

13 Tane nherẽ, ãhã na hã Cristu Zezusihi ãma te oto 're anomro aba mo. Duréihã romhâ na 'Re ihâimana u'âsi mono nhiti aré 're aihâimana za'ra wa'aba mono nherẽ, Cristu hã wedepo'o nhonhi'rãmi na isa'ozém na ma tô sitẽme ai'ãwisi za'ra wa'wa. 14 E marĩ wa. Cristuhu si ma tô rowẽ u'â hã wama sina ãwisi za'ra. Taha zarina ma tô duré 'manha, Zudeu norĩ hã Zudeu'õ norĩ me misi a'uwẽ wamri siré 're ihâimana za'ra mono ne 're hâimana za'ra mono da oto. Tihâiba na te te irobzépatazém na ma tô wa'ra ne 're isa mono hã pru, Zudeu norĩ, Zudeu'õ norĩ me 're isi'ruiwapari za'ra mono zé hã. 15 Zudeu norĩ hâimanazém na roti zahi hã ma tô uprosi, da te 're 'manharĩ za'ra mono da, roti ãma 're ihâimana za'ra mono zama. Maparane a'uwẽ sipo'o na 're ihâimana zahuré mono hã ma tô ãma ato, misi haré oto 're hâimana za'ra mono da, itém na duré isiré 're hâimana za'ra mono da oto simisutu. Ãne zarina, ma tô we rowẽ u'â hã ãwisi. 16 Cristu hã wedepo'o nhonhi'rãmi na tidâ'âzém na ma tô uprosi, maparane a'uwẽ wamri aré 're isi'ruiwapari za'ra mono zé hã. Wedepo'o nhonhi'rãmi na tidâ'âzém na ma tô ãma atob za'ra, misi ihâiba na oto 're hâimana za'ra mono da, duré taha na apâ 'Re ihâimana u'âsi mono u te te ãwisi za'ra da. 17 Ãne, Cristu hã ma tô wei mo. Ma tô duré te te 're rowasu'u Rowasu'uwẽ rowẽ u'âsi 're idahâimana za'ra mono zém na hã, aima za'ra wa'aba Zudeu'õ norĩ hã, 'Re ihâimana u'âsi mono nhiti romhâ na aré 're i'aihâimana za'ra wa'aba mono norĩ ma, duré Zudeu norĩ 'Re ihâimana u'âsi mono 'rata 'râwi 're ihâimana za'ra mono norĩ ma zama. 18 Cristuhu u'âbâ, wa za uburé wa norĩ hã 're wanomro Wamama nho're u, Ipẽ'ẽzani iwaihu'u pese uptabi zarina Zudeu norĩ duré Zudeu'õ norĩ zama.

19 Tahawa, Zudeu'õ norĩ a norĩ wa'wa hã dasiré a'uwẽ'õ ne oto 're aihâimana za'ra wa'aba mono õ di, duré dama aiwaihu'u õ ne. A norĩ wa'wa hã dasiré a'uwẽ ne, te oto 're aihâimana za'ra wa'aba mo, 'Re ihâimana u'âsi mono nhib'a'uwẽ na. Isipoto na te oto 're aihâimana za'ra wa'aba mo. 20 A norĩ wa'wa hã 'ri 'rãihâ ne te oto 're aihâimana za'ra wa'aba mo, 'ri na'rata nhana'rata nhisiwi da te 're i'ri za'ra mono ne. 'Ri na'rata nhana'rada hã ta norĩ hã, Cristuhu zadawa wasu'u'wa norĩ duré 'Re ihâimana u'âsi mono zadawa 'mahârâ'wa norĩ. Tawamhã ẽtẽ tõmo wawẽ 'ri na'rata nhana'rata uparizé ipire uptabi hã, ta hã tô Cristu. 21 Ta hã te te 're 'madâ'â pese 'ri 'rãihâ hã, siptete na 're sa mono da. Te duré te te 're 'manharĩ, 'ri 'rãihâ hã prédu wẽ da, Wanhib'apito ma si aimawi 're hâimana mono da. 22 Tane, a norĩ wa'aba zama, Cristuhu ãma 're i'aihâimana za'ra wa'aba mono hã, te Cristu hã ai'ãma 'ri za'ra wa'wa dasiré, 'Re ihâimana u'âsi mono nhorõwa na oto 're aihâimana za'ra wa'aba mono da, Tipẽ'ẽzani na 're isãmra mono zém na.