2 'Re ihâimana u'âsi mono nhimizawizé duré Wamama te rowẽ u'â hã duré Wanhib'apito Zezu Cristuhu te zama, ai'ãma 're ihâimana u'âsi za'ra wa'aba mono da si, iwẽ hã.

3 'Re ihâimana u'âsi mono ãma si wa ãma 're wawata za'ra, Wanhib'apito Zezu Cristuhu mama ãma. E marĩ wa. Ta hã iwẽ hã te te wama 're apisutu mono wa, Cristuhu ãma 're wanomro mono wa. Ta hã ma tô tinhoprubzé iwẽ uptabi hã te te wama 're anhomri, hâiwa hawimhã. 4 Uburé te te aropoto mono wana ré hã, 'Re ihâimana u'âsi mono ma tô sima wa'apisutu siro, ite na 're wanomro mono da, Cristuhu ãma 're iwanomro mono u'âbâ, tô Õhõ ma si 're wahâimana za'ra mono da, duré isõ're wawasédé hã da te wa'ãma 're sa'ra waihu'u za'ra mono ãna 're wanomro mono da.

'Re ihâimana u'âsi mono hã te te 're wa'azawi pese mono wa, 5 ma tô waihu'u siro, i'ra na za tãma 're iwahâimana za'ra mono na hã oto, Zezu Cristu hã wazada idâ'âzéb u'âbâ. E marĩ wa. Ta hã ma tô tãma rowẽ. Duré ã hã te te 'manharĩ da hã, ma tô sima wẽ. 6 Tahawa, wa za ãma 're wawata u'âsi za'ra 'Re ihâimana u'âsi mono ãma si, isimizawizé hã wẽ uptabi wa, wa'âbâ ãna te te wama sõmri za'ra wa, I'ra tãma isawi uptabi u'âbâmhã.

7-8 Cristu hã tiwapru na ma tô wa'awa'â, wazada idâ'â za'ra zém na. Taha zarina 'Re ihâimana u'âsi mono, wawasédé hã te te oto wa'ãma 're ab'madâ'â mono õ di, isimizawizé iwẽ uptabi zarina. Ta hã ma tô sa'ẽtẽ uptabi na te te wama 're anhomri, uburé tite dahâimanazém na rowaihu iwẽ na duré rowaihu'u wẽ na zama. 9 Te te sima irowairébézéb zarina ma tô duré wama hâi'ré za'ra, dama waihu'u ãna te te sima irowa'õtõzé hã te te 'manharĩ da, te te sima iwaihu hã, Cristuhu hâiba na. 10 Ite rowa'õno hã bâdâ i'uwaibaba na ãma sitob da, uburé marĩ hâiwa ãma 're ihâimana za'ra mono hã duré uburé ti'ai ãma 're ihâimana za'ra mono zama, Cristuhu nhimiroti pire zahâpâ 're hâimana za'ra mono da.

11-12 Cristuhu u'âbâ, 'Re ihâimana u'âsi mono hã duréihã ma tô sima wapisutu za'ra, isib'a'uwẽ na tãma 're wahâimana za'ra mono da. Ãne hã ma tô 'manha, te te sima iwẽzéb zarina, uburé marĩ te te 're i'ab'manharĩ mono hã 're hâimana za'ra mono da, wa norĩ hã imorĩ'rata na Cristu hã wasiwawãi ãna te te iropisutuzém na wa te 're i'umnhasi za'ra mono norĩ hã, duré taha zarina iwaihu'u pe iwẽ uptabi na ãma 're wawata za'ra mono da.

13 Tô sena 'Re ihâimana u'âsi mono nhimiroti Rowasu'uwẽ te te i'asõ'reptu za'ra wa'wa hã wapari za'ra wa'aba wamhã, duré saze za'ra wa'aba wamhã, Cristuhu ãma 're anomro aba mono wa, te oto atob'rata to ré ne 're anomro aba mo, aiwaihu'u pese zéb da, 'Re ihâimana u'âsi mono Tipẽ'ẽzani te te aima sõmri za'ra wa'aba wa, te te ãma iropisudu hã. 14 'Re ihâimana u'âsi mono Pẽ'ẽzani hã te wama 're hâimana za'ra, tô sena za wa te 're iwaibui mono na hã, 'Re ihâimana u'âsi mono tinhib'a'uwẽ norĩ ma te te iropisutuzé hã. Taha na wa za wa te 're waihu'u za'ra, 'Re ihâimana u'âsi mono hã tinhib'a'uwẽ norĩ uburé marĩ iwasété hawi za te te 're i'awaibui mono na hã. Tahawa, wa za ãma 're wawata u'âsi za'ra, sa'ẽtẽ uptabi wa.

15 Ãne wa, aiwasu'u za'ra wa'wa Wanhib'apito Zezusi hã asina 're i'umnhasi za'ra wa'aba mono na duré 'Re ihâimana u'âsi mono nhib'a'uwẽ norĩ uburé 're isawi pese za'ra wa'aba mono na zama te iwapari hawim haré, 16 wa ai'ãma 're ĩpo're pu'u u'âsi za'ra wa'wa, te 're rowaptẽrẽ mono sidâpâ. Duré 'Re ihâimana u'âsi mono ãma wa 're ĩwata u'âsi, ai'u'âbâ za'ra wa'aba hã. 17 Wa te te 're rowaptẽrẽ u'âsi duré, Wanhib'apito Zezu Cristuhu te, 'Re ihâimana u'âsi mono wi, Imama iwaihu'u pese uptabi wi hã, Tipẽ'ẽzani te te aima sõmri za'ra wa'aba da, ta hã rowaihu iwẽ hã te te aima sõmri za'ra wa'aba da, duré tô sena 'Re ihâimana u'âsi mono nhimiroti hã te te aima hâi'ré za'ra wa'aba da, taha zarina waihu'u wẽ za'ra wa'aba da. 18 'Re ihâimana u'âsi mono wi, wa duré te te 're waptẽrẽ, asimirosa'rata za'ra wa'wa hã te te aima 'ridawa za'ra wa'aba da, rowa'a ite hã 'madâ'â za'ra wa'aba da, duré rowẽ uptabi zô asiwawãi ãna 're i'asõpré wa'aba mono zé hã waihu'u za'ra wa'aba da, taha da, asô hârâ za'ra wa'aba wa, duré iwẽ uptabi te te 're i'apisutu mono na hã, tinhib'a'uwẽ norĩ ma te te ãma iropisutuzé hã waihu'u za'ra wa'aba da, 19 duré iwaihu'u pe hã sa'ẽtẽ uptabi na wa'ãma 're ihâimana za'ra mono hã wa te 're isaze za'ra mono norĩ ãma hã. Ã hã iwaihu'u pe, wa'ãma 're ihâimana za'ra mono hã, tô ta hã iwaihu'u pe siptete uptabi na 're ihâimana mono, 20 taha na ma tô Cristu hã apâ ãma hâiwa'utu. Taha na ma tô duré tãma pisutu, isimire niwĩ 're sãmra mono da, hâiwa ãma hã. 21 Cristu hã te pire uptabi na 're hâimana, hâiwa ãma duré hâiwa nho're ãma da'madâ'â'wa norĩ nhipai u, duré roti'wa norĩ nhipai u duré siptete na wasété na 're ihâimana za'ra mono norĩ nhipai u zama. Pire uptabi na 're ihâimana mono zé hã te tãma 're hâimana, uburé roti'wa norĩ 'madâ'â nhiptete na 're ihâimana za'ra mono norĩ nhipai u, ti'ai ãma ãhã na 're ihâimana za'ra mono hã duré niwa za roti'wa na 're ihâimana za'ra mono norĩ nhipai u zama. 22 'Re ihâimana u'âsi mono hã ma tô pisutu, Cristuhu nhimiroti pire zahâpâ uburé marĩ hã 're hâimana za'ra mono da. Ma tô duré pisutu, uburé marĩ nhipai u pire uptabi na 're hâimana mono da, uburé isazei'wa norĩ ma. 23 Isazei'wa norĩ hã, Cristuhu hâiba te 're hâimana za'ra. Cristu hã uburé pese marĩ hã te te 're ab'madâ'â pese mono wa, te isazei'wa norĩ 'rã na 're hâimana.