2 Wa wa te ai'ãma 're rowaptẽrẽ u'âsi za'ra wa'wa, 'Re ihâimana u'âsi mono tinhimizawi pese zé hã duré Wanhib'apito Zezu Cristuhu te zama, te te aima 're isõmri u'âsi za'ra wa'aba mono da si, duré ihawi rowẽ u'âsi zama.

3 Ai'ãma 're ĩpo're pu'u za'ra wa'aba mono sidâpâsi, wa ĩte 'Re ihâimana u'âsi mono ãma hã 're ĩwata u'âsi. 4 Te duré ai'ãma 're rowaptẽrẽ za'ra wa'aba mono sidâpâsi, wa ĩtoi uptabi na te 're rowaptẽrẽ, 5 ĩ'ãma i'aime za'ra wa'aba zéb u'âbâ, bâdâ imorĩ'rata na ĩma ihâimanazéb ãma Rowasu'uwẽ na te irowasu'uzém hawim haré ãwa bâtâ u hã. 6 Tahawa, ĩsiwawãi ãna wa ĩhâiba. Romhuri iwẽ na te te ai'ãma isãna'rata za'ra wa'wa hã^a, ta hã te za duré ãma uzusi, bâdâ i'rãsutuzéb u Cristu Zezusi apâ we imorĩzéb u. 7 Tahawa, tô i'uwaibaba ãne na te ai'ãma irosa'rata za'ra wa'aba na hã, ĩpẽ'ẽ 're, 're aihâimana za'ra wa'aba mono wa. Mare di, dazazéb 're, ĩza wapsi hã. Tazahã, Rowasu'uwẽ 'wawi 're ĩza mono wab zama, duré 'Re ihâimana u'âsi mono nhimiroti tô sena na 're ihâimana mono na te 're rowasu'u mono wab zama. Ãne wa, uburé ma tô ĩsiré 're aihâimana za'ra wa'aba mo, bâdâ 'Re ihâimana u'âsi mono te te ĩma isõmrizéb ãma hã, tinhimizawi pese zéb zarina. 8 Ãne na hã 'Re ihâimana u'âsi mono ma si ĩwaihu'u pese di, uburé ai'ãma 're ĩpẽ'ẽzé za'ra wa'aba mono na hã, duré tô sena te 're i'asawi pese za'ra wa'aba mono zém na zama, Cristu Zezusihi nhimizawizém na.

9 Ãne, wa duré te ai'ãma 're rowaptẽrẽ u'âsi za'ra wa'wa: Asimizawizé hã aima isa'ẽtẽ u'âsi za'ra wa'aba mono da si, duré dahâimanazém na rowaihu iwẽ hã aima 're ihâimana za'ra wa'aba mono da si, duré rowaihu'u wẽ wahu ré aima 're ihâimana za'ra wa'aba mono da si, 10 iwẽ si asima 're pisutu u'âsi za'ra wa'aba mono da. Ãne wapsi, Cristu hã apâ we imorĩzé bâtâ ãma hã te za aiwasédé ai'ãma 're ihâimana za'ra wa'aba mono wi, isiti aihâimana za'ra wa'wa, duré aiwasédé 're i'manharĩ za'ra wa'aba mono na da te ai'ãma isa'ra waihu'u aba õ na. 11 Duré, Zezu Cristuhu ãma 're aihâimana za'ra wa'aba mono wamhã, romhuri iwẽ hã ahâ na te za 're i'manharĩ za'ra wa'aba mo, 'Re ihâimana u'âsi mono ãma 're dawata za'ra mono da.

12 Ĩsisãnawã norĩ, wa ĩsima wẽ, waihu'u za'ra wa'aba da, ãne hã: Marĩ ĩzada 're hâimana za'ra mono nherẽ, ma tô ta norĩ wa'rãmi tiza'ẽtẽ, Rowasu'uwẽ hã. 13 Taha zarina ma tô uburé danhib'apito nhorõwa 'madâ'â'wa norĩ dasi'wapéi 'manharĩ'wa norĩ hã duré uburé aimawi norĩ hã waihu'u za'ra, Cristuhu zazei'wai u'âbâ, dazazéb 're ĩzam na hã. 14 Duré ĩsisãnawã norĩ ahâ na ihâimana za'ra hã ma tô Wanhib'apito ãma aptete za'ra, dazazéb 're ĩzab u'âbâ. Tahawa siptete sina te tihâimana za'ra oto, 'Re ihâimana u'âsi mono nhimiroti te te 're iwasu'u za'ra mono da hã, pahi ãna. 15 Tô sena te tô ni'wam norĩ hã Cristuhu wasu'u na ãma ĩnho'ru zarina te te dama 're rob'mahârâ za'ra, duré ĩnhipai u da'ahâ na isiré 're dahâimana za'ra mono zô. Tane nherẽ, ni'wam norĩ hã ĩ'ãma 're sina mono da si, te tô te te dama 're rob'mahârâ za'ra. 16 Ta norĩ ma ĩzawi zarina, te ãne hã te te 're 'manharĩ za'ra, Rowasu'uwẽ 'wawi 're ĩsimapa mono da, 'Re ihâimana u'âsi mono te te ĩpisutu na tãma waihu'u pese za'ra wa. 17 Tane nherẽ, isisa'ẽtẽ da si, te ni'wam norĩ hã Cristuhu nhimiroti na te te dama 're rowahutu za'ra, mare di tô sena hã. E marĩ wa. Ta norĩ ma iwẽ hã, wa hã te tô irobzépata za'ẽtẽ da si, ãme dazazéb 're ĩzab ré hã.

18 Tane nherẽ, ta hã marĩ dai õ di. Isipai u ipire hã Cristuhu wasu'u, da te 're iwasu'u za'ra mono da si, niha na, niwamhã tô sena na danhimirosa'rata wẽ na duré niwamhã dasisa'ẽtẽ da si, da te 're rosa'rata za'ra mono nherẽ. Taha na wa tô te ĩsima 're rowẽ u'âsi. Wa za duré tô te ãma ĩsima 're rowẽ u'âsi, 19 'Re ihâimana u'âsi mono za te te ĩnho'reptu na ĩma waihu'u pese wa, ĩ'ãma irowaptẽrẽ za'ra wa'aba u'âbâ, duré 'Re ihâimana u'âsi mono Pẽ'ẽzani nhimipawaptob zarina, Zezu Cristu hawi we 're ine mono hã. 20 Te ĩsima 're iwẽ uptabi mono hã duré ĩsiwawãi ãna 're ĩnhimipari mono zé hã niwa marĩ na te upai wa, 'Re ihâimana u'âsi mono hã ĩma sisép tõ da. Ãne wamhã, õne u'âsi duré ãhã na hã te za ĩpahi ãna 're ĩhâimana mono zé hã ĩma 're hâimana. Tawapsi uburé marĩ na te 're inharĩ mono zé hã duré marĩ te 're i'ab'manharĩ mono zé hã ĩhâiba ré 're ĩhâimana mono zém na niwamhã duré ĩdâ'âzém na zama Cristu hã sa'ẽtẽ uptabi na 're ihâimana mono zé hã te za ĩ'ãma 're hâimana, ĩ'u'âbâ. 21 E marĩ wa. Ĩma hã ĩhâiba ré 're ĩhâimana mono zé hã Cristuhu ma si, wa za tô 're ĩhâimana. Duré tô ĩdâ'â wamhã, ta hã oto isipai'u wẽ uptabi di, ĩma hã. 22 Tane nherẽ, duré 're ĩhâimana hâ mono zô 'wai'â, romhuri iwẽ hã wa aré te 're 'manharĩ. Tahawa, nima hã te ĩsima pisutu waihu'u õ di. 23 Pire uptabi di ĩma hã maparane ihâimana zahuré, nima hã te ĩsima ipisutu da hã: Ihâiba amo hã wa ĩsima wẽ upta, ĩdâ'â da, Cristuhu siré oto 're ĩnhamra mono da, ta hã wẽ uptabi wa. 24 Tane nherẽ, tô i'ru zahi ĩhâiba ré 're ĩhâimana mono da hã a'â, ai'udâna za'ra wa'aba. 25 Taha na tô sena na te ĩsina iwaihu'u zarina, wa za tô a'â 're ĩhâimana. Duré wa za uburé asiré za'ra wa'aba tô 're ĩhâimana, te 're aipawaptob za'ra wa'aba mono da, aiprédub za'ra wa'aba da, duré 'Re ihâimana u'âsi mono asina 're i'umnhasi za'ra wa'aba zém na, rowẽ sina 're aihâimana u'âsi za'ra wa'aba mono da. 26 Ãne wamhã, duré za apâ asiré ĩhâimana za'ra wa'aba wamhã, te za ĩ'ãma asima irowẽ za'ra wa'aba zé hã aima tihâimana za'ra wa'wa, Cristu Zezusihi ãma 're i'aihâimana za'ra wa'aba mono zém na hã.

27 Tahawa, ãhã na hã niha tô romhâimana mono nherẽ, ma'ãpé asima sô asõpré wa'aba, tô sena Cristuhu wasu'uwẽ itém na si ãma 're aihâimana za'ra wa'aba mono da. Ãne wamhã, te asabu za'ra wa'aba da, ãma ĩmorĩ da wamhã, duré ãma ĩmorĩ dai õ wamhã, wa za waihu'u za, asiptete sina ãma i'aihâimana za'ra wa'aba na hã, duré asimirosa'rata misi ré 're i'aihâimana za'ra wa'aba mono na zama. Wa za duré waihu'u za, asiptete sina 'Re ihâimana u'âsi mono asina 're i'umnhasi za'ra wa'aba mono zém na ãma i'aihâimana za'ra wa'aba na hã, duré simisutu misi haré Rowasu'uwẽ u'âbâ 're i'ai'wapé za'ra wa'aba mono zém na zama. 28 Asitob'ru norĩ ma, 're aipahi za'ra wa'aba mono tõ. Ma'ãpé asib'ru na 're aihâimana u'âsi za'ra wa'aba mono. E marĩ wa. Ta hã asitob'ru norĩ ma 're hâimana za'ra mono wa, za ãma 're i'ai'uté za'ra wa'aba mono na iwaihu'uzéb da hã, duré a norĩ wa'wa hã marĩ na ai'uté'wa na 're i'aihâimana za'ra wa'aba mono na hã. E marĩ wa. 'Re ihâimana u'âsi mono si te za marĩ na 're ai'uté za'ra wa'aba mono da hã, te te aima 're sõmri za'ra wa'wa. 29 E marĩ wa. Ta hã ma tô iwẽ uptabi hã aima pisutu za'ra wa'wa, Cristuhu ma 're romhuri za'ra wa'aba mono da. Mare di, 're isaze za'ra wa'aba mono da si hã. Tazahã, i'u'âbâ 're robzépata za'ra wa'aba mono da zama. 30 E marĩ wa. Ãhã na hã te ĩme aihâimana za'ra wa'wa, robzépada hã tô ĩ'ãma i'madâ'â za'ra wa'aba na. Ta hã te duré ãhã na iwapari za'ra wa'wa, zahadu te 're isépata mono na.