Cristuhu zazei'wa norĩ, si'madâ'â zei ãna 're ihâimana za'ra mono zé
2
Cristuhu ãma 're aihâimana za'ra wa'aba mono wa, asiptete za'ra wa'aba di. Isimizawizé hã te duré rowẽ te te aima 're sani za'ra wa'wa. Te duré 'Re ihâimana u'âsi mono Pẽ'ẽzani siré 're aihâimana za'ra wa'aba mo. Taha zarina te duré asima aihâimana wẽ na 're aihâimana za'ra wa'aba mo, aihâimana zasi ãna. Te duré asi'ãma 're aiwamri za'ra wa'aba mo. 2 Tahawa, ma'ãpé rowẽ hã wahuré asina ĩma 're sani za'ra wa'aba mono. Tahawa, wa za duré aiwi waptẽrẽ za'ra wa'wa, ãne: Ma'ãpé aiwap si 're rosa'rata za'ra wa'aba mono, ni'wa hã rosa'rata na sipai ãna. Duré aiwap si 're asisawi pese za'ra wa'aba mono. Duré aiwap si sena na marĩ na aipẽ'ẽ na duré asimirosa'rata na 're asisaze za'ra wa'aba mono. 3 Marĩ hã 'râwi asima 're iwẽ za'ra wa'aba mono zéb zarina, 're 'manharĩ za'ra wa'aba mono tõ, asi'madâ'â ze zarina, niwamhã duré ai'rã nhimiza'rese õ zarina da te 're ai'uzei wẽ za'ra wa'aba mono zô hã. Tazahã, asi'madâ'â zei ãna dama 're aihâimana za'ra wa'aba mono. Duré asi'upana dapire na 're da'madâ'â za'ra wa'aba mono. 4 Ni'wa hã marĩ te te sima 're iwẽ mono zô si, sima si 're rĩtĩ mono tõ. Tazahã, dama zama duré 're rĩtĩ mono.5 Ma'ãpé rosa'rada hã aiwapsi aima 're hâimana za'ra wa'aba mono, Cristu Zezusi te te 're irosa'rata mono ne.
6 Ta hã, 'Re ihâimana u'âsi mono hâimanazém ne, 're hâimana uptabi mono nherẽ, ti'ai u we morĩ wamhã, 're si'madâ'â mono õ di, 're hâimana mono da hã aiwa 'Re ihâimana u'âsi mono sine.
7 Tazahã uburé marĩ tite hã ma tô sisa'u a'â rẽme za'ra. Dama romhuri'wa ne, ma tô a'â 're hâimana. Ti'ai ãma a'uwẽ hâiba na ma duré si'a'uwẽ. Tawamhã a'uwẽ hâimanazém na 're hâimana mono wamhã,
8 wapu na ma tô 're si'madâ'â. Duré 'Re ihâimana u'âsi mono nhimiroti ma tô te te 're ab'madâ'â pese, tidâ'âzéb u, tô duré wedepo'o nhonhi'rãmi na idâ'âzé pire uptabi nherẽ.
9 Tahawa, 'Re ihâimana u'âsi mono, ma tô Zezusi hã pisutu, pire uptabi na danhipai u dama 're hâimana mono da. Ma duré isisi hã tãma pisutu, uburé danhisi nhipai u pire uptabi na 're hâimana mono da,
10 Zezusihi nhisi ma, uburé pese 're idahâimana za'ra mono hã dahi'rãtitõ tãma 're dasina mono da, hâiwa ãma duré ti'ai ãma, duré adâ 're ihâimana za'ra mono zéb ãma zama,
11 duré uburé dazadawa na isisi na ãma 're dawata za'ra mono da, Zezu Cristuhu si Wanhib'apito na hã, duré 'Re ihâimana u'âsi mono Imama ãma zama 're dawata za'ra mono da, i'u'âbâ.
Cristuhu zazei'wa norĩ, te za te te dama 're rowa'a za'ra
12 Tahawa, ĩsisãnawã norĩ, ĩma i'asawi pese za'ra wa'aba norĩ, a norĩ wa'wa hã ĩnho'a 'Re ihâimana u'âsi mono nhimiroti 're i'madâ'â pese za'ra wa'aba mono ne, te za duré ĩnho'ai õ nherẽ, oto 're i'madâ'â pese za'ra wa'aba mo, ĩnho'a ré nhipai u. Ma'ãpé asimiromhuri na ãma 're uzusi u'âsi za'ra wa'aba mono, 'Re ihâimana u'âsi mono wazéb sina, duré pipa sina, te te i'asõ'reptu za'ra wa'aba zéb zarina, 're i'anomro wẽ wa'aba mono zém na tãma ãma asina 're uwaimrami u'âsi za'ra wa'aba mono da. 13 E marĩ wa. 'Re ihâimana u'âsi mono hã te ai'ãma za'ra wa'aba te te 're romhuri u'âsi, uburé marĩ te te sima 're iwẽ mono zép si 're 'madâ'â pese za'ra wa'aba mono da, ãma tãma 're uwaimrami za'ra wa'aba mono da, asimirosa'rata na duré marĩ 're i'manharĩ za'ra wa'aba mono zém na zama.
14 Uburé marĩ hã aiwapsari ãna 're 'manharĩ wẽ za'ra wa'aba mono, duré 're asiwasu za'ra wa'aba mono ãna zama, 15 marĩ iwasédé 're i'manharĩ za'ra wa'aba mono na, da te 're aiwasu'u wasété waihu'u za'ra wa'aba mono tõ da, duré marĩ iwasédé hã ai'ãma 're hâimana za'ra wa'aba mono tõ da, 'Re ihâimana u'âsi mono 'ra, marĩ na te te 're i'upa za'ra mono õ na si 're anomro aba mono da, dawasété na si 're idanomro mono norĩ wazarimhã, 'Re ihâimana u'âsi mono, da te 're waihu'u za'ra mono da, da te dasima 're iwẽ za'ra mono õ norĩ wazarimhã. Ta norĩ wa'wa, te za 're irowa'a za'ra wa'aba mo, wasi norĩ hâiwa na te te 're irowa'a za'ra mono ne. 16 Ãne wamhã, te za tãma 're iwasu'u za'ra wa'aba mo, rowasu'u dahâimana u'âsi zém nhomri'wa hã. Ãne 're 'manharĩ za'ra wa'aba mono wapsi, wa za ĩtob'uzu, niwa Cristu apâ we imorĩzé bâtâ ãma hã. E marĩ wa. Ta hã za te te ĩma hâi'ré wa, te 're iromhuri pese mono zé hã taréi õ na.
17 'Re ihâimana u'âsi mono asina 're i'umnhasi za'ra wa'aba mono zé aima 're ihâimana za'ra wa'aba mono zéb u'âbâ, te za 're asisõmri za'ra wa'aba mo, danhimizama zata na danhoprubzé, da te 're isõmri za'ra mono ne, 'Re ihâimana u'âsi mono ma, 're romhuri za'ra wa'aba mono da. Duré wa hã asõpru wa'aba zéb siré ĩsisõmri da nherẽ, ta hã te za rowẽ uptabi hã ĩma tisõ. Wa za duré ai'ãma ĩsima rowẽ za'ra wa'wa. 18 Tane, duré ma'ãpé a norĩ wa'aba zama ĩsiré asima rowẽ za'ra wa'aba.
Timotiu norĩ, Epafrodituhu me te te sima irowa'õtõ zahuré zé
19 Wanhib'apito Zezusi te te sima iwẽzéb zarina wamhã, wa ĩsima 'madâ, Timotiu hã te ãma atẽme satõrĩ su'u za'ra wa'aba da. Ĩma rowẽ hâ, aiwasu'u wẽ za'ra wa'wa we ĩtẽme wisi wamhã. 20 Wa ĩsima wẽ, te ãma atẽme satõrĩ za'ra wa'aba da, ni'wai õ wa isine hã, tô sena tãma iwẽ taha ma hã, rowẽ na si 're aihâimana za'ra wa'aba mono da hã. 21 E marĩ wa. Aimawi norĩ hã te te sima 're iwẽ za'ra mono zéb zô si, sima sô 're sõpré mono wa, mare di, Zezu Cristu te te sima 're iwẽ mono zéb zô hã. 22 Tazahã, a norĩ wa'aba ma, aima waihu'u pese za'ra wa'aba di, Timotiu hã tihâimanazé iwẽ na te te ihâi'rézém na hã. Taha me wa wa te wasiré 're romhuri, Rowasu'uwẽ na wa te ropé da hã, da'ra timama siré te te 're iromhuri mono ne. 23 Tahawa, ta hã te ãma atẽme satõrĩ za'ra wa'aba da, wa ĩsima 'madâ, niha na za ãme ĩma iromhâimanazé te ĩsina waihu'u pari wamhã. 24 Tahawa, Wanhib'apito si, wa duré ĩsina umnhasi, nimahã na hã ĩzama ãma atẽme ĩmorĩ su'u za'ra wa'aba da, romhutu na.
25 Wa duré 'madâ'â zahi, wasisãnawã Epafroditu ĩsiré romhuri'wa hã apâ te ãma atẽme satõrĩ za'ra wa'aba da. Ta hã dasi'wapéi 'manharĩ'wa norĩ sisababa te te 're ida'wapé za'ra mono ne te ĩzababa 're hâimana. Ta hã ĩnhimnhasi ré hã ma tô wẽ ĩtẽme isatõrĩ za'ra wa'wa, ĩ'ãma sime da. 26 Ta hã ai'ãma pẽ'ẽzé uptabi za'ra wa'aba di. Duré ai'ãma hâtâ'â za'ẽtẽ za'ra wa'aba di, iwasu'u wapari za'ra wa'aba wa, ihâzé na hã. 27 Tô sena, ma tô tihâzé tô. Ma aré ai'utõ. Tane nherẽ, 'Re ihâimana u'âsi mono hã ma tô ãma aiwamri. Õhõ ãma si õ di. Duré ĩ'ãma zama, ma tô aiwamri, ĩwi robzei'õ pese tõ da, ãhã na robzei'õ ĩma ihâimana nhipai u. 28 Tahawa, wa za apâ ãma atẽme satõrĩ su'u za'ra wa'wa, asiwi 'madâ'â zahu za'ra wa'aba wa, ãma asima rowẽ za'ra wa'aba mono da, duré ĩma zama suru na robzei'õ hã ĩma hâimana da, asabâdâ za'ra wa'aba hã. 29-30 Tahawa, ma'ãpé asiwi âri wẽ wa'aba, ato za'ẽtẽ na, Wanhib'apito zazei'wai wa. Ma'ãpé duré 're wazé pese za'ra wa'aba mono, isine 're idahâimana za'ra mono hã. E marĩ wa. Ta hã aré dâ'â wa, Cristuhu ma romhuri u'âbâ. Ta hã sina hâtâ'â ãna ma tô wei mo, ĩ'ãma sime da, a norĩ wa'wa hã ĩ'ãma i'aimei waihu'u za'ra wa'aba õ nhibrob're.