Cristuhu si, da te dasina 're i'umnhasi za'ẽtẽ za'ra mono zé
3
Ĩsisãnawã norĩ, ma'ãpé oto asima 're rowẽ uptabi za'ra wa'aba mono, Wanhib'apito ãma hã! Te ãma aima rob'ui'éré za'ra wa'aba pari nherẽ, te ãma aima irob'ui'éré zahu za'ra wa'wa hã, te te ĩzadâ'â dai õ di. E marĩ wa. Ta hã ai'wawi za 're simapa za'ra wa'aba mono wa. 2 Ma'ãpé 're asipibui pese za'ra wa'aba mono, wapsã norĩ wi, tô marĩ te te 're i'manharĩ wasété za'ra mono norĩ wi hã. Ta norĩ hã te sadawa za'réi ãna te te dama 're 'ru za'ra, 're dasisihâiwata nhihâri za'ra mono daa. 3 E marĩ wa. Wa norĩ si wa tô sena na danhihâiwata nhihâri ré ne 're wahâimana za'ra, wa te 're isaze za'ra mono zéb u'âbâmhã. Duré wa norĩ si, wa 'Re ihâimana u'âsi mono ãma 're wawata za'ra, Ipẽ'ẽzani wawa 're hâimana za'ra mono wa. 'Râwi 're wasi'umnhasi za'ra mono õ di, marĩ, wahâimanazéb zarina wa te 're i'manharĩ za'ra mono zém na. Cristu Zezusihi ãma 're iwahâimana za'ra mono zém na si wa wasi'ãma 're watob'uzu za'ra. 4 Isarina tô aré, ĩzama marĩ ti'ai ãma 're ihâimana za'ra mono hã te 're i'a'umnhasi mono da hã, ta hã pire na 're 'maihâimana mono 'wa'âhã. Ni'wa hã ã hã marĩ te te 're a'umnhasi mono da, te te 're rosa'rata mono wamhã, wa hã wa aré isipai u ãne hã te 're rosa'rata. 5 Ĩpotozém na 8 na bâdâ ĩ'ãma ne parimhã, ma tô ĩnhihâiwata nhizâri ni. Wa hã Izaraéu nhihudu na ĩpodo, Bẽzami na dawamri nhihudu. Wa hã duré Ebreu uptabi. Duré Mozési, 'Re ihâimana u'âsi mono nhimiroti zahi na te te irob'ui'érézé, te 're i'ab'madâ'â pese mono zarina, wa tô farizeu na 're ĩhâimana. 6 Wa tô te ĩsima 're wẽ upta, 'Re ihâimana u'âsi mono ma si, 're ĩhâimana mono da. Tahawa isazei'wa norĩ ma, wa tô te 're arob'manharĩ wasété aré. Tawamhã ni'wa hã te te ĩzada 'masãmri waihu'u õ di, Mozési 'Re ihâimana u'âsi mono nhimiroti zahi na te te ãma irob'ui'éré upa na 're ĩhâimana mono na hã.7 Duréihã, uburé ã hã marĩ mono hã, ĩma hã ipire uptabi aré, i'uwaibaba newa. Tane nherẽ, ãhã na hã oto, Cristuhu u'âbâ, oto marĩ dai õ di, ĩma hã. 8 Ã norĩ si õ di. Uburé marĩ mono hã marĩ dai õ uptabi na wa oto te 're ab'madâ'â. Ta norĩ nhipai u te wẽ uptabi na marĩ hã 're hâimana. Ta hã Cristu Zezusi Ĩnhib'apito te iwaihu'uzé. Uburé marĩ mono hã wa tô sãmra, rob u, ropru da te 're isãmra mono ne, Cristuhu ma si oto 're ĩhâimana mono da, 9 duré taha siré si oto 're ĩhâimana mono da. Te ĩsima sô 're rob'madâ'â mono õ di oto, 'Re ihâimana u'âsi mono nhimiroti zahi te 're i'ab'madâ'â pese mono zéb zarina, te te ĩwẽsãmri da hã. E marĩ wa. Cristu te 're i'umnhasi mono zéb zarina si, te te ĩwẽsãmri wa. Ã hã isimiwẽsãmrizé hã tô 'Re ihâimana u'âsi mono hawip si, da te 're i'umnhasi za'ra mono zéb zarina. 10 Te ĩsima iwẽ uptabi hã ãhã na hã, Cristu te iwaihu'u wẽ pese da si, duré apâ hâiwa'utu wa, iwaihu'u pe tãma ihâimana hã te pibu da. Wa duré ĩsima wẽ, te te irobzépata ne isiré te 're robzépata mono da, duré idâ'âzém ne te pibu da nherẽ, ĩdâ'âzéb u, 11 taha zarina sô ĩnhimipari da, te sõpẽtẽ da, idâ'â norĩ siré ĩhâiwa'utuzé hã.
Isazei'wa norĩ, dawara na 're idasirẽme za'ra mono ne, 're ihâimana za'ra mono zé
12 Te nharĩ õ di, uburé ãne hã te oto ĩsina i'uwaimrami za'ra na hã, niwamhã duré ĩwẽ uptabi na oto 're ĩhâimana mono na hã. Tazahã, ãhã na hã wa wara u'â, te sasãmri da, taha da, Cristu Zezusi hã ĩ'ãma sib'a'uwẽ wa. 13 Ĩsisãnawã norĩ, te ĩsina 're rosa'rata mono õ di, ãne hã te isasãmri na hã. Tazahã, misi marĩ hã wa te te 're 'manharĩ tô: Ãma 're ĩpo're pu'u mono õ di oto, ĩhâimanazéb 'rata na hã. Duré ĩmorĩ na wa oto te uzusi u'âsi, marĩ ĩnhowa ihâimana za'ra zô. 14 Ĩwara na wa ãma te uzusi u'âsi, ĩwisi wa, marĩ iwẽ uptabi hã te âri da. Ta hã marĩ iwẽ uptabi hã dahâimanazé ité. Taha da, 'Re ihâimana u'âsi mono hã ma tô ĩzô hâ, i'rata 're ĩnhamra u'âsi mono da, Cristu Zezusihi nhimi'manharĩzéb u'âbâ.
15 Tahawa, uburé wa norĩ hã isazei'wa na wapẽ'ẽ 're, 're iwaprédub za'ra mono hã wa za tô ãne hã wa te 're rosa'rata za'ra. Tazahã oto, nima norĩ a norĩ wa'wa hã niha na aimawi 're 'mairosa'rata aba mono wamhã, 'Re ihâimana u'âsi mono si te za uburé te te aima 're ahâi'ré wa'wa sõ'awi. 16 Tahawa, wa te ãma uzusi u'âsi za'ra wa'aba, ãwa bâtâ u wa te isasãmri za'ra zém na.
17 Ĩsisãnawã norĩ, asima sô 're asõpré wa'aba mono, ãma ĩsisanhozéb zarina 're ĩnhizusi za'ra wa'aba mono da. Duré asima 're 'madâ'â pese za'ra wa'aba mono, ãma aima iwasisanho za'ra wa'aba zéb zarina 're ihâimana za'ra mono norĩ hã 're sizusi za'ra wa'aba mono da. 18 Da'ahâ na te 're dahâimana za'ra, Cristu wedepo'o nhonhi'rãmi na isa'ozé nhitob'ru na hã. Ãne na hã wa tô ãma aipo're pu'u ahâ za'ra wa'wa. Tane nherẽ, ãhã na hã wa za duré ãma aipo're pu'u zahu za'ra wa'wa, ĩsiwa'õ sina, ãma za'ra hã. 19 Ta norĩ hâimana 'rãsutu zéb ãma hã, te za 'Re ihâimana u'âsi mono hã te te 're a'uprosi. Duré 'râwi marĩ sihâiba ma si te te sima 're iwẽ za'ra mono zép si te tô te te 're 'ruiwapari za'ra. Ta norĩ hã te 'râwi sina 're wata za'ra, marĩ iwasédé te te 're i'manharĩ za'ra mono na, siséb ãna. Marĩ ti'ai ãma 're ihâimana za'ra mono na si, te duré te te 're rosa'rata za'ra. 20 Tanei õ di, wa norĩ hã. Hâiwa ãma waza'rui uptabi za'ra hã, wa 're wahâimana za'ra. Tahawa, watoi uptabi na wa 're wanhimipari za'ra, Wa'anho'reptui'wa zô Wanhib'apito Zezu Cristu, ta hawi za we imorĩ zô. 21 Wahâiba isib'uware duré idâ'â pe hã te za ãma wawi saprĩ za'ra, ihâiba wẽ uptabi na 're ihâimana mono ne, oto 're wahâimana za'ra mono da. Ta hã waihu'u pese uptabi na uburé marĩ te te 're i'ab'madâ'â mono zém na te za ãne hã 'manha.