2 Ĩhidiba Evodia duré Sĩtiqui, wa za ãma aiwi waptẽrẽ 'wa. Ma'ãpé asiré 're aihâimana aba mono da, asima sô 're airĩtĩ u'âsi aba mono, Wanhib'apito zazei'wai wa. 3 Duré a hã ĩsiré sena na romhuri'wa, wa ãma aiwi waptẽ. Ma'ãpé, ã hã maparane pi'õ norĩ ãma aime zahuré na. Ta norĩ hã ma tô 're sisapẽtẽ zahuré, Rowasu'uwẽ te te ropé da hã ĩsiré, duré Clemetihi zama duré aimawi norĩ ĩsiré romhuri'wa norĩ zama. Ta norĩ nhisi hã te 're hâimana za'ra, 'Re ihâimana u'âsi mono 'rata za idahâimana u'âsi za'ra mono norĩ nhisi ré, ibaihâ 're ihâimana mono na.

4 Ma'ãpé, asima 're rowẽ u'âsi za'ra wa'aba mono, Wanhib'apito ãma hã! Wa za duré ãma sahu: Ma'ãpé asima 're rowẽ u'âsi za'ra wa'aba mono!

5 Ma'ãpé, uburé dama 're hâi'ré za'ra wa'aba mono, aiwaimri 're idazawi za'ra wa'aba mono zé hã. E marĩ wa. Wanhib'apito hã apâ te za wei morĩ su. 6 Marĩ na 're aihâtâ'â za'ra wa'aba mono sina 're anomro aba mono tõ. Tazahã, 'Re ihâimana u'âsi mono wi si 're rowaptẽrẽ za'ra wa'aba mono, sipu'u pese na marĩ ai'ãma 're ihâimana za'ra wa'aba mono na hã. Ãne hã 're 'manharĩ za'ra wa'aba mono, ãma 're aiwata za'ra wa'aba mono sina. 7 Ãne wamhã, 'Re ihâimana u'âsi mono te rowẽ u'â hã, ni'wa te te isadaihu'u waihu'u õ hã, te za aipẽ'ẽ 're duré asimirosa'rata 're, te te 're ai'ab'madâ'â 'wa, Cristu Zezusihi ãma 're aihâimana za'ra wa'aba mono wa.

8 Ĩsisãnawã norĩ, da'rãirẽme ĩnhimi'ui'éré na wa za ãma aipo're pu'u za'ra wa'wa. Ma'ãpé asimirosa'rada hã uburé marĩ iwẽ na si 're 'masisi za'ra wa'aba mono, uburé ãma ida'uzei wẽ na si, duré uburé marĩ i'uptabi na si duré uburé marĩ ãma idawazé pese na si duré uburé marĩ i'uwaibaba na si duré uburé marĩ iwasété õ na si duré uburé marĩ hã wẽ wa, ãma idatob'uzu za'ẽtẽ na si duré uburé marĩ iwẽ uptabi na si. 9 Ma'ãpé duré marĩ iwẽ uburé ĩhawi iwaihu'u za'ra wa'aba zéb zarina 're 'manharĩ u'âsi za'ra wa'aba mono, ĩhawi iwaibui wa'wa hã duré ĩhawi iwapari za'ra wa'wa hã duré te 're ab'manharĩ mono ré, ãma asiwi ĩ'madâ'â aba zéb zarina. Ãne wamhã, 'Re ihâimana u'âsi mono, wama rowẽ nhomri'wa hã te za asiré 're hâimana u'âsi za'ra wa'wa.

10 Wanhib'apito ãma, wa sa'ẽtẽ uptabi na 're ĩwata, ĩ'ãma i'aipo're pu'u za'ra wa'aba zém na ãma sitéb za'ra wa'aba wa. Ma tô aré tô ĩ'ãma aipo're pu'u za'ra wa'wa. Tane nherẽ, bâdâ hã aima wisi za'ra wa'aba õ di, ihâi'ré za'ra wa'aba da hã. 11 E marĩ zô ĩwi ro'wanhi'riti wa, wa ãne hã tinha. Mare di. E marĩ wa. Uburé marĩ ĩma 're ihâimana za'ra mono na te ĩsima 're irowẽ mono zé hã, te waihu'u wa. 12 Ĩma waihu'u pese di, marĩ zô ĩwi 're rowaptâ'â mono wa, 're ĩhâimana mono zé hã, duré tane ĩma waihu'u pese di, sa'ẽtẽ na marĩ ĩma 're hâimana za'ra mono ré, 're ĩhâimana mono zé hã. Wa tô duré waihu'u, sipu'u pese na ĩma 're iromhâimana mono zém na te ãma ĩsima 're irowẽ mono zé hã, ĩsa zô ĩwi rowaptâ'â õ wamhã, duré mra te sépata wamhã, duré marĩ sa'ẽtẽ na ĩma hâimana za'ra wamhã, duré marĩ suru na ĩma hâimana za'ra nherẽ. 13 Uburé marĩ hã te 're ab'manharĩ waihu'u pese mono di, 're ĩnhiptete mono 'wa hã^a te te 're ĩnhiptete mono wa.

14 Ãne nherẽ, ma tô ĩma i'manharĩ wẽ za'ra wa'wa, ĩ'ãma i'aime za'ra wa'aba zém na hã te robzépata ré. 15 A norĩ wa'wa, Filipu ãma isazei'wa 're i'ai'ubumroi wa'aba mono norĩ, aima waihu'u pese za'ra wa'aba di, Masédonia na danhipti'a nho'õmo nhisi hawi ĩmorĩ wamhã, imorĩ'rata na Rowasu'uwẽ na te dama rowasu'u wamhã, rowahutu u asiré 're i'ai'rã'õtõ aba mono norĩ si ma tô asiwi ĩpawapto wa'wa. 16 Duré Tesalonica ãma ropire na ĩhâimana ré hã, ma duré ãma asiwi isõmri 'wa, asiwi ĩpawapto wa'aba zé hã. Mare di, misi haré hã. Tazahã maparane. 17 Asõprubzém na asiwi ĩpawapto wa'aba da, ĩsima sô ĩrĩtĩ wab õ di. Tane nherẽ tô, iwa'rãmi 'Re ihâimana u'âsi mono iwẽ te te aima 're ipisutu za'ra wa'aba mono zé hã aima 're isa'ẽtẽ u'âsi za'ra wa'aba mono da si, aihâiba mono bâ. 18 Uburé wa tô waibu, we ĩma isõmri za'ra wa'wa hã. Ma duré ĩza si'atarẽme za'ra. Ãhã na hã, sô ĩnhimnhasi nhipai u, te ĩma tihâimana za'ra, Epafroditu hã we te te ĩma ãwisi wa, asõprub za'ra wa'aba zé hã. Ta hã aiwa wedewati isazei uptabi na 'Re ihâimana u'âsi mono ma, ãma 're idanhoprub za'ra mono zém ne, danhoprubzé te te 're i'awaibui mono, duré te te tãma 're i'arowẽ mono. 19 Tahawa, ĩte 'Re ihâimana u'âsi mono hã isibro wẽ uptabi na tãma 're ihâimana za'ra mono zéb zarina, Cristu Zezusihi u'âbâ te te wama 're i'anhomri mono da hã, te za aima sõmri za'ra wa'wa za, marĩ zô aiwi 're rowaptâ'â za'ra wa'aba mono wamhã. 20 Wate 'Re ihâimana u'âsi mono ãma si 're iwawata u'âsi za'ra mono da si, Wamama ãma si, õne u'âsi! Tane tô!

21 Uburé Cristu Zezusihi nhib'a'uwẽ norĩ, wa ãma asawi za'ra wa'aba ni. Ĩsisãnawã norĩ ãme ĩsiré ihâimana za'ra norĩ zama, te duré ãma asawi za'ra wa'wa. 22 Uburé ãme 'Re ihâimana u'âsi mono nhib'a'uwẽ na 're ihâimana za'ra mono norĩ, te ãma asawi za'ra wa'wa. Apito Cézaha nhorõwa 're, te te 're iromhuri za'ra mono norĩ hã te duré danhipai u ãma asawi wapti za'ra wa'wa.

23 Wa te te ai'ãma 're rowaptẽrẽ u'âsi za'ra wa'wa, Wanhib'apito Zezu Cristuhu nhimizawizé, aihâiba mono bâ, asiré 're ihâimana u'âsi za'ra wa'aba mono da si! Tane tô.