2 Ma'ãpé asimi'ẽ na rowaptẽrẽ na 're aihâimana u'âsi za'ra wa'aba mono. 'Re rowaptẽrẽ za'ra wa'aba mono ré hã asimiza'rese sina 're aihâimana za'ra wa'aba mono, duré 'Re ihâimana u'âsi mono ãma 're aiwata za'ra wa'aba mono sina. 3 Ãne hã 're 'manharĩ za'ra wa'aba mono wamhã, ma'ãpé duré wa'ãma zama 're rowaptẽrẽ za'ra wa'aba mono, 'Re ihâimana u'âsi mono hã te te wama 'ridawa za'ra da, isadawa wasu'u na wa te 're irob'mahârâ za'ra mono zéb da hã, Cristuhu wasu'uwẽ dama waihu'u ãna aré 're ihâimana mono, wa te 're wasu'u za'ra mono da oto. Ta hã te 're iwasu'u mono u'âbâ, wa dazazéb 'remhã za, ãhã na hã. 4 Tahawa, ma'ãpé ĩ'ãma 're rowaptẽrẽ za'ra wa'aba mono, Cristuhu wasu'uwẽ dama waihu'u ãna aré 're ihâimana mono hã, sõ'awi sadaihu'u pese na te dama 're wasu'u mono da, ĩma ipisutu zahi zarina te ãma 're uwaimrami mono da.

5 Ma'ãpé aihâimana prédup sina duré aimreme zasi ãna 're aihâimana za'ra wa'aba mono, isazei'õ'wa norĩ ma hã. Duré bâdâ aima 're sihutu aba mono ré, 're pawapto wẽ za'ra wa'aba mono, ta norĩ hã. 6 Aiwaimri na duré aimreme ise na dama 're i'aimreme zusi aba mono da si, iwẽ hã, taha zarina i'uwaibaba si dahâiba mono bâ 're dazada'âbâ za'ra wa'aba mono da.

7 Tiquicu hã te za aima ĩwasu'u za'ra wa'wa za. Ta hã wasisãnawã wama isawi pe duré romhuri'wa i'umnha duré wasiré romhuri'wa Wanhib'apito ma romhuri na hã. 8 Ta hã wa ãma atẽme satõrĩ za'ra wa'wa, niha na iwahâimanazém na te te aima wawasu'u za'ra wa'aba da, te te duré asiptete za'ra wa'aba da zama. 9 Onezimu hã te za ãma isiré mo. Ta hã wasisãnawã wama isawi pe duré i'umnha, asiré za'ra wa'aba hã. Ta norĩ hã te za aima rowasu'u pese za'ra wa'wa, ãme iromhâimanazém na hã.

10 Aristarcu hã ĩsiré dazazéb 're isa hã te ãma asawi za'ra wa'wa, duré Marcus, Barnabéhé siwadi. Ma tô iwasu'u waihu'u za'ra wa'wa Marcus hã. Ta hã te te ãma asabu za'ra wa'aba wamhã, ma'ãpé asiwi âri wẽ wa'aba za. 11 Zezus, Zustu na isisi amo hã te duré ãma asawi za'ra wa'wa. Zudeu norĩ Cristuhu zazei'wa na 're ihâimana za'ra mono norĩ 'remhã, ã norĩ si te te ĩsiré 're romhuri za'ra, 'Re ihâimana u'âsi mono da'ãma 're isib'a'uwẽ mono zé sa'ẽtẽ u'âsi mono da hã. Ã norĩ hã te te duré 're ĩnhiptete waptob za'ra.

12 Epafra, rowahutuzéb 're 're ihâimana mono duré Cristu Zezusihi ma romhuri'wa hã te duré ãma asawi za'ra wa'wa. Ta hã te te ai'ãma 're rowaptẽrẽ u'âsi za'ra wa'wa. 'Re ihâimana u'âsi mono wi te te 're rowaptẽrẽ u'âsi, te te 're asiptete u'âsi za'ra wa'aba mono da duré aipẽ'ẽ 're, 're aiprédu wẽ za'ra wa'aba mono da duré 're asisa'ra pese za'ra wa'aba mono da, 'Re ihâimana u'âsi mono te te sima 're iwẽ mono zé hã uburé ãma 're uwaimrami za'ra wa'aba mono da. 13 Ta hã ĩma waihu'u pese di, te te ai'ãma 're iromhuri pese za'ra wa'aba mono na hã duré Laudiséa ãma 're isi'ubumroi mono norĩ ãma duré Ierapoli ãma 're isi'ubumroi mono norĩ ãmab zama.

14 Lucas dawede'wa wama isawi pe hã te ãma asawi za'ra wa'wa, Demasihi zama.

15 Ma'ãpé wama sawi za'ra wa'aba, wasisãnawã norĩ Laudiséa ãma 're isi'ubumroi mono norĩ hã, duré Nifa, duré uburé isazei'wa norĩ isõrõwa ãma 're isi'rã'õtõ mono norĩ zama. 16 Ã hã rob'ui'éré asima sõré za'ra wa'aba parimhã, ma'ãpé asiwi sõmri aba isazei'wa norĩ Laudiséa ãma 're isi'ubumroi mono norĩ zama te te sima sõré za'ra da. Tane duré asima sõré za'ra wa'aba za, Laudiséa hawi rob'ui'éré ãma wisi wamhã. 17 Tawamhã duré tãma rowasu'u za'ra wa'aba za, Arquipuhu ma hã, ãne: “Ma'ãpé asima sô 're airĩtĩ u'âsi mono, ãma 're uwaimrami wẽ mono da, Wanhib'apito romhuri te te aima isõmri hã 're ab'manharĩ mono da.”

18 Wa hã, Paulu, wa duré ãma asawi za'ra wa'wa. Ĩsi'uihâ na ĩnhib'rata na wa oto ãma aima rob'ui'éré za'ra wa'wa. Ma'ãpé ĩ'ãma aipo're pu'u za'ra wa'aba, dazazéb 're ĩzam na, ãhã na hã.

'Re ihâimana u'âsi mono nhimizawizé ai'ãma 're ihâimana u'âsi za'ra wa'aba mono da si, iwẽ hã!