4 Ãne hã wa aima roti za'ra wa'wa, ni'wa hã te te aima rob'rãmi za'ra wa'aba tõ da, roti senai'õ na, niwamhã tô isimiroti hã i'uwaibaba newa. 5 E marĩ wa. Ĩhâiba na hã romhâ na asiti ĩhâimana za'ra wa'aba nherẽ, wa ĩpẽ'ẽ na 'râwi asiré ĩhâimana za'ra wa'wa. Duré wa ai'ãma ĩsima rowẽ za'ra wa'wa, Cristuhu ãma simisutu asiré 're i'aihâimana za'ra wa'aba mono na te waihu'u wa, duré asiptete sina ãma 're aihâimana za'ra wa'aba mono wa, asina 're i'umnhasi za'ra wa'aba mono zém na zama.

6 Ãne wa, Cristu Zezusi hã Asib'apito na saze za'ra wa'aba wa, ma'ãpé ãma 're aihâimana u'âsi za'ra wa'aba mono. 7 Ma'ãpé duré ãma 're aimasa wa'aba mono, rowede hã tizari na siptete na 're isimasa mono ne. Duré taha ãma si 're aihâimana za'ra wa'aba mono, 'ri hã 'ri na'rata nhisiwi da te 're i'ri za'ra mono ne. Duré 're i'umnhasi za'ra wa'aba mono zém na si 're sa'ẽtẽ u'âsi za'ra wa'aba mono, da te aima irowahutu za'ra wa'aba zéb zarina. Duré 'Re ihâimana u'âsi mono ãma si 're aiwata u'âsi za'ra wa'aba mono.

8 Ma'ãpé 're asi'madâ'â pese za'ra wa'aba mono, ni'wa hã tinhimirobzanhamri marĩ dai õre na, ai'ãma 're sib'a'uwẽ za'ra wa'aba mono tõ da, ti'ai ãma danhimirowaihu'u zarina. Ã norĩ hã ti'ai ãma dahâimanazéb zarina hã, duré ihâiba'õ norĩ siptete na ti'ai ãma te te 're idawada'uri wasété za'ra mono hawimhã, mare di Cristuhu nhimiroti hawimhã. 9 E marĩ wa. Cristuhu hâiba ãma si te 're hâimana, uburé pese 'Re ihâimana u'âsi mono 're ihâimana mono zé hã. 10 Tahawa, Cristuhu ãma 're aihâimana za'ra wa'aba mono wa, te duré ibâ oto aima 're hâimana za'ra wa'wa, 're anomro wẽ wa'aba mono da. Ta hã te pire uptabi na 're hâimana, uburé ihâiba'õ norĩ siptete na 're ihâimana za'ra mono norĩ ma hã.

11 Cristuhu ãma 're aihâimana za'ra wa'aba mono wa, ma tô asihâiwata nhihâri ré ne, oto 're aihâimana za'ra wa'aba mo. Mare di, Zudeu norĩ hâimanazéb zarina danhib'rata na danhihâiwata nhihâri na hã. Tazahã, Cristuhu si ma tô aima 'manharĩ za'ra wa'wa, asihâiwata nhihâri ré ne, 're aihâimana za'ra wa'aba mono da. Taha zarina ma tô te te 're wa'anho'reptu, wawasété na si aré 're iwahâimana za'ra mono zém hawi. 12 Ãne hã ma tô aima tiromhâimana za'ra wa'wa, â dawabzuri hã 'manharĩ za'ra wa'aba wamhã. Cristuhu siré ma tô ai'ãma ti'a za'ra wa'aba ni, â 'rowi da te ai'mazasi za'ra wa'aba wamhã. Duré â hawi da te asani za'ra wa'aba wamhã, ma tô isiré aihâiwa'utu za'ra wa'wa, 'Re ihâimana u'âsi mono waihu'u pese uptabi na 're ihâimana mono na asina 're i'umnhasi za'ra wa'aba mono zéb u'âbâ, tô õ hã 'Re ihâimana u'âsi mono Cristu te te ihâiwa'udu hã. 13 Aipẽ'ẽ 're atâ'â na ma tô aré 're aihâimana za'ra wa'aba mo, aiwasété u'âbâmhã, duré zahadu aima 're hâimana za'ra wa'aba mono õ wa, danhihâiwata nhihâri ré ne dahâimanazé, Cristu te te 're i'ab'manharĩ mono hã. Tane nherẽ, ãhã na hã 'Re ihâimana u'âsi mono ma tô oto aipẽ'ẽ 're aihâiwa'utu za'ra wa'wa, Cristuhu siré. Wawasédé hã te te duré oto wa'ãma 're ab'madâ'â aba mono õ di. 14 Ma duré wama pari za'ra, marĩ, wa te 're i'manharĩ wasété za'ra mono zém na rob'ui'éré hã, aré i'ru zahi na 'Re ihâimana u'âsi mono nhimiroti zarina ãma 're iwahâimana za'ra mono zéb da hã. Ta hã ma tô wama pari za'ra tô. Ma tô siptâ'â, wedepo'o nhonhi'rãmi na. 15 Cristu hã wedepo'o nhonhi'rãmi na isa'ozém na ma tô ihâiba'õ norĩ nhiptetezé hã tiwi wazere za'ra. Sõ'awi ma tô ã norĩ ihâiba'õ norĩ hã anhisém no. Dasi'wapéi 'manharĩ'wa norĩ nhib'apito hã tinhitob'ru norĩ ãma te te ai'uté za'ra wẽ te, da'ahâ nho'a sisõré pese na te te isimroi mono ne, ma tô danho'a ta norĩ ihâiba'õ norĩ ãma ai'uté za'ra.

16 Tahawa, ni'wa hã aiwasédé te te ai'ãma hiri aba tõ, asai u'âbâ aba hã duré ihâ'rẽne aba u'âbâ hã, duré niwamhã danhimizaze na dato na da te dasima 're iromhu'u za'ra mono u'âbâ, duré niwamhã a'amo ité 're pusi mono sidâpâsi, 're idato za'ra mono u'âbâ duré niwamhã sabadu sidâpâsi dato da te 're i'manharĩ za'ra mono u'âbâmhã. 17 Uburé ã norĩ hã, da'awã ne si te 're hâimana za'ra, marĩ za 're iwairébé mono waihu'uzé hã. Tazahã, i'uptabi hã Cristuhu ãma si te za da te 're sõpẽtẽ za'ra. 18 Ni'wam norĩ ma hã iwẽ, si'madâ'â zei õ newa dama 're isiwasu'u za'ra mono da hã, duré hâiwa hawi romhuri'wa norĩ ãma 're iwata za'ra mono da hã. Ta norĩ hã te taré 're si'madâ'â ze za'ra, ti'ai ãma da te 're irosa'rata za'ra mono zéb zarina, te te 're rosa'rata za'ra mono wa, marĩ dai õ na, duré sõtõ 'rowim ne marĩ te te 're i'madâ'â za'ra mono zéb zarina, sena newa. Ã norĩ wi 're asi'madâ'â pese za'ra wa'aba mono, marĩ iwẽ uptabi hã waibui wa'aba tõ da, te te asani za'ra wa'aba da, te te sima 're iwẽ za'ra mono norĩ wi hã. 19 Ta norĩ hã Cristuhu ãma 're hâimana za'ra mono õ di, Da'rã na 're ihâimana mono ãma. Cristu hã tiwaihu'u pese na te dahâiba^a hã te te 're ab'madâ'â wẽ, dahi si'uzusizé hã dahâiba te te 're itété za'ra mono ne. Ãne wa, te dahâiba hã 're prédu wẽ u'âsi za'ra, 'Re ihâimana u'âsi mono te te sima 're iwẽ mono zéb zarina.

20 Cristuhu siré ma tô aihâimanazé i'rata na atâ'â za'ra wa'wa. Tahawa, te ãhã na hã asima iwẽ na oto 're aihâimana za'ra wa'aba mo, wa'uburé norĩ ti'ai ãma dawada'uri wasété 'wa norĩ wi hã. Tawamhã bété, e marĩ da, te zahadu 're aihâimana za'ra wa'aba mo, ti'ai ãma siwa'ru 're idahâimana za'ra mono norĩ siré newa. E marĩ da, te bété zahadu ã norĩ te roti hã 're i'madâ'â za'ra wa'aba mo: 21 “Âri tõ ã hã”, duré “téiwa tõ ã hã”, duré “upi tõ ã hã.” 22 Uburé ã norĩ hã te za 're si'utõrĩ za'ra, ãma 're idahâimana za'ra mono zéb zarina. Duré ã norĩ roti hã marĩ dai õ di, ti'ai ãma dasihawim na si roti wa. 23 Ã norĩ roti i'madâ'â na hã rowaihu iwẽ ne hã tô, danhiptete na dawati hã hâiwa hawi romhuri'wa norĩ ãma 're dawata za'ra mono da hã, duré senai'õ nherẽ dasi'madâ'â zei õ na dasina rosa'ratazé hã duré dasihâiba wati pe 'râwi marĩ, da te dasima 're i'manharĩ za'ra mono zém na. Tane nherẽ, ã norĩ hã marĩ dai õ di, dawasédé da te 're 'manharĩ za'ra mono tõ da, ãma 're idasisõwada za'ra mono da hã.