'Re ihâimana u'âsi mono nhimizawizé duré ite rowẽ u'â hã asiré 're ihâimana u'âsi za'ra wa'aba mono da si, Wamama te hã!

3 Wanhib'apito Zezu Cristuhu mama ma, wa te ai'ãma 're rowaptẽrẽ u'âsi za'ra wa'aba mono sidâpâsi, wa 'Re ihâimana u'âsi mono ãma 're wawata u'âsi za'ra. 4 E marĩ wa. Aiwasu'u za'ra wa'wa hã wa wa te 're wapari za'ra, Cristu Zezusi saze za'ra wa'aba wa, 're i'umnhasi za'ra wa'aba mono na hã, duré uburé 'Re ihâimana u'âsi mono nhib'a'uwẽ norĩ, 're isawi za'ra wa'aba mono zém na zama. 5 Tô sena Rowasu'uwẽ, imorĩ'rata na atẽme wisi za'ra wa'aba wi hã, ma tô iwapari za'ra wa'wa, rob'umnhasi sina 're idahâimana za'ra mono zé hã, Rowasu'uwẽ te te dama 're i'ahâi'ré mono hã. Tahawa, 'Re ihâimana u'âsi mono asina 're i'umnhasi za'ra wa'aba mono zé hã duré asimizawi pese zé hã te aima 're hâimana za'ra wa'wa, rob'umnhasi sina 're i'aihâimana za'ra wa'aba mono zéb u'âbâ. Ta hã te asô 're simi'wara siromo 'wa, hâiwa ãma. 6 Ã hã Rowasu'uwẽ asima iwaibui wa'wa hã, 'Re ihâimana u'âsi mono iwẽ te te aima 're ipisutu za'ra wa'aba mono zé, te te aima sina 're ãwisi u'âsi za'ra wa'wa. Ta hã te ropâ te te duré oto 're ropé. Tawamhã ã hã ma tô ai'ãma tiromhâimana za'ra wa'wa tô, 'Re ihâimana u'âsi mono nhimizawizé wasu'u hã imorĩ'rata bâtâ na iwapari za'ra wa'aba zé na'rata hawim haré, duré tô sena 'Re ihâimana u'âsi mono nhimiroti iwaihu'u za'ra wa'aba zém hawim haré. 7 Uburé ãne hã Epafraha ãma, ma tô iwaihu'u za'ra wa'wa, wasiré romhuri'wa wama isawi pese ãma. Ta hã Cristuhu ma romhuri'wa i'umnha, ai'udâ na za'ra wa'aba. 8 Ta hã ma tô wama aiwasu'u za'ra wa'wa, asimizawi pese zé aima 're ihâimana za'ra wa'aba mono na hã 'Re ihâimana u'âsi mono Pẽ'ẽzani nhimipawaptobzéb zarina.

9 Ãne zarina, uburé ãne na aiwasu'u za'ra wa'wa, wa te iwapari za'ra zém hawim haré, niwa ai'ãma rowaptẽrẽ za'ra wa'wa hã wa te sahâri za'ra õ di. 'Re ihâimana u'âsi mono wi, wa wa te ai'ãma 're rowaptẽrẽ u'âsi za'ra wa'wa, ite rowaihu'u na uburé marĩ te te sima 're iwẽ mono zé hã te te aima 're sa'ẽtẽ u'âsi za'ra wa'aba mono da, duré uburé rowaihu iwẽ hã, 'Re ihâimana u'âsi mono Pẽ'ẽzani te te dama 're i'anhomri mono hã. 10 Ãne wapsi, Wanhib'apito te te sima 're iwẽ mono zéb zarina, te za 're aihâimana za'ra wa'aba mo. Te te tãma 're irowẽ mono zép si, te za duré 're i'manharĩ u'âsi za'ra wa'aba mo. Uburé marĩ iwẽ si te za 're i'manharĩ za'ra wa'aba mo. Te za duré 'Re ihâimana u'âsi mono hâimanazém na ãma rowaihu hã asima 're isa'ẽtẽ u'âsi za'ra wa'aba mo. 11 'Re ihâimana u'âsi mono wi, wa wa te 're rowaptẽrẽ ai'ãma za'ra wa'aba hã, tiwaihu'u pe iwẽ uptabi na te te 're asiptete pese za'ra wa'aba mono da, uburé marĩ iwasédé asimi'ẽ sina 're 'wapéi u'âsi za'ra wa'aba mono da. 12 Ãne wa, ato sina te za Wamama ãma 're aiwata za'ra wa'aba mono. Ta hã ma tô te te 're ai'a'rãiwaihu'u 'wa, Rowa'a za'ẽtẽ u'âsi u Da'ãma 're Isib'a'uwẽ mono zéb ãma dame 're aihâimana za'ra wa'aba mono da, tinhib'a'uwẽ norĩ zô te te ipisutu siromo ãma. 13 Ta hã ma tô te te 're wa'anho'reptu, robra nhiptetezé wi. Ma duré wa'a'ãwisi, I'ra tãma isawi uptabi hã te te 're ida'a'madâ'â mono zéb u. 14 Õ hã te tô te te 're wa'awa'âbâ, wawasété na 're iwanomro mono zém hawi. Taha u'âbâ, wawasédé hã te te oto wa'ãma 're ab'madâ'â mono õ di.

15 Cristu hã, 'Re ihâimana u'âsi mono, 'madâ'â waihu'u ãna 're ihâimana mono hâiba 'manharĩ, I'ra ipoto 'rada. Ta hã uburé ropoto nhipai u, te pire uptabi na 're hâimana. 16 E marĩ wa. Õhõ ãma, 'Re ihâimana u'âsi mono hã uburé marĩ te te apoto mono wa, hâiwa ãma hã duré ti'ai ãma zama, i'madâ'â waihu'u pe hã duré i'madâ'â waihu'u õ hã, duré uburé hâiwa nho're na simiroti nhiptete na 're ihâimana za'ra mono, roti'wa norĩ hã duré dama ipire norĩ zama. Õhõ ãma si, duré Õhõ ma si 're hâimana za'ra mono da, ma tô 'Re ihâimana u'âsi mono uburé marĩ te te apoto. 17 Cristu hã uburé marĩ õ uptabi ré, te 're hâimana u'âsi. Duré Õhõ ãma si te uburé marĩ hã i'uwaibaba zarina si 're hâimana za'ra. 18 Õ hã te da'rã nho'õmo na 're hâimana, tô tizazei'wa norĩ 'rã nho'õmo na. Õ hã te dahâimanazé isi'utõrĩ'õ tizazei'wa norĩ ma te te 're anhomri. Duré Õhõ si 'Re ihâimana u'âsi mono 'ra, ipoto'rada hã. Ta hã ma tô hâiwa'utu, õhõ si uburé marĩ ma, imorĩ'rata na 're hâimana mono da, pire uptabi na. 19 E marĩ wa. 'Re ihâimana u'âsi mono te te sima iwẽzéb zarina, I'ra hã isine uptabi 're hâimana mono da, ma tô pisutu. 20 Duré Cristuhu u'âbâ ma tô sima rowairébé, uburé marĩ hã te te sitẽme a'ãwisi da apâ, ti'ai ãma hã duré hâiwa ãma zama. Ãne zarina, 'Re ihâimana u'âsi mono hã ma tô rowẽ u'â hã apâ dama ãwisi, Cristu tiwapru te te isa'warizém na wedepo'o nhonhi'rãmi na.

21 Iwana ré hã, 'Re ihâimana u'âsi mono nhiti ma tô aré 're aihâimana za'ra wa'aba mo. Duré isitob'ru na ma tô aré 're anomro aba mo, marĩ iwasédé 're i'manharĩ za'ra wa'aba mono u'âbâ, duré 're i'asimirosa'rata wasété za'ra wa'aba mono u'âbâ. 22 Tane nherẽ, ãhã na hã Cristu a'uwẽ hâiba na wedepo'o nhonhi'rãmi na idâ'âzéb u'âbâ, 'Re ihâimana u'âsi mono hã ma tô apâ sitẽme ai'ãwisi za'ra wa'wa, sisõ're u aiwasété ãna te te ai'ãwisi za'ra wa'aba da, aiwasédé da te ai'ãma 're sa'ra waihu'u za'ra wa'aba mono ãna. 23 Ãne te za 'Re ihâimana u'âsi mono hã te te 're ab'manharĩ, Rowasu'uwẽ 're iwapari za'ra wa'aba mono zé hã 're sazei utõrĩ za'ra wa'aba mono õ wamhã, duré asiptete sina 'Re ihâimana u'âsi mono 're i'umnhasi za'ra wa'aba mono zém na ãma 're aihâimana za'ra wa'aba mono wamhã, duré asina 're aipahâ za'ra wa'aba mono õ wamhã, Rowasu'uwẽ te te aima iropisutu za'ra wa'aba zéb zô asiwawãi ãna 're asimipari u'âsi za'ra wa'aba mono wamhã. Ã hã Rowasu'uwẽ na hã ma tô da te dasima 're rob'mahârâ za'ra ropâ. Duré taha na romhuri'wa na, wa hã Paulu, wa oto 're ĩhâimana.

24 Ãhã na hã, wa ai'ãma ĩsima rowẽ za'ra wa'wa, te ai'ãma 're irobzépata za'ra wa'aba mono zém na. Duré ĩhâiba na te irobzépatazém na, wa ãma uzusi, ibâ na ĩma hâimana da, ĩwi sô irowaptâ hã Cristu te te irobzépata ne tihâiba zawi te, ta hã isazei'wa norĩ zawi te, te te robzépata wa. 25 'Re ihâimana u'âsi mono, ma tô ĩpisutu, isazei'wa norĩ ma, te 're romhuri mono da. Ma tô duré romhuri hã ĩma tisõ, te ãma 're uwaimrami mono da, ai'ãma za'ra wa'aba. Ta hã ĩte romhuri hã ibâ na te 're 'mahârâ mono da, isadawa wasu'u hã. 26 Ã hã isadawa wasu'u hã, simi'uri pese na aré dawi 're ihâimana mono, ropoto na'rata hawim haré. Tane nherẽ, ãhã na hã ma tô oto tinhib'a'uwẽ norĩ ma hâi'ré. 27 'Re ihâimana u'âsi mono hã ma tô oto sima wẽ, isib'a'uwẽ norĩ, isimiroti tô sena hã duré iwẽ uptabi hã simi'uri pese na aré 're ihâimana mono hã te te oto 're waihu'u za'ra mono da, uburé dapoto mono bâ. Ta hã isadawa wasu'u isimi'uri pe hã, ã hã: Tahata te Cristu hã ai'ãma 're hâimana za'ra wa'wa. Ta hã te duré asiwawãi ãna 're i'aihâimana za'ra wa'aba mono zé hã te te aima 're sõmri za'ra wa'wa, niwa za 'Re ihâimana u'âsi mono te rowẽ na 're ihâimana mono zéb ãma 're aihâimana za'ra wa'aba mono da.

28 Tahawa, ta hã Cristu, wa wa te dama 're wasu'u za'ra. Dahâimanazém na rowaihu iwẽ, uburé wama 're ihâimana za'ra mono zéb zarina, wa wa te ãma 're roti pese za'ra, uburé pese dama. Duré uburé wa wa te dama ãma 're rowahutu pese za'ra, dahâiba mono bâ, 'Re ihâimana u'âsi mono nho're u wa te 're da'ãwisi za'ra mono da, daprédup sina 're idahâimana za'ra mono na oto, duré Cristuhu ãma si 're idahâimana za'ra mono na zama. 29 Taha da, wa duré te 're romhuri pese. Wa duré sada 're ĩsisapẽtẽ pese, Cristuhu waihu'u pe ibâ na ĩ'ãma 're ihâimana mono na, siptete uptabi na ĩwa 're ihâimana mono na.