Mopu va spirit-a noputraim yei tah noporepopoiy revo
4
Mopu aro raꞌai Kristen tah rou neman nena,
beya nopubilip poiy aro nape kekape pipu tah chirai popu veka,
“Spirit ya God-a awirai-a kairai rona.”
Mopu va noputraim yei spirit vemona yah noporepopoiy revo veka,
ero spirit ya God o bauni.
Ku vo korao veka,
prumo yei profet tore mare kekepi veꞌen boko koka vo meꞌri vemona.
2 Pasin vo va nopusave vo Spirit ya God korao veka:
Boh bio raꞌa nairai veka,
“Jisas Krais-a kararo veka bio awaka” kuiniari va nopusave veka Spirit ya God-a kakei riya bio vemona.
3 Toh beyo voro beya kesave awirai veka ve chirirai pova Jisas,
spirit yei emo beya spirit ya God vai.
Emo spirit yei beyo nape kesave ine kepiatrotropu Krais.
Bio ine keyatrotroru Jisas emo,
titja kopurivo veka va nakai,
yah mare kakai veꞌen yah kakei meꞌri vemona.
4 Mopu mevova neman nena,
mopu aro ya God yah awirai mopu kotawo veꞌen awirai yei profet tore.
Ero korao veka,
Holi Spirit bia ya kupuana pako kwinia riya,
boko kako veꞌen tah kakeiroki laip mopu yah katawoka Satan,
bia ya inia kanoi cha ro meꞌri vemona.
5 Aro vemona,
kesave keperepore revo ao vo meꞌri vemona.
Korao veka tah kesave awirai prumo chirirai pore ao vo meꞌri vemona.
Tah aro vo meꞌri vemona kesave ovakoroiy poaka va awirai yei nerivo.
6 Memi aro ya God,
korao veka tah aro voro kesave ya God ero,
kesave awirai memi kerivo.
Toh yei aro beya kiave aro ya God,
beya kesave awirai memi kerivo vai.
Yah rara vemona pon,
kuiniari nemisave ya Spirit vo awirai awaka tah spirit taipo ya beyo karaipaiy tah kapaolim yei ero.
Bio narererova revo God va narereroiy revo aro ovu minia
7 Mopu aro raꞌai Kristen tah rou neman nena,
va nemeremoiy revo aro memi ovu,
ku vo korao veka God ya veku ku vo pasin vo narereroiy aro bombiam.
Aro voro pasin vo neperepoiy revo aro bombiam kwinia riy ero,
kesave ya revo God tah kekepi veka aro me ya God.
8 Bio beya pasin vo narereroiy revo aro ovu nuinia riya,
beya kasave ya God vai.
Ero korao veka,
God ya veku ku vo pasin vo narereroiy revo aro ovu.
9 God-a kasalim ya Ma moikera kanapo ya kararo meꞌri vora kuiniari laip-a nemiko mo boꞌo voro karao romi ero.
Yah pasin vemona God-a kariritami revo vatiron veka karereromi poaka.
10 Pasin vo laikim,
ero pasin ya God.
Memi beya nemitoro veka kemeremova God-a titja nini vai.
Bauni.
Kope pon God-a karereromi titja nini tah Ma moike ya kasalim ya kararo meꞌri veka ofa vora sin memi napereki.
11 Mopu aro raꞌai Kristen tah rou neman nena,
pasin vemona,
God-a kariritami veka,
karereromi poaka.
Korao veka tah memi minia va nemeremoiy revo aro ovu.
12 Bio raꞌa beya God-a kapirikeya vai.
Toh boh nemeremoiy revo aro ovu,
God-a va boko nako ya nakeirokire laip memi yah pasin ya karereromi revo ero va nuinia rimi kupuana.
13 Kemisave veka kekemiroki miya God tah ya minia boko kako yah kakeirokire laip memi.
Ero korao veka,
Spirit ya karomi va nakeiroki laip memi aro bombiam nape kekemi veka kura awaka ya God.
14 Yah ao ve Cha Kan Pako karao kemiyara veꞌen.
Kasalim ya Ma ya kararo vora nako memi varu aro bombiam koka vo meꞌri vemona.
Korao veka tah kemisave awirai vo ao vemona kemipirike emo kemiriraiꞌvo.
15 Boh bio raꞌa nairai veka,
“Jisas ya Ma Biam ya God,”
God-a kakeiroki laip ya bia vemona tah ya minia kakeiroki riya God tah kakei veka kura awaka ya.
16 Korao veka tah kemisave revo veka,
God-a karereromi poaka.
Yah laip memi kemo revo pasin ya.
God ya ku vo pasin vo narereroiy aro ovu.
Yah beyo neperepoiy revo aro ovu,
kekepiroki piya God tah God-a boko kako yah kakeirokire laip yei.
17 Boh nemeremoiy revo aro ovu yah nekemiroki pasin ya Krais karao ero taim kakei meꞌri vemona,
pasin vemona va noporokemi kupuana.
Taim kekemi meꞌri vemona,
kekemi veka Krais veku.
Korao veka tah beya kuiniari nekemi tah ova nemikinakina pako yah nemiriri mo de pako vo kot ya God va nokamap meꞌri vemona vai.
18 Beya nemiriri moa kanapo God vai.
Ero korao veka,
karereromi revo tah ao emo korao kekemiroki revo pasin vo nemeremoiy revo aro ovu.
Yah pasin vo nemeremoiy revo aro ovu,
kosave koririkeki pasin vo nemiriri moa kanapo God.
Boh nemiriri moa kanapo God,
ero koriritao veka,
kemiriri mo ao arape kotaipo poaka va God-a narao romi ero.
19 Kemisave kemeremoiy revo aro ovu,
ero korao veka,
God-a veku karereromi titja nini.
20 Boh bio raꞌa nairai veka,
“Kanasave kanerenova revo God,”
toh inekareitrotroru tah beya karereroiy aro raꞌai Kristen awere rou,
bia emo aotore kairai.
Boh beya nemeremoiy revo aro ovu kemisave kemipirikey ine memi veku ero,
toh korao veka rope tah va nemeremova revo God,
bio ya beya kemipirikeya revo ine memi veku ero?
21 Lo ya Krais karomi korao veka:
Aro kesave keperepova God,
va neperepoiy minia aro raꞌai Kristen awere rou ovu.