1Jn 5

Kristen-a kebilip pova Ma ya God

Beyo kebilip veka Jisas emo ya Krais, kekepi veka mevova ya God. Yah beyo koka nape kesave kepere pova revo aka moike, kesave keperepoiy revo me ya minia. 2 Taim nemeremova revo God tah pa nemekere lo ya, kuiniari nemisave veka kemeremoiy revo aro me ya minia. 3 Boh nemeremova revo God, va pa nemekere lo ya. Yah lo ya emo, koneman tah beya konai vai. 4 Aro kekepi veka mevova ya God, ketawo kupuana vo meꞌri vemona. Jisas-a roma vemona katawo veꞌen. Kemisave kemibilip mova Jisas yah rara vemona pon, kemisave roma vemona kemitawo yah kupuana vo meꞌri vemona kemiewome. 5 Bia nape kasave katawo kupuana vo meꞌri vemona tah kayiewo? Aro nape kesave kebilip veka Jisas ya Ma Biam ya God, aro vemona pon kesave ketawo kupuana vo meꞌri vemona tah kepiewope.

Jisas bia emo nape?

6 Jisas Krais, bia emo ya kakei heven tah kararo meꞌri. Tah Cha Jon kabaptaisim ya pi yah kope karai tah noo kataraki. Beya kakai ro pi pon vai. Baun poaka! Kakai ro pi re noo. Holi Spirit ya ku vo awirai awaka, tah kasave awirai vo pasin ya Jisas Krais-a kairiraiꞌvo. 7 Ao 3-pla kerinia rimi tah keyiriraiꞌvo romi revo veka Krais, bia emo ya God-a veku kasalim ya kakai. 8 Holi Spirit, pi yah noo ao 3-pla vemona awirai moikera kanapo kerekamapim. 9 Taim aro vo meꞌri vemona awirai-a nirirai po pasin yei, kemisave kemibilip mo revo awirai yei. Korao veka tah va nemibilip mo revo awirai ya God-a kasave karomi ero. Ku vo korao veka, awirai ya God-a kasave karomi ero, aka pako kwinia ri tah kotawo awirai kanapo yei beyo vo meꞌri vemona. Ero korao veka, ya beya bia vo meꞌri vemona vai. Baun poaka. Ya God, tah awirai voro karomi ero, ero awirai ya Ma Biam ya veku. 10 Aro kebilip pova Ma Biam ya God ero, awirai vemona kwinia rimoꞌo yei tah kuiniari niriraiꞌvo po. Yah boh bio beya nabilip ro awirai ya God-a kairiraiꞌvo emo, bia emo kairai veka God bia ya aotore. Ku vo korao veka, bia vemona beya kabilip ro awirai ve God-a kairiraiꞌvo rova Ma ya ve. 11 Yah awirai vemona God-a kairiraiꞌvo korao veka: God-a laip vo kwinia toratora karomi. Tah Ma Biam ya ero, ya ku vo laip vemona. 12 Aro kepopokeya Ma Biam ya God, laip vo kwinia toratora kwinia riy. Yah aro beya kepopokeya Ma Biam ya God, laip vo kwinia toratora beya kwinia riy vai.

Kuiniari nemisave veka laip vo kwinia toratora va nuinia rimi

13 Awirai vemona kaneꞌe nopu aro kopubilip po awoꞌo ya Ma Biam ya God, va nopu save veka laip vo kwinia toratora kwinia ripu. 14 Beya kemisave kemiriri taim beten-a kemao mova God tah kemitere moa mo ao. Korao veka tah kemisave veka, boh beten-a nemao mo ao raꞌa God-a veku karerero va nemiko, beten memi va narivo. 15 Kemisave revo veka God-a kasave veꞌen ao koka beten-a kemao tah kemitere moa mo ero. Korao veka tah arape kemitere moa mo ero, kemisave vova veka, ao vemona kemiko veꞌen.

16 Boh bio raꞌa napirikeya raꞌai o rou raꞌa rong-a narao tah rong vemona beya kuiniari norao nareiroki hel, va beten-a narao roa God vora laip vo kwinia toratora naroa. Toh sin ovu kuiniari nererao bio nareiroki yah nakei hel. Beya kanairai va beten-a narao roa God ro ao veka vemona vai. 17 Pasin koka beya kereniniu ero, keretaipo ri ine ya God. Toh ao taipere ovu, beya kuiniari nererao bio nakei reya God-a rarapa tah nareiroki hel vai.

18 Kemisave veka aro kekepi veka me ya God, beya kesave kepopoke pasin vo sin-a nepao vai. Ero korao veka, Ma Biam ya God kasave kaorerariy revo me ya God tah beya karin Satan-a karao roiy toro vai. 19 Kemisave veka memi me ya God, toh kope Satan kasave kakei veka bos yei aro bombiam vo meꞌri koka vemona. 20 Kemisave veꞌen veka Ma Biam ya God kakai veꞌen tah ruru karomi yah save kemiko more ao voro va nererao nemisave ya God awaka vemona. Korao veka tah mare kekemi veka kura awaka ya God re Ma Biam ya Jisas Krais. Jisas Krais ya veku God awaka tah ya veku laip vemona kosave kwinia toratora.

21 Mopu mevova neman nena, va nokepipey revo giaman god-a rarapa.