3
Pirike!
Cha Kan Pako,
kasave karinami veka me awaka ya.
Korao veka tah,
kasave karereromi revo.
Awirai vemona,
emo awaka.
Toh aro bombiam vo meꞌri vemona beya keyarami revo veka memi aro me ya God vai.
Ero korao veka,
God minia beya kesave vai.
2 Mopu aro raꞌai Kristen tah rou neman nena,
mare kekemi veka mevova awaka ya God.
Yah kope pa va nekemi nemao veka rope,
ao vemona beya chirai kovatironki romi revo vora kuiniari nemisave vo.
Toh kemisave veꞌen veka,
taim Krais-a nakamap vatiron,
va nemipirikeya revo ine memi veku,
korao veka tah memi va nemao miya revo veka ya veku.
3 Aro koka inia kekepikeya ero,
inia kestretim yei veku va nekepi neniniu revo ri ine ya God veka ya Krais veku kaniniu revo.
4 Taim aro bombiam-a sin-a inia nepao,
lo ya God-a chavetari.
Ero korao veka,
pasin vo sin koriritao revo vatiron veka em pasin vo lo kwavetari.
5 Kopusave veꞌen veka,
Krais-a kakai vora aototopo naririkereki.
Yah pasin vo sin beya kwinia laip ya vai.
6 Aro kekepiroki piya Krais,
kesave pasin vo sin-a kepepeki poaka.
Aro inia kekepiroki pasin vo sin,
ero aro voro beya kepirikeya tah beya kesave revo vai.
7 Mopu mevova neman nena,
beya nopin beyo neropopepu vai.
Bia nape pa kareke pasin niniu ero,
kaniniu poaka ri ine ya God veka Krais veku kaniniu ri ine ya God.
8 Aro yei sin-a kepao ero,
kiave revo kura ya Satan.a
Ero korao veka,
Satan ya bio namba wan vo sin-a karao kastat ato taim God-a meꞌri vemona karao yah kokai kuiniari revo mare.
Ku vo Ma Biam ya God-a kakai emo,
kakai va boꞌo koka ya Satan-a napereki.
9 Aro kekepi veka mevova ya God,
beya kuiniari pasin vo sin-a niawo niaroro laip yei vai.
Ero korao veka laip neman ya God-a kwiniarokire riy.
Korao veka tah kesave pasin vo sin-a kepepeki poaka tah beya kuiniari nekepiroki vova pasin vo sin vai.
10 Ro rara vemona pon,
kuiniari nemiyara veka aro nape me ya God tah aro nape me ya Satan.
Bio beya kasave karereroiy aro raꞌai Kristen awere rou,
o beya kesave pasin niniu kepao ri ine ya God,
beya kiave mevova ya God vai.
Memi va nemeremoiy revo aro memi ovu
11 Awirai vemona kopurivo veꞌen ato titja veka,
va nemeremoiy revo aro memi ovu.
12 Beya pa nopekeu pasin ya Cha Kein,
bia ya Satan tah kayieya raꞌai awaka ya karai.
Korao veka rope tah kayieya raꞌai awaka ya karai?
Kayieya raꞌai awaka ya karai,
ero korao veka,
raꞌai ya kasave pasin niniu karao ri ine ya God tah ya veku,
pasin taipo aka karao ri ine ya God.
13 Aro raꞌai Kristen awewe rou nena,
beya nopuririko toro taim aro vo meꞌri vemona nebirua mopu.
14 Kemisave veka rara vo rai-a kememeu veꞌen yah kemikamap veꞌen rara vo nekemi tare toratora.
Ao vemona kemisave,
ero korao veka,
kemisave kemeremoiy revo aro raꞌai Kristen awere rou.
Aro voro beya keperepoiy revo aro raꞌai Kristen awere rou baunke kekepi rara vo rai.
15 Bio beya narereroiy aro raꞌai tah rou ya ovu,
karao veka bio ya beyo kayiey keviri.
Kopusave veꞌen veka,
aro yei beyo ovu kepiey keviri ero,
laip vo kwinia toratora beya kwinia riy vai.
16 Pasin vemona pon tah pasin vo nemeremoiy revo aro ovu kemisave,
veka Jisas laip ya veku karomi vora noalpim memi.
Korao veka tah memi minia va laip memi nemoiy aro raꞌai Kristen awere rou vora noalpim yei minia.
17 Boh bio raꞌa ao prumo vo meꞌri vemona nerinia riya tah beya nalpim ya raꞌai Kristen raꞌa o rou nape ao-a kerebaun reya,
pasin ya God karereromi revo beya kwinia riya bia emo vai.
18 Mopu mevova neman nena,
taim nemirai veka pasin vo nemeremoiy aro ovu nuinia rimi,
beya rova nemiraraki tah nemirai kanapo vai.
Riꞌi memi va nemoiy revo aro ovu tah pasin neman-a nemao vora noalpim yei.
19 Ao ve kemisave kemao emo,
va noririta veka kekemi rovome pasin vo awirai awaka.
Yah ao vemona kuiniari riꞌi mariri noromi re kupuana taim neromi ine ya God.
20 Toh boh riꞌi memi kot-a nerimirao ro ao raꞌa,
kuiniari nekemi nao riꞌi mariri ri ine ya God.
Ku vo korao veka,
God-a ao koka kasave veꞌen,
tah save ya kotawo revo save kwinia riꞌi memi ve.
21 Aro raꞌai Kristen tah rou neman nena,
taim riꞌi memi beya kot-a neremirao,
kemisave veka kekemi kemineman ri ine ya God.
Yah kuiniari nekame neromi ine ya God tah beya kuiniari nemiriri vai.
22 Yah ao koka kemitere moa ero kuiniari nemiko.
Ku vo korao veka,
kemisave awirai ya kemirivo yah pa kemekere lo ya karerero ero.
23 Yah lo kupuana karao romi va nemibilip mo awoꞌo ya Ma ya Jisas Krais yah nemeremoiy revo aro ovu veka kairai romi va nemao ero.
24 Aro voro kesave pa kepeke lo ya God ero,
kekepiroki piya God tah ya God minia kakeiroki riy.
Holi Spirit-a kasalim karomi veꞌen tah kakeiroki laip.
Yah ao vemona pon kosave korao kemisave veka God-a kakei veka kura awaka memi.