Krais ya alpim memi
2
Mopu mevova neman nena,
awirai vemona kaneneꞌe vora noalpim mopu va beya kuiniari sin-a nopao ri ine ya God vai.
Toh boh raꞌa sin-a narao ri ine ya God,
kope kuiniari sin ya bio vemona napereki.
Ero kora veka,
Bio Ya Kamakim Memi tah Awirai Memi Kapoi,
kasave katere roa Cha Kan Pako va sin memi napereki.
Yah bio vemona kasave pasin niniu aka kararerare ri ine ya God,
awoꞌo ya Jisas Krais.
2 Bia emo bopo memi kako tah karao ya veku karaveka ofa neman awaka vora sin voro kemao mi ine ya God ero napereki.
Ao emo beya karao romi pon aro kemibilip veꞌen ero vai.
Bauni.
Ao emo karao vora noalpim yei aro bombiam koka vo meꞌri vemona.
Bia ya kasave ya revo God kasave pa karekeu revo lo koka ya
3 Boh pa nemekere lo ya God,
kuiniari nemiyara veka kemisave ya revo.
4 Boh bia raꞌa nairai veka,
“Kanasave ya God,”
toh beya pa karekeu revo lo koka ya,
bia emo aotore aka kairirai tah awirai awaka ya God beya kwinia romoꞌo ya vai.
5 Toh boh bio awirai ya God-a narivo tah pa nareke revo,
bio vemona riꞌi ya karoa revo God tah karererova revo.
Yah rara vemona pon,
kuiniari nemisave veka kekemiroki miya God.
6 Bia nape kasave kairai veka kakeirokire riya God ero,
va pa nareke revo kompo ya Jisas.
7 Mopu aro raꞌai Kristen tah rou neman nena,
nena beya lo tare kaneꞌe nopu vai.
Baun poaka!
Emo lo tora kopuko veꞌen ato titja tah kopusave vo revo,
yah baunke kwinia kokai kuiniari mare.
8 Lo emo minia korao veka lo tare mare inia kaneꞌe nopu vova.
Ero korao veka,
laip ya Jisas re pasin ya tah laip mopu na pasin mopu mare,
koriritao veka lo emo kotare.
Korao veka tah,
roroke inia kwatike konoi yah lait awaka kokamap veꞌen tah mare kwinia emo.
9 Bio nairai kanapo veka kakei lait,
toh ine nareitrotroru aro raꞌai Kristen awere rou,
bio veka emo baunke kakeiroki roroke.
10 Bio ya karereroiy revo aro raꞌai Kristen awere rou,
kakei lait tah ao raꞌa beya rara ya kopoporari va nakirike yah nararo narei vai.
11 Boh bio riꞌi neyataipo tah beya narererova raꞌai Kristen raꞌa o rou,
bia emo kakeirokire roroke tah kaututeroki roroke vemona.
Ero korao veka,
roroke kopoporari veꞌen ine ya tah beya kasave rara vekarope inia kanoi ro.
12 Mopu mevova neman nena,
pas vemona inia kaneꞌe konoi ropu,
ero korao veka,
mopu aro kopubilip pova Jisas Krais.
Korao veka tah God-a sin mopu kapereki veꞌen.
13 Pas vemona inia kaneꞌe konoi ropu aro voro koropi kupuana po bilip rova Jisas Krais atoke kokai kuiniari mare,
yah kopao veka aro aka rika yei kopu kupuana poaka.
Ero korao veka kopusave ya revo Jisas Krais,
bia emo kakei veꞌen ato titja taim God-a ao koka kararerare yah kokai kuiniari mare.
Pas vemona inia kaneꞌe konoi ropu aro kopubilip kupuana pova Jisas,
kopao veka aro yampla kupuana pako kwinia ripu.
Ero korao veka,
koputawoka Satan,
bia ya kasave kanoi cha rore pasin taipo.
14 Mopu mevova neman nena,
pas vemona kaneꞌe konoi ropu veꞌen
ero korao veka,
kopusave ya Cha Kan Pako.
Pas vemona kaneꞌe konoi ropu aro aka koropi kupuana po bilip ato titja yah kokai kuiniari revo mare.
Ero korao veka,
kopusave ya revo Jisas Krais,
bia ya kakei rere veꞌen ato titja taim God-a ao koka kararerare yah kokai kuiniari revo mare.
Pas vemona kaneꞌe konoi ropu veꞌen aro kopubilip kupuana pova Jisas,
kopao veka aro yampla kupuana pako kwinia ripu.
Ero korao veka,
kopubilip pova revo Krais tah awirai awaka ya God kwinia kupuana revo riꞌi tah ruru mopu,
yah koputawoka Satan,
bia ya kasave kanoi cha rore pasin taipo.
Beya nemeremore revo pasin vo meꞌri vemona vai
15 Mopu beya noperepore revo pasin taipere tah ao maramara vo meꞌri vemona vai.
Bia nape karererore revo ao vo meꞌri vemona,
beya kasave karererova revo Cha Kan vai.
16 Ao koka vo meꞌri vemona keresave kereraipami va sin maramara veka nemao:
laik taipo vo reka,
pasin vo aigris,
pasin vo mangal,
pasin vo pianoreremi tah pasin vo iki niuma tah awoꞌo memi veku nemawoko more ao voro kerinia rimi ero tah ao voro inia kemaremare ero.
Yah Cha Kan God,
beya kairai va pasin veka nemao vai.
17 Meꞌri vemona tah ao maramara koka keresave kereraipami aro bombiam koka,
inia konoi yah korao nobaunki nao.
Toh bio kasave pa karekeu laik ya God ero va nakei toratora.
Bio ya ine keyatrotroru Krais kakamap veꞌen
18 Mopu mevova neman nena,
yake kemikamap veꞌen ri taim vo meꞌri vemona korao nobaunki.a
Titja awirai ya birua ya Krais-a kopurivo va nakamap.
Yah mare,
birua prumo ya Krais yah kekamap veꞌen vatiron.
Tah emo koriritao veka kemikamap veꞌen ri taim vo meꞌri vemona korao nobaunki.
19 Aro vemona kekepi pimi veꞌen yah kope kepepemi yah kenopi upuoꞌo.
Tah emo koriritami revo vatiron veka,
beya kekepi veka aro awaka memi vai.
Boh niave aro awaka memi,
va baunke nekepi pimi.
20 Toh kope mopu,
Krais-a Holi Spirit-a karopu veꞌen.
Aro mopu awirai awaka ya God-a kopusave veꞌen.
21 Awirai vemona beya kaneꞌe vora noriritapu veka beya awirai awaka kopusave vai.
Bauni!
Kanasave veꞌen veka awirai awaka kopuyara veꞌen,
tah awirai tore maramara kopurivo ero,
beya kokai ri awirai awaka ya God vai.
22 Bia ya aotore kairai tah kapaolim yei revo aro bombiam,
bia emo nape?
Bia vemona kasave kairai veka,
“Jisas bia emo beya God-a kamompe ya va nako yei varu aro bombiam ya veku vai.”
Bia ve awirai vemona kairai emo,
ya birua ya Krais tah oreva karoa revo Cha Kan God re Ma ya.
23 Bio oreva naroa Ma Ya God,
oreva karoa Aka ya minia.
Bio nabilip tah nairiraiꞌvo veka,
“Jisas,
bia emo God-a kamompe ya va nakei veka bia ya nako yei varu aro bombiam ya,”
kasave kakei veka kura awaka ya Ma ya God tah Cha Kan Pako minia.
Holi Spirit-a kosave skul-a koromi ro awirai awaka
24 Mopu va awirai voro kopurivo veꞌen ato titja ero,
nopawo kupuana.
Boh awirai vemona nopawo kupuana yah pa nopekeu,
kokepi veka kura awaka ya Ma ya God tah Cha Kan Pako minia.
25 Yah promis-a karomi veꞌen va laip vo kwinia revo toratora naromi.
26 Awirai vemona kaneꞌe nopu kanao nanairai nopu noiy beyo voro inia kepao neropopepu ero.
27 Yah kope mopu,
Krais-a kupuana vo Holi Spirit-a karopu veꞌen tah boko kako yah kakeiroki laip mopu.
Korao veka tah mopu beya nopurivo poiy aro tore skul-a nepopu ro awirai raꞌa tirin vai.
Toh kupuana vo Holi Spirit inia skul-a koropu rore ao koka korao ri veka awirai awaka kopuko veꞌen ero,
yah awirai awaka ya emo kopusave veꞌen tah beya aotore kairai vai.
Korao veka tah mopu va baunke inia nokepi veka kura awaka ya God.
Aro mevova ya God
28 Mopu mevova neman nena,
va nopupopokeya tah nokepiroki piya revo Krais.
Yah taim nakamap vatiron,
kuiniari neromi kupuana yah beya rekanoyomi rova taim nakamap.
29 Boh nopusave veka Krais-a kaniniu riya God,
mopu minia kopusave veꞌen veka beyo koka pasin niniu kepao ri ine ya God,
kekepi veka aro me awaka ya.