Namba wan pas Cha
Jon kareꞌe
Awirai laip-a kwinia ri kokamap vatiron
1
Yah Awirai vemona mare kemeꞌe mopu emo,
kwirai ro ao voro kwiniarere veꞌen ato titja taim God-a ao koka kararerare,
yah baunke kwinia kokai kuiniari mare.
Awirai vo ao vemona kemirivo veꞌen titja,
yah kemipirike ine memi veku,
tah kemoremomo yah eno memi veku minia kemavetata.
Yah awirai koka vemona kwereke revo awirai ya God vora kuiniari laip awaka naromi aro bombiam vo meꞌri.
2 Ao vemona kwinia veꞌen atoke tah kokai emo,
ya veku ku vo laip kwinia toratora.
Yah kope God-a karaonaka kakamap roiy aro bombiam-a vatiron vora kuiniari nepirikeya.
Kemipirikeya veꞌen yah mare awirai awaka ya inia kemiriraiꞌvo mopu vatiron.
Awaka kemirai mopu veka ao vemona ya veku ku vo laip kwinia tora tora.
Yah titja aka,
kakei riya Cha Kan Pako.
Tah mare God-a karaonaka kakai romi revo vatiron vora kuiniari nemipirikeya.
3 Memi mare awirai rere ao ve kemipirikere tah kemirivo ero kemiriraiꞌvo mopu,
va mopu minia kuiniari nokepi pimi rimo moike.
Yah kuiniari nekemi revo rimo moike riya Cha Kan Pako re Ma ya Jisas Krais.
4 Pas vemona kemeꞌe mopu vora kuiniari rovaneme mo revo pasin vo oꞌto notemi yah nuinia rimi toratora.
Memi va nekemi lait
5 Awirai vemona Jisas Krais-a kairiraiꞌvo romi tah mare kemiriraiꞌvo mopu minia va nopu rivo:
God ya lait tah roroke beya koporokeya vai.
6 Boh nemirai veka kekemi rimo moike riya God toh baunke nemute mo pasin vo roroke,
kemiropome memi veku tah beya kemisave pasin-a kemao kowuwuro ri awirai awaka ya God vai.
7 Toh boh pa nemekeu pasin vo lait veka God-a veku kakei lait emo,
kope pasin vemona pon kosave korao kekemi rimo moike riy aro bombiam koka ya God.
Yah noo ya Ma ya God Jisas emo,
kosave sin koka memi kopereki yah korao kekemi kemininiu revo ri ine ya God.
8 Yah boh nemirai veka memi beya sin-a kemao,
kemiropome memi veku tah awirai awaka beya kwiniaroki riꞌi memi vai.
9 Toh boh sin memi nemiriraiꞌvo moa God,
va narao veka kapromis va narao ero.
Va pasin niniu narao yah sin memi napereki,
yah ao koka kemaremare beya kereniniu ri ine ya God va naruna,
yah napereki nao tah narao nemi niniu poaka.
10 Yah boh aotore nemirai veka beya sin-a kemao,
kope God-a keminaka veka bia tore,
tah raꞌa vo minia,
awirai ya beya kwinia rimo memi vai.