Awirai kerinia rovo pas vemona beya kovatiron revo veka bia nape pas vemona kareꞌe. Toh awirai prumo vo histori vo Kristen sios kwirai veka pas vemona kokai riya Cha Jon. Tah Cha Jon emo ya aposel vemona kasave kaporokeya revo Jisas-a kakuke. Awirai prumo vo pas vemona korao ri minia veka awirai kerinia Awirai Neman Cha Jon Kareꞌe. Taim Cha Jon pas vemona kareꞌe, prumo yei aposel ya Jisas keviri veꞌen tah prumo yei tisa tore kekamap yah inia ketowa tah keropopeiy kepaulim yei revo Kristen va pa nepekeiy po ruru maraꞌa beya kwerekeya Jisas vai. Korao veka tah pas vemona va kupuana noroiy aro Kristen vora pa nepeke pasin niniu ya God tah awirai voro kwerekeya revo Jisas bia emo nape.

Ku raꞌa vo awirai ya Cha Jon, Cha Jon karerero veka aro bombiam Kristen beya nepin aro vo roroke emo, neropopeiy tah neraipaiy va nepepeya God vai. Aro vemona “aro vo roroke” kesave chirai veka, ao vemona mare kerinia meꞌri emo beya kereneman revo vai. Yah kesave chirai minia veka, Jisas ya Ma Biam ya God, tah beya kuiniari nakamap veka bio aka tah beya kuiniari nakeiy rovo rire ao vo meꞌri vemona veka memi aro bombiam kemisave kemao ero. Awirai raꞌa vova kesave chirai veka, bio karao nakei revo ri ine ya God, beya ova nakinakina rore ao vo meꞌri vemona vai. Kesave chirai minia veka, pasin niniu re pasin vo nemeremoiy revo aro ovu minia emo ao vo meꞌri vemona. Korao veka tah memi aro bombiam beya nemikinakina va pa nemekere pasin vemona vai. Toh arikuro vo pas ya Cha Jon emo, Cha Jon veku karerero veka memi aro Kristen bombiam beya awirai yei nemirivo tah nemibilip mo vai.

Pas ve mare emo, Cha Jon kakupuana ro awirai awaka veka Jisas-a kakamap bio aka tah aro bombiam kebilip pova Jisas, va pa nepeke pasin ya Jisas va neperepova revo God tah neperepoiy revo aro bombiam ovu minia. God-a veku karereromi titja nini tah Spirit ya karereroki riꞌi memi aro kemibilip mova. Tah ya veku kasave kupuana karoiy aro kebilip pova tah kekepiroki piya God yah pa kepeke pasin ya Jisas tah awirai awaka ya God.