Pas Cha Pol kareꞌe roa
Cha Filemon
1
Nena Cha Pol,
kakeni bia kalabus ya Krais Jisas.a
Mah Filemon,
memi aro kemibilip mova God tah kekemi veka aro noo ya veku.
Mepi raꞌai memi Cha Timoti,
kepipere poma revo veka raꞌai memi aka.
Tah mema minia kakemi mimi vora boꞌo ya Jisas-a nemao.
Tah pas vemona kepipeꞌe poma.
2 Pas emo kepipeꞌe popu aro vemona:
Mema veku,
rou memi Kwa Apia,
tah ya Cha Arkipus,
bia ya kakei veka soldia kupuana ya God tah karoi rovo rimi roma pako vemona.
Yah yei aro bombiam vo sios inia kekape tah keopoke oꞌro mema minia.
3 God Cha Kan memi re Biapako Jisas Krais kuiniari neremarimari+ \fr 1.3 \fq marimari \ft Nopu yara “marimari” kwinia Ku rere awirai Ovu.
popu yah riꞌi maririb nerepopu.
Pasin neman ya Cha Filemon korao Cha Pol ova korova revo
4 Umumoka taim beten-a kanao nova God nena,
ova inia kanakinakina noma yah oꞌti kanoa God.
5 Ku vo korao veka,
inia kanarivo veka mema bia riva kamoa Biapako Jisas yah inia pasin neman-a kamao moa,
tah pasin veka emo minia kamao moiy aro bombiam koka kebilip pova God.
6 Nena beten-a inia kanao yah kanatere noa God vora bilip mema narao nokupuana vora kuiniari namalpim yei aro bombiam ya,
tah yei minia kuiniari nepao naromi kupuana.
Boh norao veka God-a veku va boꞌo awaka ya narao vora namasave veka,
ao neman inia kerekamap rimi rimoꞌo kuro,
emo ao rere va awoꞌo ya Krais-a nemawoko nake.
7 Raꞌai,
mema inia kamere moiy revo aro bombiam kebilip pova God.
Tah pasin ve kamao riꞌi yei kokupuana yah kebilip poa Krais Jisas,
yah boꞌo awaka ya kepiapao.
Tah ao emo korao ova korona poaka tah riꞌi mariri kanako.
Emo ku vo aka,
tah beten-a inia kanao yah oꞌti kanoa God.
Cha Filemon va nako ya varu Cha Onesimus veka raꞌai awaka
8 Ro awoꞌo ya Krais nena kuiniari awirai nanairai noma arape va namao tah beya kanariri vai.
9 Toh kanayara veka beya kuiniari nanairai nama vora ao vemona namao vai.
Pasin vo namere moiy aro bombiam ovu,
ero ao pako mepi minia.
Korao veka tah nena va awirai nanairai noma mariro.
Nena Cha Pol,
yake koranaore yah mare kakeni veka bia kalabus vo awirai ya Krais Jisas.
10 Yah kanao nanatere noma vora pasin neman-a namao moa bia raꞌa kakei veka ma nena.
Taim kakeni kalabus,
bia vemona kakai rina yah kanalpim ya tah kabilip rova Krais.
Yah mare karao veka ma nena aka,
awoꞌo ya Cha Onesimus.
11 Titja kataipo beya boꞌo neman-a karao vora noalpim mema vai.
Toh kope mare kave bia neman awaka vora kuiniari boꞌo nalpim mepi.c
12-14 Bia vemona,
kanerenova revo.
Kanitoro nanaivia nakei rina vora bopo nako woma yah nalpim nena.
Ku vo korao veka boꞌo kanakupuana nou gutnius tah keperenaki kalabus.
Korao veka tah mare kanasalim ya varu kanoi rima veꞌen,
tah kanaokoku nova revo.
Toh mema veku arape kamayara veka koneman tah kama namao vora noalpim nena,
nena va nanayara pon tah beya nana wararama vai.
15 Awaka,
kanitoro veka,
ku vo God-a karin Cha Onesimus karerema kanoiki taim korama kanapo,
korao veka,
va nabilip rova Krais wo yah kope namako ya varu yah nakei rima toratora veka raꞌai mema aka.
16 Mema beya namayaraka Cha Onesimus veka wokboi kanapo vova vai.
Baun poaka!
Kuiniari nakei veka wokboi kanapod mema,
toh kope mare va namapirikeya veka raꞌai awaka mema.
Nena veku kanayaraka veꞌen veka raꞌai awaka tah riꞌi nena kwinia rova.
Kanasave veka mema minia va namere mova revo.
Emo korao veka,
kave wokboi tah raꞌai awaka mema ro awoꞌo ya Biapako.
17 Boh nama pirikena kanao veka kura mema ro boꞌo ya Krais tah pasin neman-a inia kamao mona,
va namako ya varu Cha Onesimus yah pasin veka inia kamao mona emo,
va namao moa minia.
18 Boh rong-a raꞌa karao rima o dinau ovu karao rima tah beya kabekim,
va namin nuinia eno peꞌe nena veku.
19 Nena Cha Pol pas vemona kaneꞌe noma eno nena veku.
Nena veku va mani vo dinau ya va nanoma.
Nena kuiniari nanairai veka laip mema dinau korao rina.e
Toh nena beya kanao awirai vo ao vemona nanairai nou vai.
20 Raꞌai nena,
mepi kepikepi veka aro ya Krais.
Ro awoꞌo ya Biapako,
kanere noma va pasin neman-a namao mona va riꞌi nena nokopuana yah riꞌi mariri nanako.
21 Kanayara veꞌen veka ao ve kaneꞌe kerinia pas emo va namao.
Yah mema va pa namekeu revo yah namao notawoki pasin mare kanatere noma namao emo.
22 Yah ao raꞌa vova kwinia rina va nairai noma.
Nena kanabilip veka God-a va beten mopu narivo yah kuiniari rara narao rona vora nakane yah nana yarapu.
Korao veka tah oꞌro mema va rum raꞌa nemenamanao vora kuiniari nanainia taim nakane nakeni nipu.
Aro wanwok ya Cha Pol umonai neman-a kesalim poa Cha Filemon
23 Cha Epafras umonai neman ya kasalim roma.
Kepikepi minia kalabus ro boꞌo ya Krais Jisas.
24 Aro nena boꞌo kemao minia umonai neman-a kesalim poma.
Aro vemona:
Cha Mak,
Cha Aristarkus,
Cha Demas yah Cha Luk.
25 Marimari ya Biapako Jisas Krais kuiniari nunia spirit mopu.