Cha Timoti va nakei veka soldia neman ya Krais Jisas
2
Ma nena,
marimari ya Krais Jisas-a namako vora kupuana noroma.
2 Awirai koka kamarivo kanairiraiꞌvo noiy aro bombiam koka ero,
awirai vemona va namoiy eno yei aro bombiam koka inia awirai ya God-a kiavo kupuana vora kuiniari skul-a nepoiy minia aro ovu.
3 Mema va nakemi veka soldia neman ya Krais Jisas yah nai vo boꞌo ve namapoi imi.
4 Boꞌo yei soldia kesave kepao ero kamayara veꞌen.
Taim soldia boꞌo yei kepao beya kuiniari boꞌo raꞌa nepao minia vai.
Yei kesave boꞌo vo soldia pon kepao vora ofisa yei ova norova roiy revo.
5 Korao veka tah,
boh bio naparara resis tah beya pava narekeu revo lo vo,
beya kuiniari prais raꞌa nako vai.
6 Bio rika nakupuana ro revo erora narao,
va akorom kora vo erora nako reiy aro ovu cha.
7 Boh awirai koka kanairai noma namawo nuinia ruru mema,
Biapako va narao ruru mema noruriki yah ao koka vemona va namasave rere.
8 Toratora va ova namakina mova Jisas Krais,
karai yah kope God-a karao kavariko varu yah kakei tare,
ya noo yei aro ya King Devit.
Emo awirai neman ya God inia kanairiraiꞌvo noiy aro koka inia kerivo.
9 Nena inia awirai neman ya God-a inia kanairiraivo tah kepirikena veka nena bia taipo,
tapara ve nai prumo kepona revo yah keperenaki kalabus.
Toh kope vou awirai ya God beya kuiniari nokalabus vai,
va baunke inia niriraivo nonoi.
10 Korao veka tah inia karoni kupuana yah nai koka vemona kanapoi vora aro bombiam God-a kamompe kuiniari nekepi toratora riya Krais Jisas revo lait.
11 Awirai vemona mare kanao nanairai,
emo awaka revo kuiniari nemibilip mo:
Boh nemiviri miya
va laip-a nemiko miya.
12 Boh neromi kupuana yah nai koka nemiko,
va nekemi miya veka king.
Toh boh nonimi rova tah nemirai veka memi beya aro ya vai,
ya minia va nonia romi yah nairai veka memi mina beya aro ya vai.
13 Boh promis-a nemao va pa nemikeya toh beya pa nemikeu promis ve memi,
ya baunke va pa narekeu awirai ya kairai ero.
Beya kuiniari naropore ya veku vai.
Baun poaka.
Cha Timoti va naroi kupuana vora kuiniari boꞌo ya God-a narao
14 Aro mema awirai vemona keyara veꞌen,
toh inia namairirai moiy umumoka vora neyara revo.
Va namairai moiy revo ri ine ya God veka beya netovetove kanakanapo po ao mentanaka kanapo vai.
Pasin vemona neman vo kobaun reu,
tah kosave korao laip yei beyo awirai-a kerivo ero kotaipo.
15 Boꞌo va rika nama kupuana vora boꞌo awaka namao,
va God-a narerero boꞌo mema.
Boh awirai neman ya God-a namairiraiꞌvo revo,
beya kuiniari reka noyoma vai.
16 Mema va oreva namore awirai maraꞌa beya pava korekeu ruru ya God.
Ku vo korao veka,
aro voro awirai taipere inia chirirai ero,
va nenopi netaipo poaka tah beya kuiniari nekepi piya revo God-a kakuke vai.
17 Awirai yei korao veka auka taipo inia koki konoi yah kopako revo tah korao beyo ketaipo poaka.
Bia riyempin ve pasin maraꞌa vemona kerepao emo,
Cha Himeneus re Cha Filetus.
18 Rara vo awirai awaka neyirai kerepepeu veꞌen,
ero korao veka,
keyirai veka,
“Taim kemi bilip mova Jisas yah baptais-a kemiko,
emo korao veka kekemi matmat yah kope kemi vereko veni.
Korao veka tah beya kuiniari tare nemi vereko taim raꞌa vova vai.”
Awirai vemo pon tah inia kepao bilip yei aro bombiam ovu kotaipo.
19 Toh ya God-a akairi kupuana karira tah siosa ya inia karaota akairi vemona.
Yah awirai vemona kareta akairi ve kwirai veka,
“Biapako kasave yei revo aro bombiam ya.”
Kope awirai koraꞌa vova kareꞌe kwirai veka,
“Aro koka awoꞌo ya Biapako keko,
va oreva nepore pasin beya kereniniu ri ine ya God.”
20 Oꞌro pako raꞌa dis ovu kerinia.
Ovu rere dis vemona gol re silva keko tah keparepare.
Ovu rere ai-a keko tah keparepare tah ovu meꞌri keko yah keparepare.
Dis vemona ovu rere boꞌo awaka kererao tah ovu rere boꞌo taipo kererao.
21 Korao veka tah boh bio raꞌa pasin taipere naririki revo laip ya,
yah kope naniniu ri ine ya God,
bia emo karave dis vemona boꞌo awaka korao emo.
Bia emo va nakei naneman revo yah naholi.
Yah Biapako va napirikeiya veka kakei pon vora boꞌo prumo neman ya narao.
22 Korao veka tah,
oreva va namore ruru taipere aro bombiam yangpla inia kepao ero.
Mema va boꞌo namao va pasin niniu namako,
tah pasin vo nemibilip mova revo God,
tah pasin vo nemeremoiy aro ovu,
tah pasin vo riꞌi mariri nemiko.
Mopu va pasin vemona pon nopao.
Mema awei aro voro keperepo revo veka riꞌi yei beya pasin taipere nepao ri ine ya God ero,
va lotu tah pre nopao poa Biapako.
23 Mema beya nakemi romoiy aro voro ruru awaka kobaun reiy vai.
Awirai taipere vemona inia kobagarapim yei beyo tah korao kekepi inia ketovetove tah roma pon kepao kiarara.
24 Bio boꞌo ya Biapako narao beya pasin taipo narao roiy aro bombiam o awei natovetove vai.
Pasin neman pon va narao roiy aro koka.
Boh beyo nebikhet tah beya awirai ya nerivo,
va riꞌi mariri nako yah rara naorenana vora skul-a naroiy ro pasin voro God-a karerero va pa nepekeu ero.
25 Boꞌo va narao mariro tah nako yei beyo voro beya awirai-a kerivo ero vora ao neman-a neyara yah nepao.
Boh narao veka,
beya kanasave vai,
era God-a va nalpim yei kuiniari nerovoru yah ao veka inia keparepare nepepereki yah save neman-a neko po Awirai awaka ya God o?
26 Satan-a kako yei kekepiroko veꞌen chao ya vora narao pa nepekeu awirai ya.
Boh awirai awaka ya God-a neko,
save re ruru neman va nokai riy varu yah kuiniari niapuki yah chao ya Satan-a nepepeu.