Aro bombiam va pasin taipere nepao niarara taim meꞌri vemona korao nobaunki
3
Toh mema va namayara veka,
kakuke ri taim meꞌri vemona korao nobaunki,
nai prumo va nerekare.
2 Aro bombiam va nepere poiy yei veku,
mani va nepere pore revo,
awoꞌo yei veku va niawoko,
pianorerei,
awirai neman-a va nioniy,
tah va netove kanakanapo piy aro ovu.
Awirai yei aka moꞌo va beya nerivo tah beya oꞌti nepoa God ro pasin neman keko ero.
Oreva va nepo pasin ya God.
3 Pasin vo nepere poiy aro ovu kobaun reiy,
tah beya kuiniari nepogivim yei aro ovu vai.
Va nekepi pianepari poiy aro ovu.
Toh yei veku beya kuiniari reka yei veku neorepari rore arape keperepore vai.
Va roma pon inia nepao piy aro ovu yah nekepi ine neputrotropu pasin neman.
4 Va nepao poiy toro aro kura yei veku pasin neman inia kepao ero,
tah va neperepore bereren ruru taipere yei veku.
Yei va ova nekina po yei veku veka yei aro rokorapo.
Va nepere pore revo pasin maramara vo meꞌri vemona,
tah beya kuiniari nepere pova God vai.
5 Reka upuoꞌo yei,
va neropopei veka,
pava kepekeu revo pasin neman ri ine ya God.
Toh yei beya keperepore vai,
kepitoro veka pasin neman ya God kupuana kobaun reu.
Korao veka tah aro veka emo va nakemi meiy rarapa.
6 Ovu yei aro veka vemona kesave rara keorenana va nenopi popore oꞌro rere aro bom ruru neman-a kobaun rere ero,
tah keropopere yah ruru kepererovoru.
Aro bom veka vemo keresave pasin taipere aka kererao yah kope kereyara veka nai prumo kerekare rire.
Riꞌi kokokonare revo va pasin taipere maramaraꞌa nererao.
7 Aro bom ve keresave kerererero revo va skul-a nereko,
toh beya kuiniari save nereko ro awirai awaka ya God vai.
8 Titja Cha Janes re Cha Jambres a ine kepia trotropu Cha Moses,
korao veka tah aro ve pasin vemona inia kepao ero oreva kepo awirai awaka.
Ruru yei kotaipo poaka.
Emo korao veka,
toratora ruru yei koraipaiy,
tah pa kepekeu pon pasin taipo tah beya kesave kebilip pova revo God vai.
9 Pasin ve yei beya kuiniari nuinia nonoi nopako vai.
Beyo prumo keyara veka pasin vemona konoi yah kolonglong poaka veka titja keyara pasin taipo ya Cha Janes re Cha Jambres.
Cha Pol skul-a karoa Cha Timoti vora awirai neman ya God-a nawo kupuana
10 Toh mema Mah Timoti,
mema kakemi mina tah pasin nena skul-a kanoi aro bombiam ro pasin God-a karerero ero kamasave revo.
Pasin neman-a inia pavakanekeu ero ku vo kamayara veꞌen.
Mema kamayara veꞌen veka,
nena kanabilip nova revo God tah boꞌo ya kanao karoni kupuana tah aro ovu kanere noiy revo tah vemona karoni kupuana va nai-a nanapoi.
11 Mema pasin tah nai yei aro mataimon Antiok,
Aikoniam yah Listrab kepao pona ero kamayara veꞌen.
Nai koka ve Biapako kalpim nena tah kakeni kananeman.
12 Awaka,
aro voro keperepo revo va neroropova Krais Jisas yah pava kepekeu revo pasin neman God-a karerero ero,
beyo va nepao poiy toro.
13 Aro taipo awei aro giaman,
va neropopei aro bombiam yah ruru nepeirovoru.
Satan minia va ruru nareirovoru yah naroporei aro vemona yah pasin yei narao nonoi notaipo poaka.
14 Toh mema veku va awirai voro kamako ero namawo kupuana yah namabilip mo.
Ku vo korao veka,
kamayarami veꞌen veka memi aro skul-a inia kemoma mo awirai vemona.
15 Mema kamayara veka,
taim kama mentanaka,
save kamakomo buk voro awirai ya God-a kwinia ero.
Buk vemona kuiniari save neman-a noroma yah kuiniari namabilip mova Krais Jisas,
yah God-a kuiniari nako mema varu.
16 Spirit ya God veku korao awirai koka kerinia buk ya God kokamap.
Awirai vemona kereneman revo va skul-a noromi ro awirai awaka.
Awirai vemona kuiniari noalpim yei aro bombiam ruru yei beya koneman,
tah kuiniari noalpim memi aro bombiam rara neman-a kememeu ero,
va nekame varu rara voro God-a veku karerero ero.
Yah awirai vemona kuiniari pasin niniu noriritami.
17 Korao veka tah awirai vemona inia korao memi aro bombiam ya God pasin neman-a kemiko tah inia korao kekemi kemiredi pon,
vora boꞌo neman maomao nemaremare.