2 Tah katere roiy veka, “Taim kopu bilip, Holi Spirit-a kopuko o bauni?”

Yah kope chirai poa veka, “Baun poaka! Memi beya kemi save vo Holi Spirit vai.”

3 Yah kope Cha Pol katere roiy vova veka, “Toh mopu baptais vekarope kopuko?”

Yah kope chirai poa veka, “Memi baptais ya Cha Jon kemiko.”

4 Kope Cha Pol kairai roiy veka, “Titja Cha Jon kabaptaisim yei aro bombiam yah kairai veka, mopu va riva nopu rovoru yah baptais-a nopuko. Yah kairai roiy vora nebilip pova bia vemona va nakai rova pa ve, bia emo ya Jisas.” 5 Taim awirai vemona kerivo yah baptais-a keko po awoꞌo ya Biapako Jisas. 6 Kope taim Cha Pol eno-a kareretaiy, yah Holi Spirit-a koraro riꞌiy tah poko maramaraꞌa chirai yah awirai-a chiriraiꞌvo veka God-a veku karoiy ero. 7 Yah kope namba yei beyo vemona kuiniari veka 12-pla.

8 Kope Cha Pol kanoi oꞌro lotu yei Juda tah awirai kupuana va kairiraiꞌvo ro kingdom ya God konoi kuiniari veka ura 3-pla. Yah awirai vemona korao ruru kokokore naiy. 9  Toh ovu yei riva kerei kupuana tah beya kebilip vai. Kope ri ine yei aro bombiam poko taipo va chirai po Rara ya Biapako. Korao veka tah Cha Pol awei aro kebilip pova Jisas emo, beya kenopi vova oꞌro lotu yei Juda vai. Yah kope umumoka, Cha Pol inia kanoi awirai-a kairiraiꞌvo oꞌro skul are ya Cha Tiranus. 10 Karao karara pon veka konoi kuiniari veka ainini riyempin. Korao veka tah, aro Juda koka awei Grik inia kekepi boko prumo vo provins Esia emo awirai ya Biapako keko.

11 God-a karao Cha Pol mirakol ipipo maramaraꞌa aro bombiam beya keyara titja ero kararerare. 12 Korao veka tah aro bombiam-a taul tah aimino koraꞌa voro Cha Pol kavetatare ero, kepuna kenopi keperetai aro ava korai ero, yah keneman varu. Yah spirit taipo kereporokei ero minia kerererei.

13-14 Kope bikpris yei Juda raꞌa awoꞌo ya Cha Skeva^a tah me biam 7-pla ya. Yah kope aro me biam vemo inia kenopi popore boko koka tah spirit taipere kerekeri riꞌiy beyo ero keririkere piꞌiy. Kope taim boꞌo vemona kepao, chirai poiy spirit taipo va veka, “Awoꞌo ya Jisas bia ero Cha Pol awirai ya inia kairiraiꞌvo ero, kemi ririkepu.” 15 Kope umo raꞌa, spirit taipo raꞌa ava kwirai roiy veka, “Jisas voro, nen kenyaraka veꞌen tah Cha Pol minia kenyaraka. Toh mopu nape?” 16 Yah kope bia emo spirit taipo kokei riya emo kapukire taiy yah kayei tah reka yei noo kerekarekare. Tah aimino yei karororo reiy yah keprara ro kanapo kenopi upoꞌo.

17 Kope taim aro Juda tah yei Grik koka kekepi Efesus emo, awirai vo ao vemona kerivo, tah keriri poaka. Yah kope awoꞌo ya Biapako Jisas-a kiavoko. 18 Aro bombiam prumo inia kebilip ero, kekape vatiron yah ao taipere keparepare veꞌen titja ero chiriraiꞌvo varu. 19 Kope aro bombiam prumo voro inia awoi re marela keparepare ero, buk tah ao ovu chiriri kekape yah keopoke minia yah kekipari aikera ri ine yei aro bombiam koka. Kope aro bombiam koka kekepi taim vemona yah kepirike ao koka ve kekipari aikera emo. Yah kope mani rere buk tah ao koka vemona kekauntem konoi kuiniari veka 50,000 mani silva. 20 Yah pasin vemona awirai ya Biapako emo korereka kokupuana revo yah kwavetari konoi boko koka.

21 Yah taim ao koka vemona konoiki veꞌen, yah Holi Spirit-a korao Cha Pol kairai veka karao nanoi mataimon pako Jerusalem. Yah Cha Pol kanoi provins Masedonia yah kope kanoi provins Akaia yah va nanoi nareiki Jerusalem. Yah kope kairai roiy veka, “Taim nanon nakeni mataimon pako Jerusalem, va nanon minia mataimon pako Rom.” 22 Kope kasalim yei bia riyempin inia kerialpim ya emo, kerenopi provins Masedonia. Bia riyempin vemona awoꞌo yei, Cha Timoti re Cha Erastus. Kope ya veku kakeiki popo provins Esia.

23 Kope taim vemona, ao taipo aka korereka mataimon Efesus. Aro voro beya keperepo Rara ya Biapako ero, nai-a kepao yah kepao konoi kopakoki vovake. 24 Beyo raꞌa kakei awoꞌo ya Cha Demitrius, bia emo silva inia karuna yah ao maramaraꞌa kararerare. Boꞌo bisnis ya karao rore piksa mememe vo oꞌro lotu vo god bom Kwa Artemis. Yah boho pako karoi aro inia ava keparepare silva ero, tah mani pako keko. 25 Kope Cha Demitrius kairiy aro inia bova kepao ero, awei aro ovu ao maramaraꞌa keparepare ero kekape keopoke minia yah kairai roiy veka, “Aro raꞌai, mopu kopu yara veꞌen veka boꞌo vemona inia kemao emo mani pako inia kemiko moho. 26 Tah mopu kopu rivo yah kopu yara veꞌen veka, Cha Pol karaipaiy aro bombiam prumo vo mataimon Efesus yah ruru va karei rovoru. Yah kairai roiy veka god voronaro beyo keparepare eno peꞌe yei ero, beya god awaka vai. Yah ao vemona karao emo, beya kwinia pon mataimon Efesus vai. Ao vemona inia karao tah karaipaiy beyo yah ruru karei rovoru emo inia konoi yah korao noririre boko koka vo provins Esia. 27 Yah awirai ya Cha Pol emo kuiniari norao awoꞌo vou boꞌo bisnis memi notaipo. Tah ao raꞌa vo minia, awirai ya kuiniari norao tempel vo god bom pako Artemis norao veka ao kanapo ri ruru yei aro bombiam. Titja aka kokai kuiniari mare, aro bombiam koka vo provins Esia tah boko koka vo meꞌri kesave lotu kepao po god bom vemona. Yah awirai ya Cha Pol, korao awoꞌo pako vo god bom vemona kobagarap.”

28 Taim awirai vemona kerivo, ova kereiroro poaka. Tah kiepi pako veka, “Kwa Artemis vo god memi Efesus koneman revo.” 29 Korao veka tah aro koka vo mataimon vemona kiepi tah ririva keko. Yah keprara kenopi bo vemona keopokeu emo yah kiavia Cha Gaius re Cha Aristarkus. Cha Aristarkus re Cha Gaius, aro riyempin vemona emo yei provins Masedonia tah yei inia keriute popova Cha Pol.

30 Kope Cha Pol karao nanoi nayarai aro bombiam koka vemo, toh yei Kristen-a kepao papiya. 31 Kope aro kura ya Cha Pol emo ovu kekepi veka ofisa vo provins Esia. Tah awirai kupuana va kesalim konoi roa yah kepao papiya vora beya nanoi bo vemona keopokeke emo vai.

32 Aro bombiam koka kekape kekepi bo vemona keopokeu emo, ruru kerei paul. Korao veka tah ovu kiepi po ao raꞌa, tah yei ovu kiepi po ao raꞌa tirin. Tah ku vo kekape keopokeke emo, beya keyara revo vai. 33 Yah aro Juda keraipaka Cha Aleksander kakai karoi cha riꞌiy ine yei aro bombiam. Tah aro ovu keyaraka yah kepitoro veka ya ku vo nai vemona. Yah kope Cha Aleksander eno karao roiy va rova nepikim va ava nairai roiy. 34 Kope taim keyara veka ya Juda, yah aro bombiam koka kiepi pako yah chirai minia veka, “Kwa Artemis god bom memi Efesus koneman revo.” Yah inia kiepi pon veka konoi kuiniari veka aua riyempin. 35 Yah kope kuskus vo mataimon vemona karao aro bombiam koka kekepi emo rova kepikim tah kairai roiy veka, “Mopu aro vo mataimon Efesus emo va awirai vemona nopu rivo revo. Aro bombiam vo boko maomao keyara veꞌen veka memi aro vo kemore mami revo tempel vo god bom Artemis. Yah kope inia kemore mami revo akairi vo lotu kepao po korei koraro uteno nake. 36 Emo awirai awaka tah beyo raꞌa beya nairai veka kana roponepu vai. Korao veka tah rova nopu pikim tah beya nopu bikhet vai. 37 Mopu aro riyempin vemona kopaveiy kokape emo, beya ao vo tempel rava kakana kerepao vai, tah poko taipo rava beya keyirai po god bom Kwa Artemis vai. 38 Boh Cha Demitrius awei aro ya kepao kot-a nepia pao bia raꞌa ri taim vo kot, jas-a va kot-a narivo. Awirai arape nuinia riꞌiy kuiniari niriraiꞌvo. 39 Boh awirai ovu vova nerinia ripu kopao nopirai, va nopiriraiꞌvo revo bo vo kot. 40 Korao veka tah kemiriri moiy ofisa yei gavman-a va kot-a nepemi pao po arape kemao ero. Memi beya kemao nai vo ao vemo nemiko vai. Emo korao veka, ao vemona kemao emo ku vo kobauni.” 41 Yah taim kuskus-a awirai vemona kairaiki nao, yah kairai roiy aro bombiam maomao vemo keturepi.